Read Pangasinan SIRAC 42 Bible Online

SIRAC 42 - Pangasinan bible

SIRAC 42

¹"Nayari met balet a mankasalanan ka no alabas so pamalugar mod saray totoo. Sikara yay bengatlan ag mo nepeg ya ibaing:

²"say Ganggan na Sankatageyan tan say sipanan to, maptek a panintinsia ed ganggan saray totoon anggapoy Dios,

³"pinalpag na gastos ed kaibad nigosio odino kaibad biahi, panginagnag na tawir,

⁴"pangikanay ag masaol a simbangan tan sukatan,

⁵"panubo na dakel odino daiset, pitawalan ed nigosianti, pametek lawas ed saray anak, panlewet ed aliwan matoor ya aripen anggad onagos so dala to.

⁶"Maung a talakan iray bengatla no ag mo napanmatalkan so asawam, odino no amayamay a tuloy iray totood kaliber-liber.

⁷"Ilistam a duga-ruga iray amin ya ididipositom, tan amin ya iiter odino aawaten mo.

⁸"Ag mo panduaduaruwaan a peteken so siopaman ya anggapoy kalakal, odino say sakey a masiken a miolupolup ed saray marotak a bibii. Makanakana ray yan amin a simbawa, et no tombuken mo ra, abubonan na amin a totoo so kagagawam.

⁹"Anggaman ya ag to ipaamtad anak ton bii, say ama ag makaogip diad pampapaga tod anak to. No ogaw ni so anak ton bii, mapaga ta ompan ag naasawa. No naasawa la, mapaga to ompan aliwan maliket.

¹⁰No sakey a birhin, mapaga ta ompan natanggoyur a miakdul, et manlokun ya anggapoy asawa to. No wala lay asawa to, mapaga ta ompan magmaliw ya aliwan matoor ed asawa to, odino ag makaanak.

¹¹Bantayan mon maung so anak mon bii no ipasoot toy labay to. No ag mo ya gawaen, nayarin ipelag to kad kababaingan ed arap na saray kalaban mo. Ludlureyen kad satan na amin a totood baley, ta makababaing kad karaklan. Ag mo aabuloyan a walay bintanad kuarto to odino walay pakanengnengan tod lolooban na abung.

¹²Ag mo aabuloyan ya ipanpanta tod arap na saray lalaki so ganggana to, odino mitongtong lawas ed saray bibii.

¹³Dederalen na saray bibii iray arum a bibii, a singa pandederal na boot ed saray kawes.

¹⁴Magmaung ni so kaogsan na laki nen say kamaungan na bii; mangiiter na kababaingan tan kabandayan iray bibii.

¹⁵Ipanunot ko natan ed sikayo iray kimey na Katawan tan ibalikas ko ray bengatlan anengneng ko. Saray salita na Katawan so amawala na saray kimey to, tan oonuren na amin a pinalsa iray ganggan to.

¹⁶Onwawandag ed amin a bengatla so liwawa na agew, tan napno na kagalangan na Katawan so amin a bengatla.

¹⁷Ag initdan na Katawan na pakayari iray anggan masanton anghil to a mangisalay na amin da ray makapanyarin gawgawa to, anggaman ya initdan to ray pakayari ya ag naanon manalagey ed mapagalang ya arap to.

¹⁸Nanenengneng toy kaaraleman na saray dayat tan puso na too, tan amta to ray iyaamut dan dua. Amta na Sankatageyan iray amin a nayarin amtaen tan natatalusan to ray tanda na panaon.

¹⁹Amta ton amin iray agawa nen saman tan saray nagawad arapen a panaon; nasosokayan to ray sankaaraleman a mistirio.

²⁰Nanaimano ton amin iray nununoten tayo tan narerengel toy balang salita tayo.

²¹Ipapanengneng na oksuy na mundo so inkatalonggaring na kakabatan to; ag mangooman tan ag mangoman ed ando lan ando. Anggapoy bengatlan nayarin iyarum ed sikato, tan anggapoy nayarin ekalen ed sikato; ag to nakakaukolay siopaman a mangiter ed sikato na simbawa.

²²Marakep ya amin iray gawgawa to, anggan saray sankamelagan tan say sankakuyepan a talagsik na apoy,

²³Anggad anggan mansiansia ya amin iray bengatla, tan walay getma na inkapalsa ran amin.

²⁴Nampaparis ya amin iray bengatla; balang sakey walay kasoni to, balet anggapoy aliwan ayadyari a ginawa na Katawan.

²⁵Balang sakey a bengatla pagmamaliwen ton ayadyari so kaabigan na arum a bengatla. Onggenap kasiy pakanengneng na siopaman ed sayan ontan lan karakpan?