Read Pangasinan SIRAC 50 Bible Online

SIRAC 50 - Pangasinan bible

SIRAC 50

¹"Say sankatalonggaringan ed saray lalakin agagi to tan say ikikinon na saray totoo to et say Pangulon Pari a si Simon a lakin anak nen Onias. Sikatoy angapiger na Timplo

²"tan angiletneg na pundasion na atagey tan doblin padir tan saray atagey a padir ed kailber-liber na Timplo.

³"Nen sikatoy manooley, akotkot so pananginay danum a singa kabaleg to may gansan dipositoway danum.

⁴"Nanggawa na saray planon pangyagel ed saray totoo to ed idogpa na saray kalaban tan pinaliberan to na padir so siudad, pian nasebelan toy iloob na kalaban.

⁵"Agaylay kagalangan to nen pinmaway ed Sankasantosan a Pasen!

⁶"Sikatoy singa bitewen ed kabwasan a tatalusen to ray lorem diad isisinag to, singa tulaw a bulan,

⁷"singa agew ya onsisinag ed Timplo na Sankatageyan, singa bunlalakaw a mangisisinag na kagalangan to ya ontotopad saray lorem,

⁸"singa saray rosas no nepnep, singa saray lirio ed abay na kolus, singa saray kiew a sidro ed Libano no tiagew,

⁹"singa napopoolan ya insinso, singa kupan pinitpit a balituk tan naarkosan na amin a klasi na alahas,

¹⁰singa kiew a oliban mabungabunga, singa kiew a sipris a toktokdulen toy lorem.

¹¹Nen insolung nen Simon so marakerakep a kawes to tan linmad masanton altar ya akakawes na ayadyarid dakep, impagmaliw ton balibalin nengnengen so solar na Timplo.

¹²Nen inyawat na saray papari iray parti na bagat nen manalalagey ed abay na altar ya akaliber ed sikaton singa korona iray katulong to, sikatoy singa malangwer a kiew a sidro na Libano ya apaliberan na saray kiew a palmira.

¹³Sikara ya may kabyangay boleg nen Aaron ya akakawes iray mararakep, a manalalagey ira ed arap na intiron tipon na Israel, tan sankabembenan dad lima ra so bagat a nisaklang ed Katawan.

¹⁴Nen asumpal to lay panaglingkur ed altar tan naapiger to lay bagat ed Sankatageyan a Makapanyarin-amin,

¹⁵inala toy sakey a kupa tan imbung tod sengeg na altar so ambalingit ya alak a sakey a bagat ed Sankatageyan, say ari ed sankamundoan.

¹⁶Insan inmeyag iray papari tan sinibuk da ray pinitpit a pilak a trumpita. Amaknul iray makmaksil, pian narengel na Sankatagayen.

¹⁷Amin da ray totoo dinmakmomon tampol ya anggad dalin so lupa ra diad impangigalang dad Katawan a Makapanyarin-amin, say Sankatageyan.

¹⁸Insan inggapo na saray kumakanta so anganta na saray dayew ed sikato, et inmalingawngaw so marakep a musika.

¹⁹Intuloy na saray totoo so pampipikasi rad Katawan a Sankatageyan ya anggad asumpal so panangigalang.

²⁰Insan linmasur manlapud altar si Simon, inyatagey to ray lima to ed intiron tipon na Israel, tan sigagalang ton imbalikas so bindision a manlapud Katawan,

²¹legan ya akayukon kumadwa iray totoo a pangigalang da, ta awaten day bindision a manlapud Sankatageyan.

²²Natan sirin, itdan yo na dayew so Dios na sansinakuban, a nanggawa na ankakabaleg a bengatla ed amin a pasen, pababalegen to itayo manlapud inkianak tayo, tan kakasian to itayo.

²³Itdan to itayo komun na liket tan abuloyan to komun a nawalaay kareenan so Israel ya anggad angga.

²⁴Ituloy to komuy panangasi tod sikatayo tan iyagel to itayo komun ed panaon na pankaukolan tayo.

²⁵Walay duaran bansan kabosul ko, tan walay kumatlo ya ag to anggan kanepegay natawag a bansa:

²⁶saray Edomita, saray manaayam ed saray siudad na Filistia, tan saray makulang-kulang a Samaritano.

²⁷Siak si Jesus a lakin anak nen Sirac Eleazar na Jerusalem, inkanak so amin a kakabatan ko ed impangisulat kod sayan libro, pian naitdan ko ray arum na bilin tan pakaamta.

²⁸Bindisionan komun na Dios so balang toon aaralen to ra yan bangat. Magmaliw a makabat so siopaman ya impapusoy pangawat tod saraya.

²⁹Siopamay mangikanad saraya ed bilay to et nawalaan na dugan biskeg para anggan anton nagawa, lapud sikatoy mankukurang ed liwawa na Katawan.