Read Pangasinan SIRAC 7 Bible Online

SIRAC 7 - Pangasinan bible

SIRAC 7

¹"No ag ka manggawa na makapoy, anggapoy makapoy ya onsabid sika.

³"Ag mo babakaen so dalin a taneman na saray bokel na aliwan inkatonung; nayarin manani ka na dakdakel nen say iilaloan mo.

⁴"Ag ka onkekerew ed Katawan na sakey a pasen na kagalangan odino onkerew kad ari na sakey a manonan kipapasen.

⁵"Ag mo sasalien a panisiaen so Katawan a matonung ka odino ipantam so kakabatan mo diad arap na ari.

⁶"Ag mo pampipilalekan so magmaliw a sakey a huis, likud no walad sikay mabiskeg ya inkatoon mamatondad pikewet a nagagawa.

⁷"Ag ka manggagaway krimin sumpad karaklan, tan ag mo ipepelag so sikan dili ed kababaingan diad pegley da ray kabansaan mo.

⁸"Ag mo pipidwaen so ginawam a kasalanan. Manepeg a masarag lay dusan asagmak mo ed inmona.

⁹"Ag mo nununoten a birbiren na Sankatagyan a Dios so ontan lan inkabonluk mon mangiter, kanyan awaten toy antokaman a labay mon isaklang.

¹⁰Ag ka onsasawan mampikasi, tan ag mo papalabasey pankanawnawam a mangiter ed saray mairap-bilay.

¹¹Ag mo eelekan so toon apaabeba. Say Katawan so mamapaabeba ed too, balet say Katawan met so mamapaatagey ed sikato.

¹²Ag ka mannununot na saray tilan ibagam nipaakar ed saray kakaarom.

¹³Ag kan balut mantitila. Ag yan balut makapanggawa na antokaman a kamaungan.

¹⁴Diad ingganan tipon, ag ka onaalagey a mansalitay dakel ya andi-kakanaan. Ag mo ooliten so pikakasim.

¹⁵Ag mo sasalien a paliisan so kimey ed alog odino say arum a mairap a kimey; inter na Sankatagyan ira yan kimey a gawaen tayo.

¹⁶Ag ka mioolup ed tipon da ray managkasalanan; ag mo lilingwanan ya andi-saew ya onsabi so pananusa na Katawan.

¹⁷Mampaabeba ka a maung, lapud manaalagar ed sikatayon amin so kaboboluk ya iter na patey.

¹⁸Ag mo pantratraidoran so sakey a kaaro lapud kuarta. Ag mo pantratraidoran so peteg a kaaro, lapud amin a balituk ed intiron mundo.

¹⁹Ag mo papalabasen so pankanawnawam a mangasawa na makabat tan maung a bii. Mabli ni nen say balituk so masimpit ya asawan bii.

²⁰Ag mo lulukoen so aripen a maung so pankikimey to, odino say kumukimey a gagawaen toy anggaay nayarian ton para sika.

²¹Ipanengneng mod makabat ya aripen so panangaron labay mon ipanengneng ed sikan dili, tan abuloyan mon walay kawayangan to.

²²Apiapiger moy pangasikasom ed saray dilin ayayep mo. No nanaitdan da kay kuarta, pansiansiam iran kayaryan.

²³No wala ray anak mon lalaki, panaral mo ra. Ibangat mo ran peteken day sikaran dili legan a malangwer ni ra.

²⁴No wala ray anak mon bibii, pansiansiam iran masimpit, tan ag mo ra papalongkitan.

²⁵No apaasawam so anak mo, agawaan moy baleg a kimey, balet paasawam ed makalakal a laki.

²⁶No walay maung ya asawam, ag mo isisian, balet ag mo imamatalek so sikan dili ed siopaman ya ag mo inaro.

²⁷Igalang moy amam ed intiron pusom, tan ag mon balut lilingwanan a mapalaloy impanirap nen inam nen nianak ka.

²⁸Ag mo lilingawanan ya utang moy bilay mod sikara. Panoy pakabayar mod sikara ed amin a ginawa ran para sika?

²⁹Takotan mod intiron pusom so Katawan, tan pagalangan mo ray papari to.

³⁰Arom ed intiron biskeg mo so Manamalsam, tan iter moy tulong mo ed saray ministro to.

³¹Igalang moy Katawan tan pagalangan mo ray papari. Iter mod sikara iray niganggan ed sikan iter mo: say ononan naanim, say bagat a para kasalanan, say takeb na ayep a para bagat-amin da ray manepeg a bagat tan saklang.

³²Iter moy tulong mod saray mairap-bilay, et iter na Katawan so nagnap a bindision to.

³³Mangiter kan mabonluk ed balang kamarerwa, tan ag mo isisiblet so panangarom ed saray inaatey.

³⁴Ipanengneng moy panagabagey mod saray akabalang na inaro dad bilay, tan midamay kad ermen da.

³⁵Ag mo panduaduaruwaay pambisitam ed saray mangiinagem. Sika so naaro lapud singa sarayan bengatla.

³⁶Antokaman a gawaen mo, ag mo lilingwanan a waly agew na ipatey mo. Legan a pinunot mo ya, ag kan balut mankasalanan.