Read Pangasinan SIRAC 6 Bible Online

SIRAC 6 - Pangasinan bible

SIRAC 6

¹"tan ag ka magmamaliw a sakey a kalaban anta sakey ka komun a kaaro. Say makapoy ya inkabantug mangipelag ed sikad kababaingan a kanepegan a nagawad saray matitilan makasalanan.

²"Ag mo aabuloyan a niarawi ka na saray maksil a liknaan mo; napisag-pisag toy kamarerwam a singa gawaen na bakan kalakyan.

³"Nataynan kan singa inatey a kiew ya anggapoy bolung odino bunga to.

⁴"Deralen ka na maoges a pilalek mo tan pagmaliwen to kan sakey a lorey ed saray kalaban mo.

⁵"No masimpit tan magalang ka, na panliketan moy pikakaaro na saray amayamay a totoo.

⁶"Mibanowan ka ed saray amayamay a totoo, balet miala ka na simbawa ed sakey labat ed sanlibon totoo.

⁷"No mikaaro ka, ag ka maganat a manmatalek ed saray nakaarom; nepeg ya asubok la ra.

⁸"Saray arum a totoo magmaliw iran kakaarom no pankaabigan da, balet ag da ka la tulongan no wala kad gunigon.

⁹"Saray arum a totoo magmaliw iran kalaban mo lapud pigaran sangsangan, insan pabaingan da ka diad panamegley na pangibaga rad balang sakey na nipaakar ed inkagawa.

¹⁰Saray arum mirongo rad sikad lamisaan legan a maung iray bengatla; ompeket irad sika a singa aninom tan iganggan da ray aripen mo, balet ag da ka tulongan ed gunigon mo.

¹²No magmaliw a maoges so kipapasen mo, onsumlang irad sika, tan ag mo la ra narumog ed anggan iner a pasen.

¹³Arawian mo ray kalaban mo tan alwaran mo ray kakaarom.

¹⁴Say matoor a kaaro et singa salimbengan ya arawid kaatapan; no akalmo kay sakey, akalmo kay kayamanan.

¹⁵Anggapo lay arum a mabli nen say matoor a kaaro; ag nayarin itdan na bili.

¹⁶Singa tambal a pansiasiansiaen ton maabig so laman mo so matoor a kaaro.

¹⁷Say sakey a toon walay takot tod Katawan et matwan mikaaro, lapud ipasen to ray kakaaro to a singa pangipapasen tod sikaton dili.

¹⁸Anak, aral mon pablien so Kakabatan legan a malangwer ka ni, et nayarian mo nin narumog no matakken ka la.

¹⁹Diad pananap mo na Kakabatan, mankimey ka na pinasya a singa panagkimey na dumaralus diad pambaka tan pantanem tod kaalogan to; diad ontan makapanilalo kad maung ya ani. Nepeg mon kimeyan a magano, balet ag mabayag panliketan moy nalmom.

²⁰Naamtaan na saray totoo ya ag da amtay peteken a mairap a tuloy iray kakaukolan na Kakabatan tan kulang so pilalek dan manumpal ed saraya.

²¹Saray kakaukolan na Kakabatan et ambelat ni nen say labay dan sakbaten, kanyan tampol dan taynan ira.

²²Panametek labat so kabaliksan na panametek, tan amayamay iray totoon ag da napetek so sikaran dili.

²³Anak, dengel kad siak tan awat moy simbawak.

²⁴Ibaliber mod saray salim iray golunggolung na Kakabatan tan iyan mod tenger mo so pako to.

²⁵Sakbat mod takeb mo tan ag mo ipopolisay iray berber to.

²⁶Tombuk moy Kakabatan, tan tombuk mod intiron pusom so labay to.

²⁷Lakan mananap ed Kakabatan, et ipaamta toy sikaton dili ed sika. Bembenan mo tan ag mo ibobolus.

²⁸Diad ontan, naamtaan moy kareenan na kanunotan ya iiter to tan sikatoy magmaliw a gayagam.

²⁹Saray tanda na inkaaripen ya isosolung mo et magmaliw iran tanda na katageyan na ari. Magmaliw a mangyagel ed sika iray golunggolung to tan isolung moy pako to a singa kawes na kagalangan.

³¹Isolung moy Kakabatan a singa koronan napnoy kagalangan.

³²Anak, makaaral ka no labay mo. Nayarin magmaliw kan masilib no pampelengan moy magmaliw ya onya.

³³No sipaparaan kan ondengel, makaaral ka tan magmaliw kan makabat.

³⁴Lakad kawalaan da ray mamatakken a totoo, anap moy toon makabat, tan miolup kad sikato.

³⁵Nepeg a sipaparaan kan ondengel no mansalita ray totoon rilihioso, tan ag mo papalabasey antokaman a mangipapanengneng na kakabatan.

³⁶No narumog moy toon walay pakatalus, bangon kan masakbay ya ombisitad sikato; pakondalem moy talpakad puirta to, lapud kabibisitam ed sikato.

³⁷Ikanam so intiron panaon mo ed panagaral na saray ganggan na Katawan tan nudnunot mo ra. Say Katawan itdan to ka na pakatalus tan kakabatan ya aanapen mo.