Read Pangasinan SIRAC 28 Bible Online

SIRAC 28 - Pangasinan bible

SIRAC 28

¹"Limanoen na Katawan iray kasalanan mo, et no ombawi ka ed siopaman, ombawi met so Katawan ed sika.

²"Balet no pirdonaen mo so siopaman a nankasalanan ed sika, napirdona ray kasalanan mo no mampikasi ka.

³"Ag mo nailaloan a pirdonaen ka na Katawan no walay eememan mon bosul a sumpad sakey a too.

⁴"Makasalanan ka met, et no ag mo pirdonaen iray arum a totoo, anggapoy kanepegan mon mampikasi a pirdonaen ka na Katawan.

⁵"No ag mo naekal so panagpasnuk mo, anggapoy ilalom a napirdonasakey ka met labat a too.

⁶"Nudnunot mo ya! Walay agew na ipatey mo, tan naboluk so laman mo. Kanyan tondaan moy bosul tan mambilay kan maonur ed saray ganggan na Katawan,

⁷"saray ganggan ed siopaman na Sankatageyan. Kanyan palabas mo la ray kasalanan na kaakbay mo; ag mo la pamapasnukan.

⁸"No arawian mo ray sangsangan, ag ka mankasalanan na dakel, ta say petang na olo so manangigapo na saray sangsangan.

⁹"Kasalanan so pamuyak na pankakaaro diad panamegley na pamalesa na pambosulan da ray totoon marakep so panoolup da.

¹⁰No dakel so kiew, lalon ampetang so apoy. No lalon anawet so olo, lalon ampetang so sangsangan. No lalon mabiskeg odino mayaman so sakey a too, lalon mapetang so olo to.

¹¹Say sangsangan a biglan onliub et nayarin mansumpal ed pateyan.

¹²Nayarin sibukan moy ngalab pian ondalang, odino nayarin lukdaan mo pian naerep. Anggan dinay gawaen mod saraya, songut moy ikanam.

¹³Kanepegan na saray managtalabutob tan saray matila so nisamba, lapud sikaray kadederalay amayamay a totoon mareey pambibilay da.

¹⁴Dakel iray aderal so bilay da tan apataynan irad kaabungan da, lapud saray totoon akibabalid panagbilay da. Satan a pibabali et nansumpal ed impakaderal na mabiskeg iran siudad tan saray abung na gagalangen a totoo.

¹⁵Saray totoon mibabali so makasengeg na impakaisian na saray matoor ya asawan bibii, tan atakew ya min iray bengatlan nansagputan da.

¹⁶Siopamay ondengel ed toon managpaoges na kapara ton too et ag balut mandeen so kanunotan to.

¹⁷Mampabiret so lewet, balet makapoter na pokel so dilan matila.

¹⁸Dakel niy totoon inaatey lapud maoges a tongtong nen saray totoon inaatey diad panamegley na ispada.

¹⁹Ipasen mon mapalar ka no nipaliis kad tongtong ya andi-kakanaan no ag apakoan na balatyang so tenger mo odino agolunggolungan na ambelat iray salim.

²⁰Mamapaarap ed makapasinagem a patey so salitan mamaoges na arum a too; diad tuay tua, maung ni no inatey ka la.

²²Balet ag natalo na salitan mamaoges iray totoon matonung; ag ira napoolan na apoy to.

²³Saray natatalo to et saray inkaindan day Katawan; ag naerep so apoy na salitan mamaoges na pinmool lad pegley da. Singa lion ya ondegkem ed sikara so salitan mamaoges tan singa liopardo a bingbingkasen to ra.

²⁴Ag mo ta aalaren so kayaryan mo? Ag mo ta totombukan so kuartam?

²⁵Ontan met, alwaran moy panagsalitam. Simbang moy salitam tan iparaan moy pankandado na sangim.

²⁶Nayarin walay toon manaalagar na pakailawan mo, et no aliwa kan maalwar naerel kad saray dilin salitam tan natumba kad arap to.