Read Pangasinan SIRAC 40 Bible Online

SIRAC 40 - Pangasinan bible

SIRAC 40

¹"Dakel a kimey so niiter ed balang sakey a too. Ambelat so nipapasakbat ed balang sakey ed sikatayo manlapud agew na inkianak tayo ya anggad agew na ipawil tayod dalin, say ina tayon amin.

²"Nagogoloy isip tayo tan mapagpaga tayo, tan natatakot itayod agew na ipatey tayo

³"amin tayo manlapud arin walad marakep a trono to ya akasolung na kawes na ari tan akakorona, ya anggad sankamugmoan a toon akakawes na sako tan mambibilay ed kairapan.

⁵"Diad intiron bilay tayo onsasabid sikatayoy pasnuk, imon, tan gunigon. Gugunigonen itayo na saray bengatla; mambibilay itayo a manggogotgotan iray nunot tayo tan walay takot tayod patey. Anggan no onla tayod dokulan, onsasabi ray balon gunigon ed ogip tayo.

⁶"Magangganoy pakapainawa tayo, no wala bilang. No onogip itayo, singa itayo abangon, ta gogoloen itayo na saray kanunotan tayo. No kokogipen tayo ya ibabatikan tayoy kalaban,

⁷"et ngalngali itayo la naerel, nabangon itayo tan makainawa tayo diad pakaamta tayon anggapo manayay nepeg a takotan.

⁸"Nia ray nepeg a piarapan na amin a pinalsa, totoo man odino ayayep (balet mamimpitoy kinaoges para saray makasalanan):

⁹"patey, panagduksa, kolkol, panagpatey, desyang, eras, sakit, salot.

¹⁰Apalsa ra yan amin lapud saray totoon maoges; sikaray nanlapwan na deral.

¹¹Amin a manlalapud dalin ompapawil ed dalin, a singa amin a danum et onaagos ed dayat.

¹²Ag mansiansiay bengatlan manlalapud pasoksok odino panagpikewet na katonungan, balet mansiansia so tumang na inkatoor.

¹³Say kayamanan a nalad kasaolan et singa kelas a mapmaples ya onaagos no walay bagyo tan oran,

¹⁴tan iyaanur to ray baton-dampay no onaagos, insan balet biglan namagaan.

¹⁵Aliwan baleg iran pamilya so itilak na saray anak na totoon maoges; singa ra saray tanaman ya ibobotbot day lamut da ed baton-dampay;

¹⁶singa ra tanobung ed gilig na ilog, a nalelenes iran onona nen saray arum a tanaman.

¹⁷Saray gawgawa lapud panangasi tan panangaro et mansiansia ran anggad angga.

¹⁸Say inkayaman odino say anapan et makapagayagad bilay, balet magmaung niy makakotkot na kayamanan.

¹⁹Ag nalingwanan so ngaran na sakey a too no wala ray anak to odino no mangipaalagey na sakey a siudad, balet magmaung nin polaing so pakalmo na Kakabatan. Magmaliw kan bantug no wala ray ayayep tan saray tanaman mo, balet magmaung niy walay asawan inarom.

²⁰Napagmaliw kan maliket na alak tan musika, balet magmaung niy maliket a panamaley.

²¹Marakep a musika so nagawaan na saray plauta tan saray arpa, balet magmaung ni so maung a bosis.

²²Say marakey a kagagalaw tan ganggana et makapaliket ed mata, balet ag da naparaan so liket ya iiter na balon tubo no kasumpal na nepnep.

²³Anggapoy makapoy a nasagmak mo no kaibam so maung a kaaro odino kaabay, balet magmaung ni nen saraya so maotek ya asawan bii.

²⁴Maung so wala ray agagin lalaki tan saray katulong no panaon na gunigon, balet dakel ni so nitulong na kagagawan mangiter ed saray mairap-bilay.

²⁵Makapangyarawid kaatapan so balituk tan pilak, balet magmaung ni so maung a simbawa.

²⁶Makapangiter na talek so kayamanan tan biskeg, balet baleg nin talek so niiter na takot ed Katawan. Anggapo lay arum a nakaukolan mo no tatakotan moy Katawan; saya labat so nakaukolan mon tulong.

²⁷Say takot ed Katawan et singa sakey a mabonan tanamanan na saray bindision; ag mo la nakaukolan so arum nin mapagalang a panayaman.

²⁸Anak, ag ka mambibilay a sakey a mipapayabol; magmaung niy ompatey nen say mipayabol.

²⁹No nepeg mon kerewen ed arum a too so pambilay mo, ag ka mambibilay na sikan dili. Dodotakan moy sikan dili diad pangawat mod arum a totoo na kakanen. Say pipapayabol et panamairap ed kamarerwa na sakey a toon walay kalakal.

³⁰Nayarian ya ibaga na toon anggapoy baing a marakep so pipapayabol, balet singa walay ompopool ed dalem na laman to.