Read Pangasinan SIRAC 41 Bible Online

SIRAC 41 - Pangasinan bible

SIRAC 41

¹"Patey! Say pakanunot labat ed ipapatey et ampait ed toon maaligwas, mambibilay a mareen ed pegley da ray kayaryan to, anggapoy kapagaan to, tan masamit ni so panangan to.

²"Patey! Say sintinsia to maliket ya aawaten na toon mairap so bilay to, onkakapoy so laman to, mataktakken, ambelat iray gunigon to, bulag, tan anggapoy ilalo.

³"Ag ka ontatakot ed sintinsia na patey. Ag mo lilingwanan a sinmabid saray totoon akaona nen sika tan onsabid saray totoon ontombuk ed sika.

⁴"Impaakseb ya na Katawan para amin a pinalsan mabilay. Siopa ka ya onsumlang ed labay na Sankatageyan? Diad pasen a panaayaman da ray inaatey, anggapoy wala ed siopaman no nambilay ka na samploy taon, sanlasus, odino sanlibo.

⁵"Saray anak da ray makasalanan ya ombabaleg irad pasen ya anggapoy dios et ompaway iran kabosubosul a totoo.

⁶"Nabalang day antokaman a tawiren da, tan mansiansiad kababaingan iray dilin anak da.

⁷"Tetelen na saray anak iray atateng da, lapud inkaplag dad kababaingan.

⁸"Pakaskasi kayo, sikayon anggapoy takot ed Dios ya inkaindan yoy Ganggan na Sankatageyan a Dios.

⁹"No wala ray anak yo, ondalan ed sikaray desyang, et ermen labat so natilak ed sikayo. No natumba kayo walay baleg a gayaga, tan nisamba kayo anggan inatey kayo la.

¹⁰Say manlapud anggapo et ompawil ed anggapo; ontan met so nagawa ed saray totoon anggapoy Dios, ta asintinsiaan iran naandipat.

¹¹Anggapoy kakanaan na laman na too, balet mansiansia ya anggad angga so maung a ngaran.

¹²Iyagel moy maung a ngaran mo; andokey ni nen say bilay mo tan mabayag niy pansiansia to nen say sanlibon kayamanan a balituk.

¹³Mansamput so maung a panagbilay, balet mansiansia ya anggad angga so maung a ngaran.

¹⁴Sikayo ran anak ko, sumpal yo so ibabangat ko tan mambilay kayon mareen. Say kakabatan ya ag nikakana et singa kayamanan ya inyamutanggapoy kakanaan dan dua.

¹⁵Maung ni so toon sasakuban toy inkakulang-kulang to nen say toon ag to ikakanay kakabatan to.

¹⁶Sikayo ran anak ko, dengel kayo, ta ibagak ed sikayo no kapigan so manepeg ya ombaing kayo. No maminsan aliwan manepeg so ombaing.

¹⁷Diad arap na saray atateng yo, ibaing yoy panggawa na immoralidad Diad arap na manoley odino sakey a toon atagey so kipapasen to, ibaing yoy pantila.

¹⁸Diad arap na huis, ibaing moy panggaway krimin. Diad arap na tipon da ray totoo, ibaing moy panumlang ed ganggan. Diad arap na sakey a kaaro odino kaiba, ibaing moy pansaol.

¹⁹Diad arap na saray kaabay yo, ibaing yoy pantakew. Ibaing yoy ag panumpal na sipan, pantalimeg na siko ed lamisaan a pananganan, pansiblet no kekerewan kayo

²⁰ag pangibano no nibano kayo, panmolagat ed sakey a marotak a bii,

²¹ag pangiter na kekerewen na sakey a kanayon, ag pangiter na kanepegan na sakey a too, panmolagat ed asawa na sakey a laki,

²²panggusto ed aripen a bii (arawi kad dokulan to!) pamabaing ed saray kakaaro, pamatombuk na balaw ed saray rigalo,

²³pangibawag ed saray iyaamut. Sikara yay panaon a nepeg moy ombaing, et pagalangan ka na saray totoo lapud ibaing mo.