Read Pangasinan SIRAC 43 Bible Online

SIRAC 43 - Pangasinan bible

SIRAC 43

¹"Agalay dakep na maliwawa, malinew a tawen ed tagey tayo! Agaylay abig a nengnengen!

²"Say agew no ompanengneng ibabawag to, legan ton ompapaway, so ontan lan makapakelaw a kipapasen ton ginawa na Sankatageyan.

³"No kaagwan pamamagaen toy dalin; anggapoy toon makatepel ed ontan lan petang to.

⁴"Say onseselek ya agew paparlangan to ray toktok na kapokdulan, a singa palbaan na mital a manliub ed petang. Ibubuyak toy mandarlang a rayos; makalaram ed mata lapud liwawa to.

⁵"Matalonggaring so Katawan a nanggawad agew; diad panangiganggan na Katawan, magangganat ya oonlad laen to.

⁶"Wala met so bulan, a manatanda na ilalabas na panaon, sakey ya andi-anggaan a tanda na panagsalat na saray panaon.

⁷"Igegetar na bulan iray masanton agew. Onliliwawan maung so silew to, insan onkukuyep.

⁸"Say bulan et ningaran onung ed bulan, a makapakelaw a bantayan legan ya ombabaleg kapag labi, sakey a silew a sinyal para saray mangatatawen a sondalo, ya onsisinag irad tagey na tawen.

⁹"Saray onsisinag a bitewen pagmamaliwen dan marakep so tawen; masmasnag iran arkos ed atagey a katawenan na Katawan.

¹⁰Manaayam irad angipasenan ed sikara na samay Masanto tan ag dan balut lolokakay pambabantay da.

¹¹Nengneng yoy bonlalakaw tan idayew yoy Manamalsa to! Agaylay dakep na liwawa to!

¹²Singa panan pininat na saray lima na Sankatageyan, a lalaknaban toy liwang diad sakey a limpek na kagalangan.

¹³Mangganggan so Sankatageyan, et onggapon napelag so yilo; onlalaris so kirmat a manumpal na saray sintinsia to.

¹⁴Nilokas iray kuarton panagsinupan ed tawen, tan ompapaway a singa saray mantitikyab a manok iray lorem.

¹⁵Lapud pakayari to gagawaen to ray makapal a lorem tan mimisimisiyen ton oran a kristal so yilo.

¹⁶Mansasalita, et yeyesyesen na karul so mundo; nayayakayak na pakayari to iray kapalandeyan. Kapag labay to, onsisiplug so dagem a manlalapud abalaten, onsasabi ray alimbusabos tan saray bagyo a manlalapud baybay. Ipepelag ton singa saray manok ya onleleksab so yilo, singa saray dorun ya ondadapod dalin.

¹⁸Mankelaw tayod dakep na inkapoti to, tan diad pankelaw tayo bambantayan tayon napepelag.

¹⁹Iwawalsik ton singa asin so linaew, tan magmamaliw a masabit iran rosas na yilo.

²⁰Pasisiplugen toy ambetel a dagem a manlalapud baybay, et onkikigtel tan magmamaliw a yilo so danum; onkikigtel so balang ilog tan kolus, tan nakokobutan ira na yilon kawes a para bakal.

²¹Sisiniten to ray kapokdulan ed kalawakan diad ag to pangipelag na oran, et onmamaga ray karikaan lapud petang;

²²balet ompawil so bilay dan amin lapud malalorem a kelpa legan ya ombebetel so panaon tan onleletaw so linaew.

²³Lapud kakabatan to pinareen to ray dayat tan impasen tod man iray isla.

²⁴Isasalaysay na saray mariniro iray kaatapan ed dayat, tan mankelaw tayon onderengel ed ibabaga ra.

²⁵Doma tan makapakelaw a pinalsa iray walad dalem na dayat: saray ankakabaleg a dragon tan amin a klasiy mabilay a pinalsa.

²⁶Mampapalabo ed kimey to so balang sakey ya imbaki na Katawan. Mankakasakey ya amin iray bengatla lapud salita to.

²⁷Dakel niy nibaga tayo tan ag tayon balut nasumpal, balet onyay labay dan ibagan amin: say Katawan et amin a bengatla.

²⁸Panoy pakalmo tayo na pakayarin mangidayew ed sikato? Matalonggaring ni nen amin da ray pinalsa to.

²⁹Makapataktakot lapud inkatalonggaring to; ontan lay kabaleg na pakayari to.

³⁰Anggan gawaen moy anggaay nayarian mon mangidayew ed sikato, matalonggaring ni nen say nayarian mon ibalikas. Anggan ak ka onsasawa tan iyooput moy biskeg mon mangigalang ed sikato, siansian kulang so pangidadayew mod sikato.

³¹Anggapoy toon akanengneng ed sikato, anggapoy makapangibagay nipaakar ed sikato; anggapoy makapangiter ed sikato na kanepegan ton dayew.

³²Ag ni amta ray mistirion ankabaleg mi nen saraya; dagdaiset so amta tayo ed saray kimey to.

³³Ginawa na Katawan so sansinakuban, insan to inter so kakabatan ed saray totoon walay takot ed Katawan.