Read Pangasinan LEVITICO 11 Bible Online

LEVITICO 11 - Pangasinan bible

LEVITICO 11

¹"Say Katawan inter tod kindi Moises tan Aaron iray onggendan a totontonen

²"a nepeg a tombuken na saray totood Israel. Nayarian yon kanen so dinan man ya ayep ed tapew na dalin

³"a pisag so koko to tan mamparintek.

⁴"Balet ag yo nepeg a kanen iray kamilyo, saray konihod takel, odino saray konihon amo. Ipasen yon marotak ira yan ayayep, ta mamparintek ira balet aliwan pisag so koko ra.

⁷"Ag kayo mamangakan na baboy ta ipasen yon marotak ya ayep; pisag iray koko to, balet ag mamparintek.

⁸"Ag kayo mamangakay dinan man ed sarayan ayayep, ni didiwiten so laman ton inatey; marotak ira yan ayayep.

⁹"Nayarian yo a kanen so anggan dinan a sira a nanggigim tan nansiksik,

¹⁰balet ag nayarin kanen so antokaman a manaayam ed danum ya anggapoy gigim tan siksik.

¹¹Ipasen yon marotak ira yan sira. Ag yo ra kakanen, ni didiwiten iray laman dan inatey.

¹²Ag kayo mamangakay antokaman a mabilay ya ag nansiksik tan ag nanggigim a manaayam ed danum.

¹³Ag yo nepeg a kanen iray onggendan a marotak a manok: agila, kulayot, baga, gikgik; busardo, buitri, wawak; abistrus; garsita, tigkalak, dulakak, pilikano, kalamon, abudilla, tan kaging.

²⁰Amin a nampayak a bigis et marotak

²¹likud labat ed saray manlukso.

²²Nayarian yoy mangan na dorun, dalokduk, odino wirwir.

²³Balet amin a nampayak tan mankorung et ipasen yo ran marotak.

²⁴Siopamay makadiwit ed inatey a laman na saray onggendan ya ayayep et marotak ya anggad labi: amin ya ayayep a nankoko likud no pisag so koko ra tan mamparintek ira, tan amin ya ayayep ya apatiray sali tan andorokey so koko ra. Siopamay manawit na inatey a laman da ra yan ayayep nepeg ya ipesak toy kawes to, balet sikatoy marotak ni ya anggad labi.

²⁹Ipasen yon marotak iray bulilit, otut, tilay, toko, tiki, buaya, basakay, tan angga.

³¹Siopamay maniwit ed saraya odino say inatey a laman da et marotak ya anggad labi.

³²Amin a bengatlan adapoan na laman dan inatey et marotak. Sarayan bengatla et tabla, abel, katat, odino sako ya anggan antoy pangikakanaan. Nakaukolan ya itaksaw irad danum balet mansiansia ran marotak ya anggad labi.

³³Et no dinmapod banga so inatey a laman da, amin a karga to may banga magmaliw a marotak, tan nepeg yon betagen.

³⁴Amin a kakanen a naibungan na danum a walad saman a banga et magmaliw a marotak tan amin a nayarin inumen a wadman ed saman a banga et magmaliw a marotak.

³⁵Anggan anton bengatla a nadapoan na inatey a laman et magmaliw a marotak; say dalin a dalikan odino pogun et nepeg a betagen,

³⁶balet say sobul odino bobun et mansiansian malinis anggaman ya amin a bengatlan nadiwit na inatey a laman et magmaliw a marotak.

³⁷No nadapoan day bokel ya itatanem, samay bokel mansiansian malinis.

³⁸Balet no say bokel ya akatalem ed danum et napelagan na inatey a laman na ayep a marotak, samay bokel magmaliw a marotak.

³⁹Siopamay makadiwit na inatey a laman na sakey a nayarin kanen et magmaliw a marotak ya anggad labi.

⁴⁰No walay mangan na anggan dinan a parti na samay inatey ya ayep, nepeg ton ipesak so kawes to, balet sikato niy marotak ya anggad labi; siopamay manawit na inatey ya ayep nepeg ya ipesak toy kawes to, balet sikato niy marotak ya anggad labi.

⁴¹Ag yo nepeg so mansira na dinan man ya ankekelag ya ayep a manaakar ed tapew na dalin, ta marotak ira.

⁴²Nayarin sarayan ayayep et maniilas ira, odino panaakar day apatiran sali ra, odino amayamay so sali ra.

⁴³Ag yo dodotakay sikayon dili diad pangan yod sarayan ayayep.

⁴⁴Siak so Katawan a Dios yo, kanyan nepeg a masanto kayo ta siak et masanto ak.

⁴⁵Siak so Katawan ya angipaway ed sikayod Egipto pian siak so magmaliw a Dios yo. Nepeg a masanto kayo, ta siak et masanto ak.

⁴⁶Sikato ya sirin so ganggan a nipaakar ed saray ayayep tan saray manok, nipaakar ed amin a manaayam ed danum, tan amin a manaakar ed tapew na dalin.

⁴⁷Apiger yon pambiigan so malinis tan say marotak onung ed ganggan, saray ayayep a nayarin kanen tan saray ayayep a sebel a kanen.