Read Pangasinan SIRAC 37 Bible Online

SIRAC 37 - Pangasinan bible

SIRAC 37

¹"Nayarin ibaga na siopaman a sikatoy kaarom, balet wala ray totoon kakaaro ed salita labat.

²"Singa patey so ermen ya iiter na impanbarungan na malet a sankaaro.

³"Walad sikatayo yan maoges a liknaan! Akin et wala ya? Panon ton pinano so mundo na panamalikdo?

⁴"Wala ray totoon mansiansian kakaarom labat no maung ya amiy nagagawa, balet sumpaen da ka no gunigon lay onsabi.

⁵"Say tuan kaaro tulongan to ka sumpad saray kalaban mo tan iyagel to ka no walay laban.

⁶"Ag mo lilingwanan itan a kaiba no bakal; pinabang mod saray agunggonad impanalo.

⁷"Nayarin mangiter na simbawa so balang too, balet wala ray manisimbawa a pankaabigan da labat so nununoten da.

⁸"Manalwar ka no walay manimbawad sika. Amtaen mo nin onona no akin et labay to kan simbawaan, ta andi-duaruwan manonan nununoten toy sikaton dili. Akin et sikatoy walad tapew, aliwan sika?

⁹"Ibaga tod sikan maung so nagagawa, insan bantayan toy nagagawad sika.

¹⁰Ag ka onkekerew na simbawa ed toon anggapoy talek tod sika, tan ag ka mangiiter na simbawa ed toon mangiimon ed sika.

¹¹Ag ka onkekerew na simbawa ed sakey a bii nipaakar ed kasamsam tod panangaro, ed sakey a matakot nipaakar ed bakal, ed sakey a nigosianti nipaakar ed bili na sasaliwen, ed sakey a a sumasaliw nipaakar ed panaglako, ed sakey a toon maigot nipaakar ed pisasalamat, ed sakey a toon maruksa nipaakar ed panangasi, ed sakey a toon mangiras nipaakar ed kimey, ed sakey a toon walay getar na pankimey to nipaakar ed panumpal na kimey, ed sakey ya aripen nipaakar ed mairap a kimey. Ag mo dedengelen so antokaman a simbawa ra.

¹²Ingen, saral ka ed sakey a toon rilihioso tan bibirbiren a mangoonur ed saray ganggan na Katawan, sakey a toon walay pililikna tod sika, tan maermen ed pakanengneng ton ag ka mampapalabo.

¹³Tan manmatalek kad dilin panagnunot mo; anggapoy lalon napanmatalkan a simbawa nen say dilin simbawam.

¹⁴No maminsan dakel ni so nibaga na dilin liknaan mo nen saray pitoran bantay a walad atagey a tori.

¹⁵Manonad amin, ipikasim ed Sankatageyan ya ipanengneng tod sika so nepeg mon gawaen.

¹⁶Walad beneg na amin a nagagawa so panagplano tan panagnunot.

¹⁷Apatiran bengatla so pibabalian na kanunotan: say maung tan say maoges, say bilay tan say patey. Onggagapo ran amin ed kanunotan, balet say dila so sigput a manoley da.

¹⁹Nayarin marunong a mambangat so sakey a too, balet nayarin ag ya onkanad sikato.

²⁰Nayarin maung so pananalita to, balet nabigut ed kaonuran lapud kabosul na saray totoo.

²¹Nayarin onyay nagawa no ag to ikakanay kalakal to, no say Katawan et ag to initdan na karunongan.

²²Nayarin ipasen na sakey a too so sikaton dili a makabat tan ipaamta tod sika ya anggapoy duaruwa to nipaakar ed saray amta to.

²³Siopamay peteg a makabat et magmaliw a bumabangat na saray totoo to, tan ag da napanduaruwaan a katwaan so ibangat to.

²⁴Satan a too idayew na amin a totoo tan salitaen da a mapalar.

²⁵Nabilang iray agew na bilay na too, balet ag nabilang iray agew na bilay na Israel.

²⁶Naala na makabat a too so panagmatalek na saray totoo to, tan nanunotan da ed anggad angga.

²⁷Anak, diad pambibilay mo, dangkaan moy panangan mo, tan ag mo kakanen so antokaman ya amtam a makapoy ed sika.

²⁸Aliwan amin a kakanen et nayari ed balang too, tan nandoroma so labay a kanen na balang too.

²⁹Ag mo ipapasen a nakaukolan mon kanen ya amin iray masasamit a kakanen, tan ag ka kapaakan ed dinanman a kakanen.

³⁰No alabas so pangan mo, mansakit ka, tan no labasen mon naynay, onsakit lawas so eges mo.

³¹Amayamay lay totoon inatey lapud inkasiba. Paliisan mo ya, et mambilay ka na andokey.