Read Pangasinan SIRAC 35 Bible Online

SIRAC 35 - Pangasinan bible

SIRAC 35

¹"Say Pangonur ed Ganggan et singa saray amayamay a bagat, bagat met yan para kareenan.

²"Say pangibales ed panangasi et singa bagat a trigo; say pangiter na bengatla ed saray mairapbilay et singa pangisaklang na bagat a pisasalamat.

³"Say iyarawi ed kasalanan.

⁴"Balet ag ka oonlad Timplo no anggapoy bagat mo.

⁵"Kakaukolan na Ganggan a mangawit kay bagat.

⁶"No mangibagat so sakey a matonung a too tan onterter ed altar so taba, onatagey ed Sankatageyan so ambalingit ya angub.

⁷"Awaten na Katawan iray bagat ya insaklang na toon matonung tan ag to ra lingwanan.

⁸"Igalang moy Katawan diad pangisaklang mod sikato na mabonluk iran bagat; ag ka maigot ed pangiter mod saray ononan naanim.

⁹"Panliketan moy pangiter mod balang rigalom, tan no bayaran moy kakaplom, gawam a magayaga.

¹⁰Mangiter kan mabonbonluk ed Sankatageyan onung na impangiter tod sika.

¹¹Mambabayar lawas so Katawan tan ooliten ton mamimpiga-piga.

¹²Balet ag mo sasalien a pasoksokan; ag ka manmamatalek ed saray bagat a nalad kasaolan. Ag to ra awaten. Matonung so Katawan tan aliwan manangibiig.

¹³Ag to kakalabanen iray mairap-bilay; no mampikasi so sakey a toon nanggawaay makapoy, ondengel so Katawan.

¹⁴No mampikasi ray olila tan saray bibiin balo, ag to pepetay layag tod sikara.

¹⁵Saray luan onteterter ed lupa na sakey a biin balo et oneeyag a mangaakusad samay toon amaermen ed sikato.

¹⁶Panlingkuran mon mabolbolus so Katawan, et awaten to ka; onsabid tawen iray pikakasim.

¹⁷Onlabas ed lorem so pikakasi na toon mapaabeba tan ontuloy ya anggad pakasabi tod Sankatageyan a Katawan; manayam diman imay pikakasi, anggad ebatan na Katawan diad pangimano ton nagawa so inkatonung tan nadusa iray nankasalanan.

¹⁸Masiglat ya onggalaw so Katawan. Anggapoy anos tod saray totoon maoges. Ombawi diad panamegley na panemek tod saray paganon totoo. Sigput ton paandipaten iray totoon anggapoy panangasi tan mapaatagey, tan deralen toy pakaoley da ray totoon maoges.

¹⁹Iter to so kanepegan na saray kanunotan tan kagagawan na balang too. Lapud panangasi na Katawan manliket iray totoo to no sintinsiaan toy kaso ra.

²⁰Diad panaon na gunigon, maliket a nanaawat so panangasi to, a singa say oran kayari na andokey a panaon ya anggapoy oran.