Read Pangasinan SIRAC 38 Bible Online

SIRAC 38 - Pangasinan bible

SIRAC 38

¹"Iter mod saray doktor so kanepegan dan kagalangan, ta say Katawan initdan to ra na kimey a gawaen da.

²"Nanlapud Sankatagayen so karunongan da, tan tutumangan ira na saray arari.

³"Say amta ra so mangiiter ed sikara na atagey a kipapasen, tan bibirbiren ira na saray makapanyarin totoo.

⁴"Pinalsa na Katawan iray tambal a manlalapud mundo, tan ag panduaruwaan na makalakal a too ya ikana ra.

⁵"Ag ta impagmaliw na sakey a kiew a nayarin inomen so ampait a danum, pian naamtaan so pakayari na Katawan?

⁶"Inter na Katawan ed saray totoo so pakatalus nipaakar ed tambal, pian dayewen tayo lapud saray milagron gagawaen to.

⁷"Panlalaukan na parmasintika ira yan tambal, insan ikana ran a doktor a panambal na sakit tan pamainomay na liliknaen. Anggapoy samput na saray kimey na Katawan, a sikatoy mangiiter na abig-laman da ray katoowan ed mundo.

⁹"Anak, no mansakit ka, ag mo ipapasen ya anggapoy sakit mo. Mampikasi ka ed Katawan, et paabigen to ka.

¹⁰Ipatwam ya amin iray kasalanan mo tan panggonaetan moy mambilay a matonung ed arapen a panaon.

¹¹Mangisaklang ka na insinso tan bagat a trigo, onung ed anggaay nayarian mo.

¹²Insan manawag ka na doktorta pinalsa na Katawantan panayam mo ed diking mo; sikatoy nakaukolan mo.

¹³Wala ray panaon a nepeg moy manmatalek ed karunongan to.

¹⁴Pikakasi na doktor a painomayen na Katawan so liliknaen na tatambalen to tan paabigen to la.

¹⁵Nipaakar ed toon mankakasalanan ed Manamalsa to, nepeg toy mansakit.

¹⁶Anak, no walay toon inatey, nepeg moy manermen. Akis tan ogaog ka a pangipanengneng moy ontan lan panliliknam na impakabalang. Iparaan mon manepenepeg so bangkay, tan mitolur ka.

¹⁷Akis kay ampaipait tan walay liknaan; manermen ka na manepeg ed niganan panaon. Manermen kan sanagew odino duara, pian ag ka tongtongen na saray totoo, balet pabiskeg moy linawam tan akom so impakabalang mo na inarod bilay.

¹⁸Nayarin pakapoyen na ermen so abig-laman mo; nayari ingen ya iwanwan to kad dilin patey mo.

¹⁹Ag ontaynan so ermen kayariy ipatey na sakey a toon inarod bilay, balet aliwan maung no iyakar to ka ed kairapan na bilay.

²⁰Ag mo pinonoyan a manariy ermen ed sikan dili; paandipat mo. Ag mo lilingwanan a walay panaon na ipatey tayon amin.

²¹Anggapoy polaing a pamapawil na toon inatey. Say ermen mo et anggapoy niiter tod sikato a kaabigan; papasakitan to ka ni ingen. Ag mo ya lilingwanan.

²²Ompatey ka met a singa samay inatey. Natan so liber ton ompatey; nabwas sika.

²³No nilira lan mampainawa iray inaatey, paandim lay pakanudnunotan ed sikara. No naandi la ra, pabiskeg moy linawam.

²⁴Nepeg a walay panaon a manaral so sakey a toon walay impanolo, pian magmaliw a makabat; nakaukolan a naandid sikatoy arum a kimey to.

²⁵Panon a naaruman so kakabatan na toon dumaralos, no pilalek to labat so mandagdag na saray baka tan mamakimey ed sikara, no nipaakar ed saray ayayep so amta to labat a tongtongen?

²⁶Pamsagputan ton mapalalo so pambaka toy maptek tan sasabien toy aralem-labi, pian napakan to ray ayayep.

²⁷Tua met ya ed toon marunong a managkitikit, a mankikimey ed agew tan labi diad pantatatak tod saray mabmablin bato, tan pannununot tod saray balon arti. Pansasagputan ton mapalalo so pakagawa toy imahin a singa toon mabilay, tan sasabien toy aralem-labi, pian nasumpal so kimey.

²⁸Tua met ya ed panday diad abay na pitpitan to, a nununoten to no antoy gawaen to ed sakey a poter na balatyang. Nasisinit so baog tod apoy tan manlilinget ed pandayan. Natetelek lapud tanul na maso legan ton iimanoen so pagmamaliwan na samay pipitpiten to. Pansasagputan ton mapalalo so pakasumpal tod kimey to, tan sasabien toy aralem-labi, pian ayadyari so kimey to.

²⁹Tua met ya ed toon gumagaway banga, ya onyoyorung ed panagkimeyan to tan ipapatelek na saray sali to so dalig, a lawas ton iyaapasakey so kanunotan to ed kimey to, tan nununoten to no pigaray nagawaan ton banga.

³⁰Dadamilien na saray sali to so pitek, anggad nayarin molien la na saray dilin lima to; insan pansasagputan ton mapalalo so pakapasileng toy balibali, tan sasabien toy aralem-labi, pian nalinisan toy palbaan.

³¹Amin da ra yan totoo et maung a mankimey so lima ra; balang sakey ed sikara et marunong ed dilin kimey to.

³²No anggapo ra yan totoo, anggapo ray siudad; anggapoy toon mambilay odino mambisita ed pasen ya anggapo ra yan kimey.

³³Sarayan totoo ag ira nakaukolan ed saray konsiho na karaklan, tan ag ira makabebemben na atagey iran betang. Ag ira magmamaliw a huis, tan ag da natatalusan iray bengatlan nipaakar ed ley. Anggapoy aral da tan ag ira bibirbiren lapud kakabatan da. Ag iran balut narerengel a mangibibitla na saray probirbio.

³⁴Balet say kimey da so mangikukurang na sankamundoan. No gagawaen da so kimey da, mipara ed pangyaapay na pikakasi.