Read Pangasinan SIRAC 48 Bible Online

SIRAC 48 - Pangasinan bible

SIRAC 48

¹"Insan linmetaw a singa apoy si propita Elias, a manliub iray salita to.

²"Angyakar na eras ed saray totoo, et amayamay iray inaatey lapud seseg to.

³"Nansalita ed ngaran na Katawan, et binara to so ipelag na oran, tan amitlon angipapelag na apoy.

⁴"Elias, makapakelaw a tuloy iray milagrom! Anggapo lay arum a toon makapangikinon na onman iran gawgawa!

⁵"Diad ngaran na Sankatageyan, pinaolim ed bilay so sakey a lakin inatey.

⁶"Tinumbam so sakey a bantug ya ari; impansakit mo ya anggad inatey.

⁷"Diad Sinai nadngel mon nampasnukan ka na Katawan tan imbawag toy getma ton manusad saray kalaban to.

⁸"Nilanaan mo so sakey ya ari a sikatoy nikanad saman a dusa. Nilanaan mo met so sakey a propita ya onsalat ed sika.

⁹"Niatagey kad tawen diad panamegley na mandarlang ya alimbusabos, sakey a karwahin ginoyur na mandarlang iran kabayo.

¹⁰Ibabagay masanton sulat ya akaparaan kan ompanengneng no niganan panaon, ta pabetelen moy pasnuk na Dios kasakbayan na ontan lan iterak to; a pampawilan mon mankasakey lamet iray ama tan saray anak, pasimbaloen moy kipapasen na saray tribu na Israel.

¹¹Mapalar iray totoon mabilay a makanengneng na isabim, pati saray inaatey la ed aro, ta mambilay kami met.

¹²Nen asaniban na alimbusabos si Elias, napno na ispiritu si Eliseo. Legan na impanbilay to, ag to tinakotan iray manoley, tan ag da napanggawa na labay da.

¹³Anggapoy mairap ed sikaton gawaen. Anggan nen inatey la, akapanggawa na milagro so bangkay to.

¹⁴Nen wala nid bilay tan anggan nen wala lad patey, nanggawa na saray makapakelaw a milagro.

¹⁵Balet anggan onya ray agawa, ag inkaindan na saray totoo iray kasalanan da, anggad nala ran priso tan nikaykayat irad intiron mundo. Lapud saya, daiset so atilak a totoo na bansa, balet siansian inoleyan ira na saray kabyangay boleg nen David.

¹⁶Ginawa na saray arum a totoo so makapaliket ed Katawan, balet nankasalanan lan nankasalanan iray arum.

¹⁷Imparaan nen Ezekias so siudad to a panumlang ed panlakob tan inggawaan to na dipositoway danum. Diad panamegley na saray balatyang a kagawaan, nanggawa na dalan na danum ya imbotaw ed tibokel na baton-dampay tan amokotkot na saray bobun a pantiponan na danum.

¹⁸Legan na impanoley to, dinogpaan nen Senakerib so siudad tan imbaki tan manlapud Lakis so manonan opisyal to. Mapasirayew a sinagyat ton milaban so Jerusalem.

¹⁹Nakalan na biskeg na linawa iray totoo tan manggiwgiw irad takot; nanirap iran singa biin mampapasakit.

²⁰Balet nampikasi rad mapangasin Katawan, say Masanto ed Tawen. Inebatan ton tampol iray pikakasi ra tan imbaki toy Isaias a mangilaban ed sikara.

²¹Kinabil na Katawan so kampo na Asiria; pinaandipat ira na anghil to.

²²On, ginawa nen Ezekias so makapaliket ed Katawan tan malet ton inalig iray ginagawa na laki ton David. Sikato yay ingganggan na matalonggaring a propitan si Isaias a napanmatalkan iray pasingayew to.

²³Pinasoner to so agew tan pinadokey toy bilay na ari.

²⁴Niligliwa to ray totoon maermen ed Jerusalem. Ninmengneng ed arapen a panaon so makapanyarin ispiritu to,

²⁵tan impasakbay toy nagawa kasakbayay pansamput na panaon, saray bengatlan ag ni agawa.