Read Pangasinan LEVITICO 2 Bible Online

LEVITICO 2 - Pangasinan bible

LEVITICO 2

¹"No say sakey a too et mangisaklang ed Katawan na bagat a trigo, nepeg to nin gilingen a pagmaliwen ya arina. Patoroan to na larak na oliba tan tapewan to na insinso,

²"insan to iyakar ed saray paparin anak nen Aaron. Say parin mangibabagat et alaen toy sankaakup ed samay arinan pinatoroan na larak tan amin imay insinso insan to ra poolan ed tapew na altar. Sikato yay pakapatnagan a nibagat lan amin ed Katawan imay arina. Makapaliket ed Katawan so balingit na sayan bagat.

³"Kayaryan na saray papari so soluk ed sayan bagat a trigo; masanto yan tuloy, ta inala ed kakanen ya imbagat ed Katawan.

⁴"No say ibagat et tinapay a nilutod ornowan, nepeg ya anggapoy libadura to. Nayarin makapal ya inkames ed larak na oliba odino maimpis a pinoranisay larak na oliba.

⁵"No say ibagat et tinapay a nilutod bibingkaan, say arina nepeg ya ikames ed larak na oliba balet ag laukan na libadura.

⁶"Pingpinglisen insan patoroan na larak no iyapay a sakey a bagat.

⁷"No say ibagat et tinapay a nilutod kawali, say arina nepeg ya igawad larak na oliba.

⁸"Iyakar ya ibagat ed Katawan tan iter ed pari a sikatoy mangyakar ed altar.

⁹"Samay pari mangalay daiset ed samay bagat, insan to poolan ed tapew na altar. Sikato yay pakapatnagan a nibagat lan amin imay kakanen. Makapaliket ed Katawan so balingit na sayan bagat a kakanen.

¹⁰Kayaryan na saray papari so soluk ed sayan bagat; masanto yan tuloy, ta inala ed kakanen ya imbagat ed Katawan.

¹¹Amin a bagat a trigo ya iyapay yod Katawan et ag nepeg a laukan na libadura; ag kayon balut mangikakana na libadura odino dilo ed kakanen ya ibagat ed Katawan.

¹²Say bagat a trigo a manlapud ononan anien ed kapag taon et iyakar ed Katawan, balet ag nepeg a poolan ed tapew na altar.

¹³Laukan yo na asin iray amin a bagat a trigo, ta say asin mangilalaman na impisipanan na Dios ed sikayo. (Nepeg yon laukan na asin so amin a bagat yo.)

¹⁴No mangyakar kayod Katawan na bagat a trigo a manlapud ononan anien yo, mangibagat kayo na inigoban a trigo odino tinapung a trigo.

¹⁵Nepeg a patoroan na larak na oliba tan tapewan na insinso.

¹⁶Say pari poolan toy daiset a trigon pinatoroay larak tan amin imay insinso a pakapatnagan a nibagat la amin ed Katawan imay trigo; sakey yan bagat a popoolan.