Read Pangasinan SIRAC 9 Bible Online

SIRAC 9 - Pangasinan bible

SIRAC 9

¹"Ag ka mangiimon ed asawam ya inarom. Ibangat mo labat ed satan no panoy panggawa toy pakasakitan mo.

²"Ag mo isusuko so kagalangan ed anggan dinan a bii.

³"Arawian mo ray asawa na arum a lalaki, ta no andi patitan da ka.

⁴"Ag ka mioolup ed saray bibiin kumakanta tan tumutogtog; palikdoen da ka.

⁵"Ag ka onnenengneng a mapalalo ed sakey a birhin, ta no andi napasoot kan mambayar na bili na nubio.

⁶"Ag mo iiter so sikan dili ed saray marotak a bibii, pian ag mo nabalang ya amin so kayaryan mo.

⁷"Kanyan ag ka oonlan mananap ed saray dalan odino manliber-liber ed saray ataynan a parti na baley.

⁸"No makanengneng kay magangganan bii, lingaw ka ed biek a dapag; ag mo panaayamen ed kanunotan mo so ganggana na biin ag mo asawa. Dakel iray lalakin nibalang na ganggana na sakey a bii. Parlangan toy liknaan mo a singa apoy.

⁹"Ag ka mirorongod asawa na sananey a laki odino miinoman ed sikato. Nayarin napelag ka ed pananukso na ganggana to tan naderal ka na panibeg mo.

¹⁰Ag mon balut ikakaindan so abayag lan kaaro; ag kan balut makalmo na balon kaaro a kasalat to. Singa alak so pikakaaro; lalon onaabig no ombabayag.

¹¹Ag ka oniibeg ed iyaaligwas na toon makasalanan; ag mo amta no antoy niganan deral a manaalagar ed sikato.

¹²Ag ka manliliket ed saray bengatlan pakaliliketan na saray totoon aliwan matonung; ag mo lilingwanan a legan dan mambibilay wala rad kasalanan.

¹³No paliisan moy toon walay pakayari ton mamatey ed sika, ag ka nepeg ya ontakot ed pangyagel moy bilay mo; balet no nepeg moy onasingger ed sikato, manalwar kan maung, ta nayarin pateyen to ka. Nepeg a sinununot ka a manaakar ka ed kawalaan da ray patit, a sikay mainomay a napatitan.

¹⁴Gawam so anggaay nayarian mon mangamta ed saray totoon walad kaliber-liber mo, tan miala ka na simbawa ed saray totoon manepeg labat a mangiter.

¹⁵Mitongtong kad saray totoon maotek, tan say Ganggan na Sankatagyan so nepeg a pantongtongan yo.

¹⁶Pilim a kaibam ed panangan iray totoon matonung. Nepeg a say takot mod Katawan so manonan ikinon mo.

¹⁷Nadayew so toon marunong a mankimey lapud saray bengatlan gagawaen to, tan napapamintuaan so kakabatan na pangulo diad panamegley na saray salita to.

¹⁸Tatakotan na balang too ed baley so toon mansasalita ya anggapoy adya tan sagpasagpa.