Read Pangasinan SIRAC 44 Bible Online

SIRAC 44 - Pangasinan bible

SIRAC 44

¹"Kanyan natan, mangiter tayoy dayew ed saray totoon masanto, saray lalaki tayod linmabas iran kailalakan,

²"saray totoon inikdan day Katawan na baleg a kagalangan, a diad sikaray akanengnengan na inkatalonggaring na Katawan manlapud gapo na panaon.

³"Wala ray manoley na saray nanarian, tan wala ray bibirbiren lapud biskeg da. Wala ray makabat a sumisimbawa, tan wala ray nansalita na saray propisiya.

⁴"Wala ray manoley a saray paakseb da so angiwanwan ed saray totoo, saray manoley ya angipaakseb na saray ganggan, saray totoon maotek ya angibalikas na saray salitan napnoy kakabatan, tan saray angikanay aralem a probirbio,

⁵"saray gumagaway anlong, tan saray gumagaway musika,

⁶"saray mayaman tan makapanyarin totoon nambibilay a mareen ed kaabungan da.

⁷"Bantug ya amin ira yan totoo ed dilin panaon da, tan pinagalangan ira na saray totoo ed agew da.

⁸"Wala ray totoon angitilak na maung a ngaran, et idadayew ni ran anggad natan na saray totoo.

⁹"Wala ray arum a totoon ag la ra nanununotan, a singa ag iran balut nambilay; inaatey ira tan alingwanan ira, sikara tan saray anak dan sinmalat ed sikara.

¹⁰Balet idayew tayo ra yan masanton totoo, ya ag balut alingwanan iray matonung a ginagawa ra.

¹¹Niiter ed saray anak da so kagalangan da, tan sikato yay tawir da.

¹²Itutuloy na saray kabyangay boleg da a sumpalen so sipanan tan ag da tondaan, lapud sikato yay ginawa na saray lalaki ra.

¹³Mansiansia ya anggad angga so kiwawala na pamilya ra, tan ag balut onkupas so inkabantug da.

¹⁴Mampapainawa la iray bangkay da, balet mansiansian mabilay so kagalangan da.

¹⁵Salitaen na saray bansa so nipaakar ed kakabatan na sarayan totoo, tan idayew ira na saray totoo na Dios.

¹⁶Pinaliket nen Enoc so Katawan tan niakar ed tawen. Nagmaliw a pangaligan ed pagbabawi para amin a panaon ya onsabi.

¹⁷Ayadyariy inkatonung nen Noe. Kayari na insabiy deral, sikatoy angigapo na balon kailalakan na katoowan. Lapud sikato, wala ray toton atilak ed mundo kayari na delap.

¹⁸Andi-anggaan ya akisipanan ed sikato so Katawan, tan insipan na Katawan a say bilay et ag lan balut deralen na delap.

¹⁹Matalonggaring ya ama na amayamay a bansa si Abraham; anggapoy pakabalawan ed inkatoo to.

²⁰Inonur toy Ganggan na Sankatageyan tan akisipanan ed sikato, sakey a sipanan a nitanda ed laman to. Nen sikatoy asubok, nalmoan a matoor.

²¹Kanyan sinambaan ed sikato na Katawan a magmaliw a bindision ed mundo iray kabyangay boleg to; a magmaliw ya ag nabilang so karakel da, a singa dabuk ed dalin; a sikaray napagalangan a mapalalo nen saray arum a totoo ed tapew na dalin; tan onlaknab so dalin da manlapud sakey a dayat ya anggad sananey a dayat, manlapud Eufrates ya anggad saray samput na dalin.

²²Pinasimbalo na Katawan ed kinen Isaac iman a sipanan, insan dia lamet ed kinen Jacob; inolit toy sipanan a magmaliw a bindision ed amin a katoowan iray kabyangay boleg nen Abraham. Impasiguro na Katawan a bindisionan toy Jacob; initdan toy dalin a nakayaryan to, a pankalabinduaen ton parti, sakey so para kapag tribu.