Read Pangasinan LEVITICO 13 Bible Online

LEVITICO 13 - Pangasinan bible

LEVITICO 13

¹"Say Katawan inter tod kindi Moises tan Aaron ira yan totontonen.

²"No say sakey a too et agiri odino apelsaan odino alanokan a nayarin magmaliw a singa sakit a kating, iyakar ed kinen Aaron odino diad sakey ed saray paparin anak to.

³"Say pari nengnengen to may sakit na baog et, no pinmoti ray bagod kawalaan to tan singa kinmotlaung, singa kating yan sakit. Say pari ed satan sintinsiaan ton marotak imay too.

⁴"Balet no samay sakit na baog et ampoti tan ag kinmotlaung tan ag pinmoti ray bago, say pari panayamen ton pitoy agew a bukbukor to imay too ed akabiig a pasen.

⁵"Say pari nengnengen to lamet diad kumapiton agew imay too; no diad pakanengneng to et ag angoman imay sakit tan ag kinmayat, panayamen to nin pitoy agew ed akabiig a pasen.

⁶"Samay pari nengnengen to lamet diad kumapiton agew et no nakal so poti to may sakit tan ag kinmayat, sintinsiaan ton malinis imay too onung ed ganggan; sakey labat a giri. Samey too ipesak tok kawes to et magmaliw a malinis onung ed ganggan.

⁷"Balet no samay sakit et kinmayat kayari na impannengneng tan impanintinsia na pari a malinis imay too, nepeg a mampanengneng lamet imay too ed pari.

⁸"Say pari nengnengen to lamet, et no kinmayat imay sakit, sintinsiaan to a marotak imay too; kating so sakit to.

⁹"No say sakey a too et walay sakit ton kating, iyakar ed pari

¹⁰a mannengneng ed sakit na samay too. No walay ampotin babag ed baog to ya amapoti na saray bago tan pinmaway lay laman,

¹¹saya et abayag lan kating. Say pari sintinsiaan ton marotak; ag la nakaukolan a papawilen ton panayamen ed samay akabiig a pasen, mapatpatnag lan sikatoy marotak.

¹²No samay sakit et onkayat ed intiron laman to, manlapud olo ya anggad sali to,

¹³say pari nengnengen to lamet. No narumog ton kinmayat ed intiron laman to, sintinsiaan ton malinis onung ed ganggan. No amin a baog to et nagmaliw ya ampoti sikato so malinis onung ed ganggan.

¹⁴Balet manlapud bekta a walay tinmerak a babag, sikato so marotak.

¹⁵Say pari nengnengen to lamet, tan no nanengneng to so tinmerak a babag, sintinsiaan ton marotak imay too. Say tinmerak a babag et sakey a sakit a kating, kanyan marotak imay too.

¹⁶Balet no onabig so babag a tinmerak tan nagmaliw ya ampoti lamet, samay too onla ed pari

¹⁷a mannengneng lamet ed sikato. Et no pinmoti imay sakit, sikatoy malinis onung ed ganggan, tan say pari sintinsiaan ton malinis.

¹⁸No say sakey a too et walay pelsa ton inmabig la

¹⁹balet no ag abayag et walay linmetaw ya ampotin larag odino ampotin balangaan a batek ed nanlapwan na samay pelsa, sikatoy onla ed pari.

²⁰Nengnengen na pari, et no kinmotlaung imay batek tan pinapoti to ray bago, sintinsiaan ton marotak. Kating yan sakit a ginmapod pelsa.

²¹Balet no say pari et nengnengen to may batek tan narumog ton ag pinmoti rad may bago tan ag kinmotlaung, balet ta posisawan so kolor to, say pari panayamen ton pitoy agew imay mansasakit ed akabiig a pasen.

²²No onkayat imay batek, say pari sintinsiaan ton marotak; walay sakit to.

²³Balet no anggapoy pangomanan to may batek tan ag onkayat, sakey labat a piglat na pelsa, tan say pari sintinsiaan ton malinis imay too onung ed ganggan.

²⁴No say sakey a too et apoolay parti na laman to, tan nagmaliw ya ampoti odino ampotin balangaan a batek so apoolan a laman,

²⁵say pari nengnengen to. No pinmoti ray bago diad kawalaay batek tan kinmotlaung, kating yan sakit a ginmapod inpakapoolan to, sintinsiaan ton marotak.

²⁶Balet no ag pinmoti ray bago diad apoolan a parti, tan ag kinmotlaung, balet ta posisawan so kolor to, say pari panayamen ton pitoy agew a bukbukor to imay too ed akabiig a pasen.

²⁷Say pari nengnengen to lamet diad kumapiton agew, et no onkakayat imay batek talagan sakit a kating, tan say pari sintinsiaan ton marotak imay too.

²⁸Balet no anggapoy angomanan to may batek tan ag onkakayat tan posisawan so kolor to, aliwan sakit a kating. Say pari sintinsiaan ton malinis imay too, onung ed ganggan, lapud sakey labat a piglat na samay apoolan.

²⁹No say sakey a laki odino say sakey a bii et walay sakit tod baog na olo odino baba,

³⁰say pari nengnengen to may sakit. No singa kinmotlaung tan saray bagod samay kawalaay sakit et duyawan tan pino, kating yan sakit; say pari sintinsiaan tod satan a marotak imay too.

³¹No diad pannengneng na pari ed samay too et naalmoan ton ag kinmotlaung imay sakit, balet ta aliwa nin magket iray bago, panayamen to na pitoy agew a bukbukor to may too ed akabiig a pasen.

³²Diad kumapiton agew say pari nengnengen to lamet imay sakit, et no ag kinmayat tan anggapo ray duyawan a bago ed kawalaay sakit tan ag kinmotlaung,

³³samay too kiskisan toy kaliber-liber na samay sakit. Say pari ed satan panayamen to lamet na pitoy agew a bukbukor to imay too ed akabiig a pasen.

³⁴Diad kumapiton agew say pari nengnengen to lamet imay sakit, ta no ag kinmayat tan ag kinmotlaung, sintinsiaan ton malinis imay too onung ed ganggan. Samay too ipesak toy kawes to, tan sikatoy malinis la.

³⁵Balet no kinmayat imay sakit kayari na impanintinsia ed sikato a malinis,

³⁶say pari nengnengen to lamet. No kinmayat la so sakit ag to la nakaukolan a nengnengen no wala kasi odino anggapo so duyawan a bago; mapatnag a samay too et marotak.

³⁷Balet no diad pakanengneng na samay pari et ag kinmayat imay sakit tan totobuan la ra na magket a bago imay sakit, inmabig lan talaga, tan samay pari sintinsiaan ton malinis onung ed ganggan.

³⁸No say sakey a laki odino bii et wala ray ampotin batek ed baog to,

³⁹say pari nengnengen to yan too. No ampotin posisaw so kolor na saray batek, batek ira labat a linmetaw ed baog; say too et malinis onung ed ganggan.

⁴⁰No say sakey a too et ayangyangan ed beneg na olo to odino diad arap na olo to, sikatoy aliwan marotak no ag ta yangyangan labat.

⁴¹

⁴²Balet no walay onletaw a balangaan ya ampotin giri ed samay ayangyangan a parti, sakit yan kating.

⁴³Say pari nengnengen to, tan no walan talagay balangaan ya ampotin giri,

⁴⁴samay pari sintinsiaan ton marotak imay too, lapud samay kating a walad olo to.

⁴⁵Say toon walay kating ed laman to nepeg a mankawes na apilat-pilat, ag mansagaysay, sakuban toy kapalduan lupa to ed bandad leksab, tan oneyag, Marotak, marotak!

⁴⁶Mansiansian marotak legan a walay sakit to, tan nepeg a manayam ya arawid saray totoo, diad paway na kampo.

⁴⁷No walay boot ed kawes a lana odino linen,

⁴⁸odino boot ed abel a lana odino linen, odino boot ed katat odino diad antokaman a ginawad katat,

⁴⁹no birdian odino balangaan so kolor to, boot yan onkayat tan nepeg ya ipanengneng ed pari.

⁵⁰Say pari nengnengen to tan isinup to na pitoy agew imay nipanengneng a bengatla.

⁵¹Nengnengen to lamet diad kumapiton agew, et no kinmayat imay boot, samay bengatla et marotak.

⁵²Say pari poolan to, lapud onkayat yan pikas a nepeg a deralen diad panamegley na apoy.

⁵³Balet no diad panengneng na pari ed samay boot, et narumog ton ag onkakayat ed samay bengatla,

⁵⁴iganggan to a nipesak tan nisinup nin pitoy agew.

⁵⁵Insan to lamet nengnengen, et no ag angoman so kolor na samay boot anggaman ya ag kinmayat, siansia nin marotak, nepeg yon poolan imay bengatla, anggan say boot et walad arap odino diad beneg.

⁵⁶Balet no diad pannengneng lamet na pari et kinmopas imay boot, satsaten toy parti na kawes odino katat a kawalaay boot insan to ekalen.

⁵⁷Insan no ompatnag lamet so boot, onkakayat lamet tan nepeg a poolan na akankien so kawes odino katat.

⁵⁸No ipesak to, et nakal imay boot, ipesak to lamet, et magmaliw lan malinis onung ed ganggan.

⁵⁹Sikato ya sirin so ganggan a nipaakar ed boot ed kawes a lana odino linen, o abel a lana odino linen, odino diad pikas ed antokaman a ginawad katat.