Read Pangasinan SIRAC 51 Bible Online

SIRAC 51 - Pangasinan bible

SIRAC 51

¹"Pisasalamatan ta ka, O Katawan tan Ari; Idadayew ta ka a Dios tan Manangilaban ko. Pisasalamatan ta ka,

²"ta tinulongan mo ak tan inyagel mo ak. Impaliis mo ak ed patey, diad panagderal na tila tan panagpaoges.

³"Tinulongan mo ak nen anggapoy arum ya ontulong; lapud baleg a panangasim inlaban mo ak ed saray amayamay a gunigon ya asagmak ko, diad alabas a panagbosul na saray kalaban ko, a labay dan erepen so bilay ko;

⁴"diad ag pakaingas lapud makapairap ya asewek a manlalapud pool ya ag ko sinelselan;

⁵"diad dilin patey; diad tila-tilan panagpaoges a nidalem ed ari.

⁶"Aminsan niarap ak ed patey;

⁷"aliber ak na saray kalaban ed anggan iner. Nananap ak na toon ontulong ed siak, balet anggapoy tood man.

⁸"Balet, O Katawan, anunotan koy ontan lan panangasim tan saray ginagawam ed imbeneg a panaon. Anunotan ko ya iyaagel mo ray manmamatalek ed sika, tan ilalaban mo rad saray kalaban da.

⁹"Insan manlapu diad tapew na dalin nampikasi ak ed sika ya iyagel mo ak ed patey.

¹⁰Nampikasi ak, O Katawan, sika so amak, ag mo ak pa ikakaindan ed saray gunigon ko no anggapoy nagawaan ko sumpad saray mapaatagey a kalaban ko.

¹¹Idayew ta ka lawas tan kantaan ta ka na saray imno na pisasalamat. Inebatan moy pikakasik,

¹²tan inlaban mo ak ed taktakot na deral. Kanyan pisasalamatan tan idadayew ta ka. O Katawan, idadayew ta ka!

¹³Nen ogaw ak ni, kasakbayan na impanbiabiahik, masebeg kon impikasi a nawalaan ak na Kakabatan.

¹⁴Linma ak ed Timplo tan kinerew koy Kakabatan, tan anapen ko legan kon mambilay.

¹⁵Manlapud kakkaksilan ko ya anggad kataktakenan ko, say Kakabatan so kawalaay gayagak. Nanlapud impanogaw ko, say dalan na Kakabatan so maptek kon pankukurangan.

¹⁶Naawat ko so Kakabatan nen inggapok a derengelen, et atumangan ak na baleg a pakatalus.

¹⁷Lawas manaaral ak tan misalsalamat ak ed amin da ray nambangat ed siak.

¹⁸Ginetmak so mambilay a makabat tan mapeleng ak ed panaggaway kamaungan. Anggapoy pagbabawian ko.

¹⁹Ginawaan koy anggaay nayarian ko ed pakakayaryan kod Kakabatan. Nen nampikasi ak, maermen ak ya angipatway ontan lan kinaarawik ed Kakabatan.

²⁰Balet tinibokel koy kanunotan ko a nagamuran koy Kakabatan, et nalmok nen inmarawi ak ed kasalanan. Binmaleg ak ed Kakabatan nanlapud samay inmonan impakalmok, tan ag ak balut mambilay no anggapoy Kakabatan.

²¹Lapud adagdag ak na pampilalek a narumog ko, atumangan ak na mapalalo.

²²Initdan ak na Katawan na langkap na maung a panagsalita, et inkanak a mangidayew ed sikato.

²³Dago kayo, amin yon mankaukolan na bangat, tan manaral kayod iskuilaan ko.

²⁴Akin et aakoen yon anggapoy amta yo tan anggapoy gagawaen yo nipaakar ed satan a kipapasen yo?

²⁵Saya so ibabagak: anggapoy gastosen ed pakagamur na Kakabatan.

²⁶Isolung yoy pako, tan manaral kayon maabuloy. Asingger lawas so pankanawnawa.

²⁷Sikayon dili so onnengneng! Tuan ag ak nanaral a maung, balet arumog koy baleg a pakapenekan.

²⁸Anggan antoy karakel na ibayar yod pakagamur ed Kakabatan, anggapoy na darak yo.

²⁹Manggayaga tan misalamat kayo lapud panangasi na Katawan, tan ag kayon balut ombabaing a mangidayew ed sikato.

³⁰Gawa yoy kimey yo ed dugan oras, et tumangan kayo na Katawan diad isisipen ton dugan panaon.