Read Pangasinan SIRAC 4 Bible Online

SIRAC 4 - Pangasinan bible

SIRAC 4

¹"Anak, ag mo sesebelan iray mairap-bilay ed pakalmoan da, odino panalagaren irad pankaukolan da.

²"Ag ka manggagaway antokaman a makasengeg na isumlang odino pamasnukan na toon narasan.

³"Ag mo aaruman iray gunigon na toon naandian lay ilalo. No sikatoy walad pankaukolan, ag mo isisiblet so pakatulong mod sikato.

⁴"Ag mo isisiblet so pakatulong mod mipapayabol a mapalaloy kakairapan to. Ag mo ibebeneg so toon mairap-bilay odino itdan moy makasengeg na pangisambaan tod sika.

⁶"No mapalaloy pakapasnuk tod sika tan isamba to ka, dengelen na Manamalsa so pikakasi to.

⁷"Pagmaliw moy sikan dili a bantug ed sinagoga. Tuek ka ed saray totoon walad pakaoley.

⁸"Dengel kad labay a salitaen na saray mairap-bilay, tan ebatan mo ra na marakep.

⁹"Iyagel mo ray totoo ed saray malabay a manggaway makapoy ed sikara, tan nepeg a malet so panagsintinsiam.

¹⁰Magmaliw kan singa ama ed saray olila, tan itdan mo na tulong iray balo, say tulong ya ag la niiter ed sikara na saray kaasawaan da. Diad ontan magmaliw kan singa sakey a lakin anak na Sankatageyan, tan aroen to ka ya alabas nen say pangaaro na dilin inam.

¹¹Aasikasoen na Kakabatan iray manaanap ed sikato; pagmamaliwen to ran matalonggaring.

¹²Say pangarod Kakabatan et pangarod bilay, tuan liket so ibangon a masakbay a pananap ed Kakabatan.

¹³Napagalangan na baleg so siopaman a makagamur na Kakabatan. Inermay laen to, bindisionan na Dios.

¹⁴Aripen na samay Masanto iray aripen na Kakabatan, tan inaro na Katawan so balang sakey ya inaro toy Kakabatan.

¹⁵Mangiter na saray dugan sintinsia iray mangoonur ed Kakabatan; peteg ya arawid kaatapan iray mangiimano ed Kakabatan.

¹⁶Manmatalek kad Kakabatan, et nakayaryan mo tan nipatawir mod saray kabyangay boleg mo.

¹⁷Diad onona, iwanwan ka na Kakabatan ed saray mairap a dalan. Taktakoten to ka na mapalalo, et abaloan mo ya ag mo nayariay ontuloy. Mapalalon sulit na kairapan so kakaukolan na panametek na Kakabatan, tan suboken to ka na saray labay ton pagawa ya anggad sigput to ka lan napanmatalkan.

¹⁸Insan ag manabalan onsingger ed sika, ipaamta to ray iyaamut to, tan paliketen to ka.

¹⁹No onarawi ka ed dalan, ikaindan to ka tan paolyan to ka ed dilin kaderalan mo.

²⁰Anamut mo ray pankanawnawam, balet alwaran moy sikan dili sumpad kaogsan. Ag mo memelagmelagen so sikan dili.

²¹Kanepegan na panagpaabeba so galang tan tanduro, balet say abeba a panangipasen mod sikan dili et iwanwan to ka ed kasalanan.

²²Ag mo aabuloyan a nagawad sika so labay na saray arum a totoo no pakaderalan mo; ag mo dederaley sikan dili diad panamegley na pangisukom na saray kanepegan mo.

²³Ag mo panduaduaruwaan so mansalita no nakaukolan. Ag mo iyaamut so kakabatan mo.

²⁴Nakabatan labat so kakabatan tan aral mo diad panamegley na ibabagam.

²⁵Balet ag ka onsusumlang ed katwaan, tan ag mo lilingwanan ya ag mo amtay amin a bengatla.

²⁶Ag ka ombabaing a mangipatwa na saray kasalanan mo; anggapoy kakanaan na pamaer na iyaagos na ilog.

²⁷Ag mo aabuloyan a naoleyan ka na toon makulang-kulang odino kilingan mo ray totoon bibirbiren.

²⁸Talindegan mo so kaptaken, anggan makasengeg na pateyan mo; migampi so Katawan a Dios ed sika.

²⁹Ag ka magangganat a mansalita odino onngingiras tan mapaolyan ed kimey mo.

³⁰Ag ka singa lion ed abung odino mainap ed saray aripen mo.

³¹Ag mo iyoonat so limam a mangala na bengatla no matiwer ka no onsabiy panaon a pambayar mo.