Read Pangasinan SIRAC 29 Bible Online

SIRAC 29 - Pangasinan bible

SIRAC 29

¹"Nepeg a diad panangasim mangipabayes kad kaabay mo no nakaukolan toy tulong. No tulongan mo, oonuren mo ray ganggan na Katawan.

²"No walay nakaukolan to, ipabayes mo. Tan no walay utang mo, bayaran mon tampol.

³"No bayaran mo ray utang mo, makabayes ka lawas na nakaukolan mo.

⁴"Dakel iray totoon ipapasen day utang a singa bengatlan arumog tan nayarin isinup, et sikato yay panlalapwan na pakakabaingan na saray tinmulong ed sikara.

⁵"Wala ray totoon marakep so pansalita ra tan ontuek ira ya anggad pakala ray uutangen da, balet no nasabi lay panaon na pambayar da palabasen da, ibaga ran aliwan manepeg a panaon, tan manggawa ray andi-kakanaan iran baraan.

⁶"No ipasoot na angipabayes a sikatoy nabayaran, nipasen toy sikaton dili a mapalar no napapawil toy kapaldua. No ag to ipasoot, sikatoy tinakewan na inmutang tan nanggawa na ag nakaukolan a kalaban. Saray nagunggona labat na nampabayes ed toon binmayes et saray samba, panagleglemew, tan panagpaabeba, balet anggapon balut so pisasalamat.

⁷"Dakel iray totoon ag da labay so mangipabayes a balut, aliwan lapud maigut ira, no ag ingen lapud ag da labay so nasaol no nayarian dan paliisan.

⁸"Anggaman ontan, nepeg a natalusan mo ray mairap-bilay. Ag mo ra panaalagaren ed inkabonluk mo.

⁹"Ingganggan na Katawan a tulongan tayo ray mairap-bilay; ag mo isisiblet so nakaukolan dan tulong.

¹⁰Magmaung nin nabalang mo so kuartam diad panamegley na panulong mod sakey ya agi odino kaaro nen say nabalang mo diad panamegley na pakalatian to ed silong na baton-dampay.

¹¹Ikanam so kayamanan mo onung na ingganggan na Sankatageyan; dakel niy nagawaan to yad sika nen say isinup mon para sika so kuartam.

¹²Ibilang mon kabyangan na kayamanan mo so pangiiter mod saray mairap-bilay. Ipaliis to kayad amin a klasiy gunigon

¹³tan magmaung a tirinsira a sumpad saray kalaban mo nen say sankabiskegan a samper odino sankabalegan a pika.

¹⁴Say maung a too maabuloy ya ebatan toy utang na kaabay to. Say too labat ya abalang toy inkasimpit to so ag manlabay a manggawad saya.

¹⁵No walay toon manggawad sayan kaabigan para sika, ag mo lilingwanan so ginawa to; imposta toy maung a ngaran to lapud sika.

¹⁶Wala ray totoon makasalanan a lapud ag da amtay misalamat ikakaindan da ray totoon ontutulong ed sikara, tan sikaray makasengeg na pakababalang na kayaryan da.

¹⁷Say panangebat na utang et dineral to ray amayamay a totoon maaligwas tan sikatoy makasengeg na ag napatondan bagyoy gunigon.

¹⁸Lapud sayan gawa abalang na saray totoon gagalangen ed baley iray kaabungan da tan kinaukolan a mantawataw irad arum a bansa.

¹⁹Say makasalanan a maniilalon makatubo lapud panagebat tod utang et narumog toy sikaton dili a nalanur ed saray kasod korti.

²⁰Kanyan tulongan moy kaabay mo ed anggaay nayarian mo, balet iyagel moy sikan dili sumpad saray kaatapan na pananulong.

²¹Saray nakaukolan ed bilay et say danum, kakanen, kawes, tan abung a napanayaman mon anggapoy pibabali na arum.

²²Magmaung niy mairap so bilay mo a manaayam kad silong na dilin abotaw-botaw ya atep na abung mo nen say manliket kad saray baleg a ponsia ed kaabungan na arum a totoo.

²³Manliket ka ed antokaman a kayaryan mo, anggaman ya aliwan dakerakel, tan ag mo dedengelen so siopaman a manleglemew ed abung tan pamilyam.

²⁴Makapasinagem a bilay so panayam ed nandoroman kaabungan. Inermay laen mo, ag ka mampapangayan mansalita.

²⁵Maliket mon aawaten iray sangkaili tan ibabales iray alak, et anggapoy misasalamat ed sika. Ingen, leleglemewen ka na saray totoo diad pangibabaga ray onya:

²⁶Sangkaili! Gala dia, ta isaklang moy lamisaan! Labay kon kanen so walad tan ed sika! Iyakar mo dia!

²⁷Arawi ka, sankaili! Walay galgalangen a bisitak! Onsabi ya ombisita so agik a laki, et nakaukolan koy kuarto!

²⁸Mairap ya itepel na siopaman a toon makalakal so ag nasangkaili odino tomtombuken na managpaabang na kuarta.