Read Pangasinan SIRAC 39 Bible Online

SIRAC 39 - Pangasinan bible

SIRAC 39

¹"Balet doma so toon iyaapasakey toy sikaton dili ed panaaral na Ganggan na Sankatageyan. Aaralen to so kakabatan da ray amin a sumusulat nen saman a panaon tan sosokimaten toy nipaakar ed saray propisiya.

²"Ipapatlep to ray balikas na saray bantug a lalaki, tan marunong ed panangipatalus na saray alimbawa.

³"Aaralen toy niamut a kabaliksan na saray probirbio tan nayarian toy misangsangan nipaakar ed saray ag amtan talus na saray alimbawa.

⁴"Kekerewen na saray matalonggaring a totoo so panaglingkur to, tan sikatoy nanenengneng a kaiba to ray manoley. Oonla ed saray arum a bansa diad pilalek ton mangamta na nipaakar ed kamaungan tan say kaogsan na too.

⁵"Ogali to so ombangon a masakbay tan mampikasi na maksil ed Katawan a Manamalsa to; kekerewen tod Sankatageyan a napirdona ray kasalanan to.

⁶"Insan no maabuloy so matalonggaring a Katawan, sikatoy napano na pakatalus. Pantotombukan ton ibagay balikas na kakabatan, tan mangiter na pisasalamat ed Katawan diad pampikasi to.

⁷"Nawalaan na pakatalus ya inagnag to tan maung a simbawa ya iter to, tan say pakaamtad saray iyaamut na Katawan.

⁸"Ipanengneng toy aral to diad pambabangat to, tan ikinon to so Ganggan na Katawan tan say sipanan to.

⁹"Nadayew na amayamay a totoo lapud kakabatan to, tan ag ton balut nabalang yan kakabatan to, ta sikatoy ag nalingwanan na saray totood arapen a kailalakan.

¹⁰Tongtongen na saray Hintil so nipaakar ed kakabatan to, tan maksil so pakaidayew ed sikato diad tipon da ray totoo.

¹¹No andokey so bilay to, ompatey a bantug, balet no nipompon kasakbayan ya ombantug, napenek la.

¹²Singa say bulan, napno aknapno na arum ni ran kanunotan a sasangsangen.

¹³Dengel yo ak, sikayon matoor ya anak kon lalaki, tan manrosas kayon singa ros ed abay na kolus.

¹⁴Manrosas kayon singa lirio, tan ibuyak yoy balingit yo a singa insinso ed dagem. Kantaan yoy dayew so Katawan, tan pisalamatan yo lapud amin a ginagawa to.

¹⁵Ibawag yo so kagalangan to a katekep na dayew na pisasalamat! Legan a totogtogen so arpa, kanta yo yan kansion:

¹⁶Maumaung ya amin iray ginagawa na Katawan; magano la odino mabayag ni, nagawan amin iray igaganggan na Katawan.

¹⁷Anggapoy nepeg a manepet na nipaakar ed kipapasen na saray bengatla; naebatan ira yan tepet diad dugan panaon. Nagganggan, et binmunton so danum; Inmalagey iray baleg a padir na danum nen nansalita.

¹⁸Tampol a nagawa so antokaman ya igaganggan to; anggapoy anggaan na pakayari ton mangilaban.

¹⁹Sankanengneng toy amin a gagawaen na amin a totoo; anggapoy polaing a pakaamut ed pakanengneng to.

²⁰Sankanengneng toy amin a panaon, manlapud gapo ya anggad samput, tan anggapoy makabigla ed sikato.

²¹Anggapoy nepeg a manepet na nipaakar ed kipapasen na saray bengatla; walay getma na balang bengatlan pinalsa.

²²Saray bindision to manlepwas a singa Ilog na Nilo, a pabobonaen toy mundo diad panamegley na mataban delap.

²³Pagmamaliwen ton maasin so masamit a danum, tan iteterak tod saray bansa so pasnuk to.

²⁴Para saray totoon walay takot ed Katawan, para saray totoon maoges, apatitan ira.

²⁵Manlapud gapo ginawa to ray maung a bengatla para saray totoon maung, tan makapasinagem a bengatla para saray makasalanan.

²⁶Saray manonan nakaukolan ed panagbilay et saraya: danum, apoy, balatyang, tan asin, arina, dilo, tan gatas, alak, kawes, tan larak.

²⁷Maung ira yan amin para saray walay takot ed Katawan, balet magmamaliw iran maoges para saray makasalanan.

²⁸Wala ray dagem a pinalsan mangiter na dusa, a diad kinabiskeg da et yegyegen da ray kapalandeyan. No panaon na panagsintinsia, ibolus day biskeg da tan pakepaen day pasnuk na manamalsa ra.

²⁹Saray ayayep ed katakelan, saray alakdan, tan saray oleg; say ispadan mamatey ed saray totoon maoges; pool, oran a kristal, eras, tan salot; apalsan panusa ira yan amin.

³⁰Maliket iran mangonur ed ganggan na Katawan tan akaparaan iran manlingkur ed sikato diad tapew na dalin. No onsabiy oras dan manlingkur, ag iran balut onsusunggay. (

³²Abayag ak lan manisia ed saya, kanyan kayarik a minotektek, insulat ko.)

³³Maung ya amin so ginawa na Katawan; iiter toy amin a nakaukolan no manepeg a panaon.

³⁴Anggapoy makapangibagan makapoy ni ray arum a bengatla nen saray arum, ta maung so balang sakey a pinalsa ed kanepegan ton pasen.

³⁵Natan sirin, mankanta kayo ed intiron puso yo na saray dayew, tan idayew yo so ngaran na Katawan!