Read Pangasinan SIRAC 31 Bible Online

SIRAC 31 - Pangasinan bible

SIRAC 31

¹"Say kapagaan nipaakar ed kuarta et palemewen toy belat mo tan ag to ka paogipen.

²"Ag ka paogipen na kapagaan nipaakar ed nigosio, a singa gagawaen na ambelat a sakit.

³"Mankikimey na pinasya iray totoon mayaman, pian nawalaan iray dakel a kuarta; insan ira makapampainawa tan makapambilay na sawasawaan.

⁴"Mankikimey na pinasya iray totoon mairap-bilay tan anggapoy pakanengnengay nansagputan da, et no mampainawa ra mairap nin siansiay bilay da.

⁵"Anggapoy toon inaro toy kuarta a nasintinsiaan ya anggapoy kasalanan to; inwanwan a mankasalanan na sagput ton onyaman.

⁶"Lapud kuarta dakel la ray totoon aderal, ta napipiarapan day desyang.

⁷"Sakey a patit so kuarta ed saray totoon maliket ed kuarta, sakey a patit a pakakaerelan na amin da ray totoon makulang-kulang.

⁸"Mapalar so toon onyayaman ya ag to pankakasalananay pangoosil tod kuarta.

⁹"Walay kabat mon toon ontan? No wala, pasamanoen tayoy malmalet lapud impakapanggawa toy milagro ya anggapo niy akagawa.

¹⁰No walay akalabas ed sayan subok, nayarian ton ikinon. Walay toon akabatan ton ag naerel ed panaol toy sakey a too, balet et ag to inanamut yan pankanawnawa to?

¹¹No wala, makanepegan so pangeegna toy kayamanan to, tan dayewen na balang sakey lapud inkabonluk to.

¹²No onyorung kan ondongo ed sakey a baleg a ponsia, ag mo papaolyan ya akasangi ka, tan ag mo ikukuan, Nengneng yoy karakel na kakanen,

¹³Mabanday so kagagawam no masibay matam; ag mo ya lilingwanan. Anggapoy arum a pinalsan lalon masiba nen say mata; sikato yay makasengeg a naynay a mamapaagos na lua.

¹⁴Ag mo gagawaten ya amiy bengatlan nanenengneng mo, tan ag mo sisikilen iray totoo diad pangalam na kakanen.

¹⁵Apiger moy kagagawam ed saray karongom ed lamisaan tan gawam ed sikaray labay mon gawaen dad sika.

¹⁶No alaen moy kakanen mo, akan mon singa sakey a too. Ag ka mantikap; anggapoy toon makaanos ed ontan a kagagawa.

¹⁷Maung a kagagawa so ononan nasumpal a mangan; mabanday so pampesepesel.

¹⁸No dakel iray totoon mipoponsia, ag mo pampipilalekay nasirbian ya onona.

¹⁹Say daiset a kakanen et dakel la ed sakay a toon maung so kagagawa to. Likud ed saya, ag ka aposaposan no onogip ka.

²⁰Saray totoon alabas so panangan da et onsasakit so eges da tan ag ira makaogip. No aliwan alabas so pangan mo, makaogip kay malet ed labi tan masakbay kan ombangon na marakep so liknaan mo.

²¹Balet no onsakit so eges mo lapud alabas ya impangan mo, arawi ka tan manota ka, et onmaung so liknaan mo.

²²Anak, no ondengel kad ibabagak tan onuren mo ra, onsabiy agew a pisalamatan mo ak lapud indengel tan impangonur mo. Ag mo lalabasen so antokaman a gawaen mo, et ag kan balut mansakit.

²³Panliliketan na saray a totoo so mabonluk a manasangkailid sikara, tan kanepegan toy idayew da.

²⁴Balet manriklamoy amin a totood baley nipaakar ed toon mampaponsian magimper ed isaklang ton kakanen, tan manepeg so panriklamo ra.

²⁵Ag mo sasalien a paneknekay inkalakim diad panamegley na karakel na nainom mon alak. Dakel iray aderal lapud alak.

²⁶Napatnagan so ogali na sakey a too no sikatoy misangsangan ya abuek, a singa say balatyang et nasubok no apapetang ya ambalbalanga, insan iteneb ed danum.

²⁷Nayarin mangiter ed sika na balon bilay so alak no aliwan alabas so iyinom mo. Antoy klasi na bilay no anggapoy alak? Apalsa so alak a mamaliket ed sikatayo.

²⁸No inomen mo ya aliwan alabas tan diad dugan panaon, itanduro toy ispiritum tan pagmaliwen to kan magayaga.

²⁹Balet no onimon ka no ampetang so olom tan nagugunigon ka sakit na olo tan kababaingan so iter tod sika.

³⁰Say abuek a makulang-kulang et ag to napokpokay sikaton dili tan napasakitan toy sikaton dili. Pakapoyen na kakainom to tan mainomay a kabilen na toon mamapasnuk.

³¹Ag mon balut pamapasnukan so too no oniinom kayon dua. Ag mo papasakitan so liknaan to no manliliket; aliwan panaon na pangibagam ed sikato na ag mo labay, odino paningil mod utang to.