Read Pangasinan LEVITICO 19 Bible Online

LEVITICO 19 - Pangasinan bible

LEVITICO 19

¹"Say Katawan kuantod saray Israelita diad panamegley nen Moises, Nepeg a masanto kayo, ta siak a Katawan a Dios yo et masanto.

³"Balang sakey ed sikayo et nepeg a pangalangan toy ina to tan say ama to, tan nepeg a ngilinan toy Agew na Panagpainawa, onung na ingganggan ko. Siak so Katawan a Dios yo.

⁴"Ag yo ak ikakaindan tan ag kayo mangigagalang ed saray talintaoy diriyos; ag kayo manggagawa na saray mital a diriyos insan yo ra pampikasian. Siak so Katawan a Dios yo.

⁵"No mamatey kayo na ayep ya ibagat a para kareenan, tombuk yo ray totontonen ya inter kod sikayo, et awaten koy bagat yo.

⁶"Say karni et nepeg a kanen diad agew na impamatey ed ayep odino diad ontombuk ya agew. Nepeg a poolan so karnin nakeraan ed kumatlon agew,

⁷"lapud marotak onung ed ganggan; no walay mansira ed sayan karni, ag ko awaten so bagat yo.

⁸"Siopamay mangan ed nakeraan a karni mankasalanan lapud panleglemew tod bengatlan masanto, tan ag la nibilang a sakey ed saray totook.

⁹"No manani kayod saray kaalogan yo, ag yo gagapasen iray walad saray gilig na kaalogan yo tan ag yo la papawilen a tortoren iray atilak-tilak.

¹⁰Ag yo totortoren iray atilak a bungay igos kayari yon mamborbor, ni dodokdoken iray napnaplag ed dalin; paolyan yo la ran para saray mairap-bilay odino saray sangkaili. Siak so Katawan a Dios yo.

¹¹Ag kayo mantatakew odino manasaol odino mantitila.

¹²Ag kayo mansisipan ed ngaran ko no ag yo lamlamang tooren; saya et makapangipelag ed kababaingan na ngaran ko. Siak so Katawan a Dios yo.

¹³Ag yo aanamutey pankanawnawa yod arum a too odino tatakewan yo. Ag yo aabalaen na anggan sanlabi so upa na siopaman ya impankimey yo.

¹⁴Ag yo aayewen so toon telek; ag kayo mangiiyan na antokaman a pakapateran na toon bulag. Takotan yo ak; siak so Katawan a Dios yo.

¹⁵Nepeg a maptek tan matonung so pangiter yoy sintinsia; ag yo kikilingan so toon mairap-bilay, ni tatakotan so toon mayaman.

¹⁶Ag yo tatalabutoben so siopaman, tan no walay toon nidalem ed korti a nayarin nasintinsiaan na patey, mantasi kayo no say pantasi yo et natulongan to. Siak so Katawan.

¹⁷Ag yo bobosulen so siopaman a too, no ag ingen mipulangan kayod sikato, pian ag kayo mankasalanan lapud sikato.

¹⁸Ag kayo ombabawi ed siopaman a too odino say ituloy yon bosulen, no ag ingen aro yo so kapara yon too a singa panangaro yo ed sikayon dili. Siak so Katawan.

¹⁹Onur yo ray ganggan ko. Ag yo pakakastaan so sakey ya ayep ed doman ayep. Ag kayo mantatanem na duaran nandomaan a bokel ed sakey ya alog. Ag kayo mangisosolung na kawes ya inabel ed duaran klasiy tinebey.

²⁰No akisipanan lan mikasal ed sakey a laki so sakey ya aripen a bii, et ag ni abayaran, ni nibolus, insan walay lakin miakdul ed sikato, nepeg a nadusa ran dua, balet ag nepeg iran pateyen, bangta sayan bii et sakey ya aripen.

²¹Samay lakin akiakdul mangyakar na karniron kalakyan diad lolooban na Tuldan Ayaman ko, ta bagat ton pambayar.

²²Diad panamegley na sayan karniro say pari gawaen toy sirimonya na panlinis a pangekal na kasalanan na samay laki, et pirdonaen na Dios.

²³No makasabi kayo la ed dalin na Canaan tan mangitanem kayo na anggan anton klasiy kiew a mambunga, nepeg yon ibilang a marotak onung ed ganggan iray bunga ra ed loob na ononan taloy taon. Diad loob na sayan panaon ag yo ra kakanen.

²⁴Diad kumapat a taon amin a bungay kiew et ibagat yo ran pangipanengneng na pisasalamat yod siak a Katawan.

²⁵Balet diad kumaliman taon nayarian yo lan kanen so bunga ra. No sumpalen yo ya, mambunga na dakel iray kakiewan yo. Siak so Katawan a Dios yo.

²⁶Ag kayo mangakan na karnin nandala ni. Ag kayo manggagawa na antokaman a panagbuyon odino panagsalamangka diad pananulong na maoges ya ispiritu.

²⁷Ag yo kakatlian so buek ed saray diking na olo yo, ni popotutan so balbas yo,

²⁸ni tatatakan so laman yo odino salsalgeran so laman yo lapud panermen yod inatey yo. Siak so Katawan.

²⁹Ag yo ipepelag ed kababaingan iray anak yon bibii lapud panggawa yod sikaran marotak a bibii ed timplo; no gawaen yo ya, onsingger kayo ed arum a diriyos tan say dalin napano na inmoralidad.

³⁰Ngilinan yo so Agew na Panagpainawa, tan pangalangan yo so pasen a panangigalangan ed siak. Siak so Katawan.

³¹Ag kayo miaalay simbawa ed saray totoon manangipanon ed saray ispiritu na inaatey. No gawaen yo ya, magmaliw kayon marotak onung ed ganggan. Siak so Katawan a Dios yo.

³²Itdan yoy lugar iray mamatakken tan igalang yo ra. Takotan yo ak a Katawan a Dios.

³³Ag yo panggagawaan na makapoy iray sangkailin manaayam ed dalin yo.

³⁴Ipasen yo ran singa pangipasen yod saray kapara yon Israelita, tan aro yo ran singa panangaro yod sikayon dili. Ag yo lilingwanan a sangkaili kayo met nen saman ed dalin na Egipto. Siak so Katawan a Dios yo.

³⁵Ag yo sasaolen so siopaman diad pangikana yoy masaol a sukatan, simbangan, odino bilangan.

³⁶Ikana yoy anggapoy saol a simbangan tan sukatan. Siak so Katawan a Dios yo, tan siak so angipaway ed sikayo manlapud Egipto.

³⁷Sumpal yo ray amin a ganggan ko tan saray bilin ko. Siak so Katawan.