Read Pangasinan SIRAC 33 Bible Online

SIRAC 33 - Pangasinan bible

SIRAC 33

¹"Anggapoy maoges ya onsabid toon tatakotan toy Katawan; anggaman a mabetbet so ondalan a kaatapan, dagoen na Katawan ya iyagel.

²"Aliwan masimpit so toon anggapoy kanay ganggan ed sikato, tan siopaman ya aliwan matwa nipaakar ed ganggan et singa baloton ipalig-palig na bagyo.

³"No makabat ka, sisiaen mo so Ganggan; narumog mon napanmatalkan a singa saray masagradon Urim.

⁴"Iparaan moy salitaen mo, et dengelen na saray totoo. Ikanam so naaralan mo kasakbayan kan mansalita.

⁵"Telek a telek a singa dalig na kariton so kanunotan na toon makulang-kulang.

⁶"Say kaaron anagasang a mansalita et kapara toy kabayod katakelan a manaringing anggan siopay onkabayod beneg to.

⁷"Akin et masanto ni ray arum ya agew nen saray arum, anggaman a namparan saksakey ya agew so onbubutay ya inagew-agew ed kapag taon?

⁸"Lapud indoma ra na Katawan diad impangibiig tod sikaran mablin agew tan pista.

⁹"Ginawa ton masanto tan manona iray arum ya agew tan ordinario iray arum.

¹⁰Dalin so nanlapwan na balang too, a singa si Adan nen saman.

¹¹Balet say Katawan, diad kakabatan to, ginawa to ran doma ya amin tan initdan to ra na nandoroman kimey.

¹²Binindisionan to ray arum; ginawa to ran apagalangan tan masanto, tan panaayamen to rad abay to. Insamba to ray arum; pinaabeba to ra tan inekal to ra ed kipapasen da.

¹³No panon a walad lima na gumagaway banga so damili a nayarian ton gawaen so labay to, ontan met a wala itayod lima na Manamalsa tayo tan nayarian ton gawaen so labay to.

¹⁴Kamaungan so kabalingling na kaogsan, bilay so kabalingling na patey, tan kasalanan so kabalingling na panangarod Katawan.

¹⁵Nudnunot moy nipaakar ed saya: ginawa na Katawan a sampaparis ya amin iray bengatla, say sakey kabalingling na sananey.

¹⁶No para siak, naonur ak ya onsabin mankimey, a singa oonla ed kaubasan a mantortor na bunga ya atilak na saray bumuborbor. Balet binindisionan ak na Katawan, et maung so asumpalay kimey ko, a singa bumuborbor a napnoy panagpespesay ubas to.

¹⁷Balet labay kon naamtaan yo ya ag ko ginawa ra yan amin a para siak labat, no ag ingen para siopaman a labay toy makaaral.

¹⁸Dengel yo ak, amin yon matalonggaring a pangulo! Amin yon pangulo na saray tipon, dengel yoy labay kon ibaga!

¹⁹Legan a mambibilay ka, ag mon balut aabuloyan a naoleyan ka na siopamananggan anak mon laki, asawam, agim a laki, odino kaarom. Ag mo iiter ed siopaman so kayaryan mo; nayarin mangoman so kanunotan mo, et babawien mo.

²⁰Legan a walay linawad laman mo, ag mo aabuloyan ya iwanwan na siopaman so bilay mo para sika.

²¹Magmaung nin akasaral ed sika iray anak mo nen say sika so akasaral ed sikara.

²²Nepeg a wala lawas ed pakaoley mo iray amin a gagawaen mo; ag mo aabuloyan a nadotakan na antokaman so ngaran mo.

²³Alagar moy kaonuran a bekta na bilay mo, no mampapanabos ka la, insan mo apagey kayaryan mo ed saray mananawir mo.

²⁴Say asno nepeg ya itdan na dayami tan say sakbaten to, tan nepeg a leweten. Say aripen nepeg ya itdan na kakanen tan kimey to, tan nepeg a peteken.

²⁵No pankimeyen moy aripen mo, napareen moy kanunotan mo. No ag mo itday gawaen to, anapen toy kawayangan.

²⁶Nayarian mon bistian tan pakoan so ayep, pian napaamo, tan nayarian mon pairapen ed bartolina so aripen.

²⁷Pankimey mo lan pankimey, tan ag mo pampapainawaen; nibangat labat a manggaway gunigon no anggapoy gawaen to.

²⁸Kimey so nakaukolan to. No ag to ka onuren, golunggolungan mo.

²⁹Balet ag mo papairapen a mapalalo so siopaman, tan ag kan balut manangibiig.

³⁰No walay aripen mo, gawam ed sikato so labay mo; sinaliw mo na kuartan bungay nanlingetan mo.

³¹Ipasen mon sakey ya agi; nakaukolan mo a singa pankaukolan mod sikan dili. No maoges so gawaen mod sikato, et ibatikan to ka, iner so laen mon pananapan ed sikato?