Read Pangasinan LEVITICO 16 Bible Online

LEVITICO 16 - Pangasinan bible

LEVITICO 16

¹"Say Katawan akisalita ed kinen Moises kayari na impatey na saramay duaran lalakin anak nen Aaron ya inatey ira nen angisaklang ira na aliwan masanton apoy ed Katawan.

²"Inkuanto, Ibagam ed kinen agim ya Aaron a no manepeg a panaon labat so iyakar tod dalem na kurtina diad Sankasantosan a Pasen, ta ompanengneng ak diman ed sakey a lorem diad tagey na sakub na Kaban na Sipanan. No ag to ya toluken, nepeg a pateyen.

³"Nayarin onloob ed Sankasantosan a Pasen kayari ton angawit na kilaw a bakan kalakyan ya ibagat ton para kasalanan tan say sakey a karniron kalakyan ya isaklang a bagat a popoolan.

⁴"Insan say Katawan inter to ray onggendan a totontonen. Kasakbayan ya onloob ed Sankasantosan a Pasen si Aaron, nepeg a manames tan isolung to ray kawes na pari: say linen a kawes tan pantalon a potut, say balkes, tan say turban.

⁵"Saray Israelita mangiter ira ed kinen Aaron na duaran kanding a kalakyan ya ibagat a para kasalanan tan sakey a karniron kalakyan ya isaklang a bagat a popoolan.

⁶"Mangibagat na sakey a kalakyan a baka a pangekal ed saray dilin kasalanan to tan saray kasalanan da ray kabyangay pamilya to.

⁷"Insan to iyakar ed lolooban na Tuldan Ayamay Katawan ira may duaran kanding.

⁸"Diman to gawaen so pampapalaranan; ikana toy duaran bato a say sakey nanmarka na para Katawan tan say sakey para Azazel.

⁹"Si Aaron isaklang toy kanding ya apilin para Katawan tan ibagat ton para kasalanan.

¹⁰Say kanding ya apilin para Azazel iyapay ton mabilay ed Katawan tan ibolus tod kalawakan diad Azazel, pian naekal iray kasalanan na katoowan.

¹¹No ibagat nen Aaron imay bakan kalakyan a para saray kasalanan to tan saray kasalanan da ray kabyangay pamilya to,

¹²mangala na pananginay insinso a napnoy ngalab a nanlapud altar tan duaran akup a pinon insinso, insan awiten to ra ed loob na Sankasantosan a Pasen.

¹³Diman ed arap na Katawan iyan tod ngalab imay insinso, pian say asewek na samay insinso et nasaniban to may sakub na Kaban na Sipanan; ag to nanengneng ed satan imay sakub et ag ompatey.

¹⁴Mangala na daiset a dala to may baka tan diad panamegley na tamoro to iwalsik tod arap na samay sakub, insan mamimpito ton iwalsik so daiset a dala diad arap to may Kaban na Sipanan.

¹⁵Kayari to ya, pateyen to may kanding ya ibagat a para saray kasalanan da ray totoo. Awiten to ed Sankasantosan a Pasen so dala to tan iwalsik tod samay sakub, insan diad arap na samay Kaban na Sipanan a singa ginawa tod dala na samay baka.

¹⁶Diad onya, si Aaron gawaen toy sirimonya na panlinis ed samay Sankasantosan a Pasen lapud inkarotak na saray Israelita tan lapud kasalanan dan amin. Onyay nepeg ton gawaen ed samay Tulda, lapud manalalagey ed pegley na kampo a marotak onung ed ganggan.

¹⁷Anggapoy toon nepeg a manayam ed dalem na Tulda manlapud iloob nen Aaron ed Sankasantosan a Pasen a manggaway sirimonya na panlinis ya anggad ipaway to. Kayari ton gawaen so sirimonya a para sikato, para pamilya to, tan para amin ya Israelita,

¹⁸nepeg ya ompaway ya onlad altar a panagpoolan na saray bagat, ta linisan to. Nepeg a mangawit na daiset a dala to may bakan kalakyan tan daiset a dala to may kanding tan iporanis to ra ed saray pinagkasaklur na saray suyok na altar.

¹⁹Diad panamegley na tamoro to nepeg a mamimpito ton walsikan so tapew na altar. Diad onya, nalinisan to may altar ed saray kasalanan da ray totood Israel tan napasanto to.

²⁰No asumpal la nen Aaron a gawaen so sirimonya na panlinis ed Sankasantosan a Pasen, saray arum nin parti na Tuldan Ayamay Katawan tan say altar, iyapay tod Katawan imay kanding ya apilin para Azazel.

²¹Itapew ton duay lima to ed olo na samay kanding tan ipatua to dia iray amin a kaogsan, kasalanan, tan kasusumlang na saray totood Israel. Diad onya, niyalis to ra ya ed olo na samay kanding. Samay kanding et ibolus ed kalawakan na sakey a lakin apilin manggawa ed saya.

²²Samay kanding et awiten ton amin iray kasalanan da ray Israelita diad dalin ya ag natotoowan.

²³Insan si Aaron onloob ed Tulda, lakseben to ray kawes na pari ya insosolung to kasakbayan a linmoob ed Sankasantosan a Pasen, insan to la rad man taynan.

²⁴Nepeg a manames ed masanton pasen insan to isolung so dilin kawes to. Kayari to ya, ompaway, ta mangisablang na bagat a popoolan a mangekal na saray dilin kasalanan to tan saray kasalanan da ray katoowan.

²⁵Poolan tod tapew na altar so taba na ayep ya ibagat a para kasalanan.

²⁶Say toon angibolus na kanding ed kalawakan diad Azazel et nepeg ya ipesak toy kawes to tan manames kasakbayan ya ompawil ed kampo.

²⁷Say laman na samay baka tan samay kanding ya imbagat a para kasalanan a say dala ra et niakar ed Sankasantosan a Pasen a pangekal na kasalanan, et iyakar irad paway na kampo tan diman ira poolan. Say katat, say karni, tan saray pait et poolan ira.

²⁸Say toon mamool ed saraya et nepeg ya ipesak toy kawes to tan manames kasakbayan ya ompawil ed kampo.

²⁹Saray onggendan a totontonen et nepeg a tombuken ira ya anggan kapigan man a panaon. Diad kumaplon agew na kumapiton bulan, saray Israelita tan saray sangkailin manaayam ed kawalaan da et nepeg a manayuno ra tan ag ira mankimey.

³⁰Diad sayan agew gawaen so sirimonya a panlinis ed sikara ed saray kasalanan da, pian nalinisan ira onung ed ganggan.

³¹Sayan agew et masanton tuloy, kanyan saray totoo et nepeg a manayuno ra tan ag ira mankimey. Sarayan totontonen et nepeg a tombuken ira ya anggan kapigan man a panaon.

³²Say Pangulon Pari a nikonsagra tan nisaklang a salatan toy ama to et sikatoy manggawa na sirimonya na panlinis. Mansolung na saray kawes na pari

³³tan gawaen toy sirimonya na panlinis ed Sankasantosan a Pasen, saray arum nin a parti na Tuldan Ayamay Katawan, say altar, saray papari, tan amin ya Israelita.

³⁴Sarayan totontonen et nepeg a tombuken ya anggan kapigan man a panaon. Sayan sirimonya et nepeg a gawaen a maminsan ed sakey taon a panlinis ed amin a kasalanan da ray Israelita. Ginawa sirin nen Moises so ingganggan na Katawan.