Read Pangasinan SIRAC 8 Bible Online

SIRAC 8 - Pangasinan bible

SIRAC 8

¹"Ag mo lalabanan so toon bibirbiren ed baley; nayarin napelag ka ed pakayari to.

²"Ag ka mikokolkol ed toon mayaman; nayarin pasoksokan ton onsumpad sika iray totoo. Amayamay lay totoon dinederal na balituk tan pinapaoges toy kanunotan da ray arari.

³"Ag ka misasangsangan ed toon mapalaloy inkalabir to; songluran mo labat ed satan so apoy to.

⁴"Ag mo lulureyen so toon aliwliway kagagawa to; nayarin pabaingan to ray lalakim.

⁵"Ag mo babalawen so sakey a too no ibebeneg to lay kasalanan. Ag mo lilingwanan a makasalanan itayon amin.

⁶"Ag mo leleglemewey siopaman lapud matakken la; ontatakken met lay pigarad sikatayo.

⁷"Ag ka manliliket ed impatey na siopaman; ag mo lilingwanan a nepeg ya ompatey itayon amin.

⁸"Ag mo ipopolisay so imbaga na saray makabat a totoo. Aral mo ray probirbio ra; makaaral kad sikara na marakep a panagbilay tan say panlingkur ed saray matalonggaring a totoo.

⁹"Dengel mon maung so ibabaga da ray mamatakken a totoo, ta akaaral ira ed saray akaonan nambilay nen say sikara. Makaaral kad sikara, tan nibangat da ka na sipaparaan ya ebat no nakaukolan.

¹⁰Ag mo nepeg so mangiter ed toon makasalanan na pankanawnawa ton mankasalanan ni. Nayarin napasakitan moy sikan dili; singa ya kainomay na pakapoolan no isosonglur mo ray kiew ed pool.

¹¹Ag mo aalageyan tan tataynanan so sakey a toon mapaatagey. Ag la pigan pikeweten to ray salitam tan ikana to ra sumpad sika.

¹²Ag mo papabayesen na bengatla so siopaman a makapanyari ni nen sika. No gawaen mo ya, ipasen mo lan abalang.

¹³Ag mo gagawaen a sikay makaoley ed utang na sakey a too no ag mo nayarian. Nepeg ya akaparaan kan mambayar ed inebatan mo.

¹⁴Ag mo iririmanda so sakey a huis. Sikatoy manalo lapud betang ya eegnaan to.

¹⁵Ag ka mambibiahi no kaolup moy toon anggapoy adya. Gunigon labat so nagunggonam. Gawaen toy antokaman a panliketan ton inaambagel a bengatla, et ompatey kan kaibam.

¹⁶Ag ka misasangsangan ed siopaman a mapetang na olo odino mimila ed pasen a bukbukor yon dua. Anggapoy wala ed satan a too so inkaruksa, et dogpaan to ka no anggapoy toon ontulong ed sika.

¹⁷Ag ka nepeg ya onkerew na simbawa ed toon kulang na kalakal. Ag to nayarin iyamut so ibagam ed sikato.

¹⁸Ag mo nepeg a gawaen ed arap na sangkaili so antokaman a bengatlan nepeg ya iyamut. Non gawaen mo, anggapoy pakaamtaan mo no antoy nagawa.

¹⁹Ag mo nepeg ya ipaamtad siopaman iray kanunotan a manepeg a sika labat so makaamta. No gawaen mo, singa pinalabas mo so pankanawnawam a makagamur na liket.