Read Pangasinan LEVITICO 15 Bible Online

LEVITICO 15 - Pangasinan bible

LEVITICO 15

¹"Say Katawan inter tod kinen Moises tan Aaron iray onggendan a totontonen

²"a nepeg a sumpalen na saray totood Israel. No say sakey a laki et walay ompapaway ed kayaryan to, manterterter man odino nababara,

³"marotak yan laki.

⁴"Say katrin dokulan to odino antokaman a yorungan to et marotak.

⁵"Siopamay makadiwit ed katri to yan laki

⁶"odino onirung ed inirungan to et nepeg ya ipesak toy kawes to tan manames, tan siansian marotak ya anggad labi.

⁷"Siopamay maniwit ed toon walay ompapaway ed kayaryan to et nepeg ya ipesak toy kawes to tan manames, tan siansian marotak ya anggad labi.

⁸"No say toon walay ompapaway ed kayaryan to et alukdaan toy toon malinis onung ed ganggan, sayan toon alukdaan et nepeg ya ipesak toy kawes to tan manames, tan siansian marotak ya anggad labi.

⁹"Say silyan yorungan na samay too et marotak.

¹⁰Siopamay makadiwit ed inirungan na samay too et marotak ya anggad labi. Siopamay mangawit na antokaman ya inirungan to may too et nepeg ya ipesak toy kawes to tan manames, tan siansian marotak ya anggad labi.

¹¹Siopamay toon nadiwit na lakin walay ompapaway ed kayaryan to ya ag ni nanoras na lima to, nepeg ya ipesak toy kawes to tan manames, tan siansian marotak ya anggad labi.

¹²Say bangan nadiwit na samay too et nepeg a betagen, tan say kiew a yaung a nadiwit to et nepeg ya orasan.

¹³Kayarin inmabig so lakin walay ompapaway ed kayaryan to, nepeg a manalagar na pitoran agew insan to ipesak so kawes to tan manames ed managagos a danum na sobul, et diad ontan sikato lay malinis onung ed ganggan.

¹⁴Diad kumawalon agew mangyakar na duaran palekpek odino duaran malapati diad lolooban na samay Tuldan Ayamay Katawan, ta iter to ra ed pari.

¹⁵Say pari ibagat toy sakey a para kasalanan tan say sakey ibagat ton popoolan. Diad onya gawaen toy sirimonya a panlinis ed too.

¹⁶No say sakey a laki et nampaterak, nepeg ya amesen toy intiron laman to, tan siansian marotak ya anggad labi.

¹⁷Antokaman a naplagan na samay impaterak to, abel man odino katat, nepeg ya ipesak, tan siansian marotak ya anggad labi.

¹⁸Kayari impanakdul na sanasawa nepeg a manames iran dua, tan siansia ran marotak ya anggad labi.

¹⁹No naliliberan so sakey a bii, siansian marotak a pitoy agew. Siopamay makadiwit na laman to yan bii siansian marotak ya anggad labi.

²⁰Antokaman a yorungan odino dokulan to legan na kaliliberan to et marotak.

²¹Siopamay makadiwit na katri to odino antokaman a yorungan to, nepeg ya ipesak toy kawes to tan manames, tan siansian marotak ya anggad labi.

²⁴Siopamay lakin miakdul ed sikato legan na kaliliberan to et naalisan na inkarotak to tan siansian marotak a pitoy agew, tan dinan man a katrin dokulan to et marotak.

²⁵No say sakey a bii et mampapadala ed pigaran agew anggaman ya aliwa lan agew na kaliliberan to, odino siansian mampapadala ni anggaman ya asumpal lay agew na kaliliberan to, siansian marotak legan a mampapadala, a singa inkarotak to legan na kaliliberan to.

²⁶Legan na pampapadala to say katri a dokulan to odino antokaman a yorungan to et marotak.

²⁷Siopamay makadiwit ed saraya et marotak; nepeg ya ipesak toy kawes to tan manames, tan siansian marotak ya anggad labi.

²⁸Katonda na pandadala to, nepeg a manalagar na pitoran agew, insan magmaliw a malinis onung ed ganggan.

²⁹Diad kumawalon agew samay manpapadala mangyakar ed pari na duaran palekpek odino duaran malangwer a malapati, diad lolooban na Tuldan Ayamay Katawan.

³⁰Say pari ibagat ton para kasalanan imay sakey a manok tan ibagat ton popoolan imay sakey tan diad onya gawaen toy sirimonya na panlinis ed samay bii.

³¹Say Katawan imbaga tod kinen Moises a pasakbayan to ray totood Israel nipaakar ed inkarotak da, pian ag da nadotakan so Tulda a walad pegley na kampo. No dotakan da nepeg a pateyen ira.

³²Sikara yay totontonen a nipaakar ed sakey a lakin walay ompapaway ed kayaryan to odino mampaterak,

³³tan nipaakar ed biin naliliberan, odino nipaakar ed lakin miakdul ed biin marotak onung ed ganggan.