Read Pangasinan SIRAC 3 Bible Online

SIRAC 3 - Pangasinan bible

SIRAC 3

¹"Anak, dengel yo ak; siak so ama yo. Gawa yoy ibabagak ed sikayo, et arawi kayo ed kaatapan,

²"ta initdan na Katawan na pakaoley ed saray anak da iray kaamaan, tan initdan to ray anak na kanepegan ya ontoluk ed saray kainaan da.

³"No pagalangan moy amam, nasakuban mo ray kasalanan mo,

⁴"tan no pagalangan moy inam, makalmo kay baleg a kayamanan.

⁵"No pagalangan moy amam paliketen ka na saray anak mo naani; dengelen na Katawan iray pikakasim.

⁶"No onuren moy Katawan diad panamegley na pamagalang mod amam tan diad pamaliket mod inam, mambilay ka na andokey.

⁷"Onur mo ray atateng mo a singa ka aripen da.

⁸"Pagalangan moy amam ed amin a gagawaen mo tan sasalitaen mo, pian naawat moy bindision to.

⁹"No iter na saray atateng iray bindision da, mangiiter ira na biskeg ed kaabungan na saray anak da; no isamba da ray anak da, dederalen da ray dilin pundasion.

¹⁰Ag mo aanapey pakagalangan mo no sikatoy pakaleglemewan na amam; aliwan kagalangan mo no naleglemew so amam.

¹¹Say dilin pakagalangan mo manlalapud pamapagalang mod amam. No ag pagalangan na saray anak so kainaan da, napelag irad kababaingan.

¹²Anak, asikasom so amam no masiken la; ag mo iitdan na pakagunigonan to legan ton mambibilay.

¹³Magmaliw kan maabagey ed sikato, anggan kabaw la; ag mo leleglemewen lapud mabiskeg tan maabig so laman mo.

¹⁴Ag lingwanan na Katawan so panangasin ipapanengneng mod amam; makatulong ya ed pakasakub na saray kasalanan mo.

¹⁵No wala kad gunigon, nanunotan na Katawan so panangasim tan tulongan to ka; natonaw tan naandi iray kasalanan mo a singa linaew ed petang na agew.

¹⁶Siopamay ikaindan to ray atateng to odino iitdan to ray makasengeg na pampasnuk da et isasamba toy Katawan; sikatoy isasamba la na Katawan.

¹⁷Anak, mampaabeba kad amin a gagawaen mo, et labay ni na saray totoo so gagawaen mo nen saray rigalo.

¹⁸No lalon ontalonggaring ka, lalon nepeg moy mampaabeba; diad ontan napaliket ed sika so Katawan.

²⁰Baleg so pakayari na Katawan, tan sikatoy pagagalangan na saray mapaabeba.

²¹Ag mo sasalien a talusan iray bengatlan mairap a talusan mo, odino sokayan iray bengatlan ag narandan na pakayarim a mangamta.

²²Iyapasakey moy kanunotan mo ed Ganggan a niiter ed sika. Ag nakaukolan ya amtaen mo ray nipaakar ed saray bengatlan ag impaamta na Katawan,

²³kanyan ag mo la ra pibabalian. Ta say katwaan to say nipanengneng ed sika et ag nayarian na toon talusan.

²⁴Amayamay iray totoon napapalikdo na dilin kanunotan da; saray aliwan kanunotan da so amikewet na panagsintinsia ra.

²⁶Pakagunigonan mod kaonuran so awet na olom. No mambilay kad kaatapan, pateyen to ka met lamlamang.

²⁷Nabuntonan na gunigon so toon anawet so olo to. Mambubuntonan so kasalanan na saray totoon makasalanan.

²⁸Anggapoy makapatonda ed saray gunigon na saray totoon mapaatagey; linmamulamut ed sikara so kaogsan.

²⁹Makaaral ed saray probirbio tan saray alimbawa iray totoon matudyoy kanunotan. Marengerengel ira, lapud labay day makaaral.

³⁰Makasakub na kasalanan so pangiter ed saray mairap-bilay, a singa pakasebseb na danum ed manliub ya apoy.

³¹Siopamay mangipapanengneng na panangasi tod arum a totoo et nununoten toy arapen, lapud makalmo na tulong no sikato bilang so napelag no panaon na kairapan.