Read Pangasinan LEVITICO 12 Bible Online

LEVITICO 12 - Pangasinan bible

LEVITICO 12

¹"Say Katawan inter to ray onggendan a totontonen

²"a nepeg a sumpalen na saray totood Israel. Diad loob na pitoran agew kayariy pananak na sakey ya ina ed sakey a laki, sayan ina et marotak onung ed ganggan, a singa inkarotak to no naliliberan.

³"Diad kumawalon agew nepeg a segetan so ogaw.

⁴"Sayan ina talomplo tan taloy agew ni a siansian marotak lapud inkaekalan toy dala nen mananak; nepeg ya ag to mandiwit na antokaman a masanto, ni onloob ed dalem na masanton Tulda ya anggad pagmaliw to lan malinis onung ed ganggan.

⁵"Diad loob na labinapat agew kayariy pananak na ina ed sakey a bii, sayan ina et marotak onung ed ganggan, a singa inkarotak to no naliliberan. Insan anemaplo tan anem ya agew ni a siansian marotak lapud inkaekalan toy dala nen nananak.

⁶"No nagmaliw lan malinis ongun ed ganggan kayari na inkarotak to lapud impananak to na laki odino bii, nepeg a mangyakar ed pari diad lolooban na Tuldan Ayamay Katawan na sakey taon a kordiro, ta isaklang a bagat a popoolan tan say sakey a malapati odino sakey a palekpek, ta isaklang a bagat a para kasalanan.

⁷"Say pari isaklang to yan bagat ed Katawan tan gawaen toy sirimonya a mangekal na inkarotak to et, diad ontan, magmaliw a malinis onung ed ganggan. Sikato ya sirin so nepeg a gawaen na sakey a bii kayari ton mananak.

⁸"No ag nayarian na sakey a bii so mangibagat na sakey a kordiro, nepeg a mangisaklang na duaran palekpek odino duaran malapati, say sakey isaklang a bagat a popoolan tan say sakey ibagat a para kasalanan. Say pari gawaen toy sirimonya a mangekal na inkarotak na samay bii et, diad ontan, magmaliw a malinis onung ed ganggan.