Read Pangasinan SIRAC 47 Bible Online

SIRAC 47 - Pangasinan bible

SIRAC 47

¹"Kayari nen Samuel sinmabiy Natan, a sikatoy propita nen panaon nen David.

²"No panon a niganan para Katawan so pinilin taba a parti na bagat a para kareenan, ontan met ya apili si David ed saray Israelita.

³"Akigalaw ed saray lion tan saray uso, a singa ra labat saray kordiro odino saray kilaw na kanding.

⁴"Nen ogaw ni, pinatey toy sakey ya alan a pangyagel tod saray totoo to. Ininan to na bato so bansut to, impaliteng to, tan pinatonda toy panagpasirayew nen Goliat.

⁵"Nampikasid Katawan, say Sankatageyan, et naitdan na pakayarin mamatey ed samay bantug a sondalo, pian nabirbir na saray bansa so pakayari na saray totoo to.

⁶"Pinagalangan na saray totoo si David, lapud impamatey tod saray totoon nilibo, tan nen akoronaan ya ari, indayew da lapud sikatoy apili na Katawan.

⁷"Inoput ton amin iray kalaban to tan nansiansiay impanalo tod saray Filisteo, kanyan ag la ran balut nagmaliw a katatakotan na saray Israelita.

⁸"Angiter si David na pisasalamat tan dayew ed Masanton Katawan a Sankatageyan diad amin a ginagawa to. Inaro to so Manamalsa to tan kinantaan to na saray dayew ed intiron puso to.

⁹"Angyan na saray kumakanta diad abay na altar a mamawalay marakep a musika.

¹⁰Pinili to ray panaon na pampista diad intiron taon tan ginawa to ran magaygayagan silibrasion; sanagew ya inmalingawngaw so Timplo lapud saray dayew ed Katawan.

¹¹Pinirdona na Katawan so kasalanan nen David tan inletneg ton andi-anggaan so pakayari to. Akisipanan ed sikato so Katawan tan marlang a manoley ed Israel iray kabyangay boleg to.

¹²Maung so impangiparaan nen David ed dalan para anak ton laki, sakey a toon makabat, a manoley ya onsalat ed sikato.

¹³Anggapoy bakal legan na impanari nen Solomon. Say Dios initdan toy kareenan diad amin a ketegan na nanarian to, kanyan nayarian toy mangipaalagey para Katawan na sakey a Timplon manalalagey ya anggad angga.

¹⁴Agaylay inkakabat mo, Solomon, nen malangwer ka ni! Singa Ilog na Nilo a linmepwas so pakaamtam.

¹⁵Kinmayat ed intiron mundo so pakayarim; kabat ed inerman a pasen iray probirbiom tan saray pabitlam.

¹⁶Bantug kad amin a pasen tan inaro ka na saray totoo lapud panangiter mo na kareenan.

¹⁷Atagey so impangidayew ed sika na saray bansa ed intiron mundo lapud saray kantam, saray probirbiom, saray alimbawam, tan saray makabat a balikas mo.

¹⁸Nanaala ka na pilak tan balituk, a singa labat ira lata odino ismay; ginawam ya diad ngaran na Katawan a Dios na Israel.

¹⁹Balet say angipelag ed sika et say maoges ya impanpilalek mod saray bibii.

²⁰Minansaan moy ngaran mo tan saray kabyangay boleg mo. Adusa ra lapud kalokowan mo, a makasengeg na impanermenan dan maung.

²¹Pinaldua toy bansa, tan walay niwalan kalaban a nanarian diad baybay na Israel.

²²Balet mapangasi lawas so Katawan tan tooren ton amin iray sipan to. Ag ton balut deralen iray kabyangay boleg nen David, a pinili to tan inaro to. Kanyan lapud Israel, inabuloyan ton mambilay so pamilya nen David.

²³Inatey si Solomon a singa saray lalaki to tan intilak toy Roboam, sakey ed saray anak ton lalaki, a manoley kayari to. Si Roboam melmelag so impanotek to tan baleg so kalokowan to; saray totontonen ya impaakseb to so makasengeg na inlaban da ray totoo. Wala met si Jeroboam ya ag nibalikas so kaogsan to, tan inwanwan tod maoges a kagagawa so baybay na Israel.

²⁴Nagmaliw a makasalanan iray totoo to, kanyan nibantak ira ed sananey a bansa.

²⁵Sinali ray amin a klasiy kaogsan, anggad binmawid sikara so Katawan.