Read Pangasinan LEVITICO 14 Bible Online

LEVITICO 14 - Pangasinan bible

LEVITICO 14

²"iray onggendan a totontonen a nipaakar ed sirimonya a panlinis ed sakey a toon inmabig ed sakit a kating. Diad agew a say sakey a too et nasintinsiaan a malinis onung ed ganggan, sikatoy niakar ed pari.

³"Insan say pari iyakar tod paway na kampo tan diman to nengnengen. No inmabig la may sakit

⁴"say pari iganggan to a niakar ed sikato so duaran manok a malinis onung ed ganggan, sakey a poter na kiew a sidro, sakey ya ambalangan koldon, tan sakey a sangay isopo.

⁵"Insan say pari iganggan to a samay sakey a manok et pateyen ya akasalur so sakey a bangan nankarga na danum ya inalad sobol.

⁶"Alaen to may sananey a manok tan isawsaw tod dala na samay pinatey a manok; isawsaw to met imay kiew a sidro, samay ambalangan koldon, tan samay sangay isopo.

⁷"Iwalsik ton mamimpito imay dala ed samay toon linisan ed sakit ton kating, insan sintinsiaan ton malinis onung ed ganggan. Paibolus tod kaalogan imay mabilay a manok.

⁸"Samay too ipesak toy kawes to, poklisan toy olo to, tan manames; diad onya magmaliw a malinis onung ed ganggan. Nayarian toy onloob ed kampo balet ta manayam ni na pitoy agew ed paway na tulda to.

⁹"Diad kumapiton agew kiskisan toy buek to, balbas to, kirep to, tan amin a bagoy laman to; ipesak toy kawes to tan manames. Diad onya magmaliw lan malinis onung ed ganggan.

¹⁰Diad kumawalon agew sikatoy mangyakar na laman a duaran kordiron kalakyan tan sakey a kordiron kabatyan a sakey taon ya anggapoy deral na laman da, duaran kilon arina ya inkames ed larak na oliba tan talora tan kapalduan litro a larak na oliba.

¹¹Say pari iyakar to may too tan sarayan bagat diad lolooban na Tuldan Ayamay Katawan.

¹²Insan say pari alaen to may sakey a kordiron kalakyan tan, katekep na samay taloran tan kapalduan litron larak, isaklang to a bagat a pambayar. Isaklang to a nidoma-doman rigalod Katawan a para pari.

¹³Pateyen to may kordiro diad masanton pasen a panamateyan ed saray ayep ya ibagat para kasalanan tan saray ayep ya ibagat a popoolan. Nepeg to yan gawaen lapud say bagat a pambayar et kayaryan na pari tan masanton tuloy a singa bagat a para kasalanan.

¹⁴Say pari mangala na daiset a dala to may kordiro, insan to iponaris ed gilig na kawanan a layag to may toon sintinsiaan a malinis onung ed ganggan, diad tangan na kawanan a lima to, tan diad tangan na kawanan a sali to.

¹⁵Say pari mangala na daiset a larak na oliba tan ipaterter tod daklap na kawigin lima to,

¹⁶idelnet toy tamoro na kawanan a lima to tan iwalsik tod man a mamimpito diad arapan na Katawan.

¹⁷Mangala na daiset a larak a walad daklap to tan daiset a dala to may kordiro, insan iporanis to rad kawanan a gilig na layag to may toon sintinsiaan a malinis onung ed ganggan, diad tangan na kawanan a lima to, tan diad tangan na kawanan a sali to.

¹⁸Ilana tod olo to may too imay akeraan a larak ed daklap to. Diad onya gawaen toy sirimonya na panlinis.

¹⁹Insan say pari isaklang toy bagat a para kasalanan tan gawaen toy sirimonya na panlinis. Kayari to ya, pateyen toy ayep a para bagat a popoolan

²⁰tan, katekep na bagat a trigo isaklang tod tapew na altar. Diad onya say pari gawaen toy sirimonya na panlinis, tan samay too et magmaliw a malinis onung ed ganggan.

²¹No mairap so bilay na sakey a too tan ag to nayarian ira yan ibagat, mangyakar na sakey labat a kordiron kalakyan ya isaklang ton bagat a pambayar ya onkanan panlinis ed sikato onung ed ganggan, sakey a nidoma-doman bagat ed Katawan a para pari. Sikatoy mangyakar na sakey labat a kilon arina ya inkames ed larak na oliba a para bagat a trigo tan talora tan kapalduan litron larak na oliba.

²²Mangyakar met na duaran palekpek odino duaran malangwer a malapati; say sakey ibagat a para kasalanan tan say sakey para bagat a popoolan.

²³Diad kumawalon agew na panlinis ed sikato iyakar to ra ya ed pari diad lolooban na Tulda.

²⁴Say pari alaen to may kordiro tan samay larak na oliba tan isaklang ton nidoma-doman rigalo ed Katawan a para pari.

²⁵Pateyen to may kordiro tan mangala na daiset a dala to, insan to iponaris ed gilig na kawanan a layag to may too, diad tangan na kawanan a lima to, tan diad tangan na kawanan a sali to.

²⁶Samay pari mangipaterter na larak ed daklap na kawigin lima to

²⁷tan diad panamegley na tamoro na kawanan a lima to iwalsik tod man a mamimpito diad arapan na Katawan.

²⁸Mangipoyuk na daiset a larak ed saramay pasen ya angiponarisan to na dala: diad gilig na kawanan a layag to may too, diad tangan na kawanan a lima to, tan diad tangan na kawanan a sali to.

²⁹Say akeraan ed samay larak a walad daklap to et ipoyuk tod olo na samay too tan diad onya gawaen to so sirimonya na panlinis.

³⁰Insan mangisaklang na sakey ed saramay palekpek odino malangwer a malapati,

³¹a sakey a bagat a para kasalanan tan say sananey para bagat a popoolan a katekep toy bagat a trigo. Diad onya say pari gawaen toy sirimonya na panlinis.

³²Sikato ya so ganggan a sumpalen na toon walay sakit ton kating balet ag to nayarian ya isaklang so ingganan bagat a para panlinis to.

³³Say Katawan inter tod kinen Moises tan Aaron

³⁴iray onggendan a totontonen a nipaakar ed saray abung a nabobootan. (Sarayan totontonen et tombuken ira no saray totood Israel et akaloob la ra ed dalin na Canaan ya iter na Katawan ed sikara.)

³⁵Siopamay makalmo na boot ed abung to nepeg ya ibaga tod pari.

³⁶Say pari iganggan to ya ekalen iray amin a karga to may abung kasakbayan a laen ton nengnengen so boot; ta no ag da ra ekalen nasintinsiaan ira a marotak onung ed ganggan. Insan onlad samay abung so pari

³⁷ta nengnengen toy boot. No wala ray birdian odino balangaan a batek a singa kinmotlaung la rad dingding,

³⁸taynan to may abung tan italak ton pitoy agew.

³⁹Diad kumapiton agew ompawil ta nengnengen to lamet imay abung. No kinmayat imay boot,

⁴⁰iganggan ton saray bato ed kawalaan na samay boot et ekalen ira tan ibantak irad sakey a marotak a pasen onung ed ganggan diad paway na siudad.

⁴¹Kayari to ya, paekal to ray amin a palitadad dalem na abung tan paibantak to rad sakey a marotak a pasen diad paway na siudad.

⁴²Insan saray arum a bato la so isalat ed saramay baton nakal, tan palitadaan la na balo so dalem na abung.

⁴³No nabootan lamet imay abung kayarin nakal la ra may bato tan say palitada tan apalitadaan lay balo,

⁴⁴say pari laen ton nengnengen. No kinmayat imay boot, samay abung et marotak.

⁴⁵Nepeg a bagbagen la may abung; amin a bato to, saray kiew to, tan amin a palitada to et nepeg ya ibantak irad sakey a marotak a pasen diad paway na siudad.

⁴⁶Siopamay toon onloob ed abung legan ya akatalak et magmaliw a marotak ya anggad labi.

⁴⁷Siopamay toon ondokul odino mangan ed loob to may abung et nepeg ya ipesak toy kawes to.

⁴⁸No diad pannengneng na pari et ag la linmetaw so boot kayarin apalitadaan na balo imay abung, sintinsiaan na pari a malinis la onung ed ganggan imay abung lapud naandipat lan sigput so boot.

⁴⁹Diad panlinis ed samay abung onung ed ganggan, say pari mangala na duaran manok, pigaran poter na kiew a sidro, sakey ya ambalangan koldon, tan sakey a sangay isopo.

⁵⁰Pateyen to may sakey a manok ya akasalur so sakey a bangan nankargay danum ya inalad sobol.

⁵¹Insan to alaen ira may kiew a sidro, samay sangay isopo, samay ambalangan koldon, tan samay mabilay a manok tan isawsaw to ra ed dala na samay pinatey ton manok tan diad samay danum. Insan walsikan ton mamimpito imay abung.

⁵²Diad onya linisan to may abung diad panamegley na dala na samay manok, samay danum ya inalad sobul, samay mabilay a manok, saray poter na kiew a sidro, samay sangay isopo, tan samay ambalangan koldon.

⁵³Insan to ibolus ed paway na siudad diad kaalogan imay manok a mabilay. Diad onya gawaen toy sirimonya na panlinis na abung, a et magmaliw a malinis onung ed ganggan.

⁵⁴Sikara ya so ganggan a nipaakar ed saray sakit na baog;

⁵⁵saray giri, saray pelsa, odino saray babag, tan nipaakar met ed boot na kawes odino boot na abung.

⁵⁶

⁵⁷Sarayan ganggan ipaamta ra no marotak odino malinis so antokaman.