Read Pangasinan SIRAC 36 Bible Online

SIRAC 36 - Pangasinan bible

SIRAC 36

¹"O Katawan a Dios na sansinakuban, nengneng mo kami pa tan kasian mo kami.

²"Gawam pan ontakot ed sika so balang bansa.

³"Galaw ka pa sumpad saray arum a bansa, tan ipanengneng mod sikara so pakayarim!

⁴"Inkana mo kamid pangipanengneng mod sikara ya ontan lan inkasantom; ikanam pa ra natan a pangipanengneng mod sikami ya ontan lay inkatalonggaring mo.

⁵"Ipaaral mo pad sikara, a singa naaralan mi, ya anggapo lay arum a Dios, O Katawan, no ag say sika labat.

⁶"Mangiter ka pa na saray balon tanda, manggawa ka pa na saray balon milagro; ipanengneng mo pad sikami so mapagalang a pakayarim!

⁷"Ipasabim pa la may nigetar a panaon ya amin a totoo et nayarian dan salitaen iray ankakabaleg a bengatlan gagawaen mo. Ikalbom pa so mapalalo tan manliub a pasnuk mo, tan ag mo pa aabuloyan a walay nabilay a kalaban mi. Patey mo pa ray nampapairap ed saray totoom.

¹⁰Temek mo pan amin iray pangulo na saray kalaban ya abaloan dan sikara labat so totood intiron mundo!

¹¹Tipon mo pa lamet iray tribu na Israel, tan ipawil mo pad sikaray dalin da a singa samay impangiter mod sikara nen saman.

¹²Katawan, kasian mo pa so Israel, saray totoon nipapasen a kayaryan mo, a tatawagen mo a pangulowan ya anak a laki.

¹³Kasian mo pay Jerusalem, say masanton siudad mo, a dimay pinilim a panayaman mo.

¹⁴Panom pa so Timplom ed Palandey na Sion na kagalangan mo tan saray imno na dayew.

¹⁵Mantasi ka pan para saray totoom a pinalsam nen gapo; patwam pa ray propisiyan asalitad ngaran mo.

¹⁶Tumangan mo pa ray mananisiad sika, tan paneknekan mon napanmatalkan iray propitam.

¹⁷Mapangasi ka lawas ed saray totoom; dengel mo pay pikakasi mi ran aripen mo. Diad ontan, nabirbir na amin a totood sankamundoan a sika so Katawan, say Dios ed ando lan ando.

¹⁸Nayarin kanen so amin a kakanen, balet maung ni ray arum a kakanen nen saray arum.

¹⁹No napambiigan na dila iray taway na nandoroman karni, ontan met a naamtaan na matudyon kanunotan iray tila.

²⁰Panlalapwan na golo so toon pikewet so kanunotan to, balet amta na toon walay salsali tod bilay so ombales.

²¹Nepeg ya awaten na sakey a bii so siopaman a mangasawad sikato, balet nepeg ya apigeren na laki so pampili tod asawaen to.

²²Paliliketen na gangganay sakey a bii so sakey a laki; anggapoy lalon marakep a nengnengen na mata nen say gangganay bii.

²³No mapangasi tan mauyamo ed panagsalita so sakey a bii, sankapalaran ed saray lalaki so asawa to.

²⁴No mangasawa so sakey a laki, nagamuran toy sankaabigan a bengatla a nayarian ton nakayaryansakey ya asawan ontulong ed sikato tan mamabiskeg na linawa to.

²⁵No ag naalar so solar, onloob iray matatakew tan manala ray labay da. No anggapoy asawa so sakey a laki, akar-akar a maermen;

²⁶anggapoy panagmatalek na saray totoo ed sakey a lakin anggapoy abung ya ogip-ogip ed nandoroman pasen kapag labi a singa anggapoy panagmatalek dad sakey a matakew ya akar-akar ed nandoroman baley.