Read Pangasinan LEVITICO 25 Bible Online

LEVITICO 25 - Pangasinan bible

LEVITICO 25

¹"Say Katawan akisalitad kinen Moises diad tagey na Palandey na Sinai tan ingganggan to

²"ya iter tod saray Israelita iray onggendan a totontonen. No makaloob kayo lad dalin ya iter ed sikayo na Katawan, nepeg yon igalang so Katawan diad ag yo pantanem ed dalin kapag kumapiton taon.

³"Taneman yon anem taon iray kaalogan yo, potutan yoy wakawakal na saray kaubasan yo, tan ani yoy bunga na saray tanaman yo.

⁴"Balet say kumapiton taon, sikatoy taon a pampainawan sigput na dalin, say taon a nisaklang ed Katawan. Ag yo tataneman iray kaalogan yo odino popotutan so wakawakal na saray kaubasan yo.

⁵"Ag yo anggan aanien iray trigon tinmubon bukor, tan ag yo boborboren so bunga na saray kaubasan ya ag yo pinotutan so wakawakal da; sikatoy taon a pampainawan sigput na dalin.

⁶"Anggaman ya ag adalusan so dalin ed satan a taon, itdan to kayo na kanen yo, saray aripen yo, saray uupaan yon totoo, saray sangkailin manaayam ed sikato,

⁷"saray amon ayayep yo, tan saray atap ya ayayep a wala rad kaalogan yo. Amin a bungan iter na dalin et nayarin pantagano.

⁸"Mambilang kayoy pitoran sampipiton taon, kanyan magmaliw ya apataplo tan siam a taon ya amin.

⁹"Insan diad kumaplon agew na kumapiton bulan, say Agew na Pangekal na Kasalanan, mangibaki kayo na sakey a lakin mamaknul na trumpita ed intiron bansa.

¹⁰Onyay pangibiig yod kumalimamplon taon tan pangibawag yoy kawayangan ed amin a manaayam ed dalin. Legan na sayan taon amin a kayaryan ya inlako nepeg ya ipawil ira ed gendat ya akankayaryan, odino diad saray kabyangay boleg to; tan balang toon inlakon aripen nepeg ya ompawil ed pamilya to.

¹¹Ag yo nepeg a taneman iray kaalogan yo odino anien iray trigon tinmotubun bukor; ag yo met boborboren so bunga na saray kaubasan ya ag yo pinotutan so wakawakal da.

¹²Nepeg ya ipasen yon masanto so intiron taon; kanen yo labat iray bungan iter na dalin.

¹³Diad sayan taon amin a kayaryan ya inlako nepeg ya ipawil ira ed gendat ya akankayaryan.

¹⁴Kanyan no mangilako kayoy dalin ed kapara yon Israelita odino manaliw kayod sikato, ag yo sasaolen.

¹⁵Say bili na dalin et nepeg ya itukoy ed karakel na taon a pakapambunga to kasakbayan na ontombuk a Taon na Panangipawil.

¹⁶No dakel niy taon, paatageyan yoy bili to; balet no daiset lay taon, paabebaan yoy bili, lapud say ilalako et say karakel na bungan iter na dalin.

¹⁷Ag yo sasaolen so kapara yon Israelita, no ag ingen takotan yo so Katawan a Dios yo.

¹⁸Onur yoy amin a ganggan tan bilin na Katawan, pian mambilay kayon arawid kaatapan ed dalin a panayaman yo.

¹⁹Say dalin mangiter na bunga to tan nawalaan kayo na amin a labay yon kanen tan mambilay kayod man ya arawid kaatapan.

²⁰Nayarin walay mantepet no antoy pambilay yo legan na kumapiton taon, ag taneman iray kaalogan tan ag borboren iray bungay tanaman.

²¹Say Katawan bindisionan toy dalin diad kumanem a taon pian magenap a pambilay a duay taon so iter ton tagano.

²²No mantanem kayod kaalogan yo no kumawalon taon, say pambibilay yo nid satan say naani yo ed kumanem a taon tan duga nin pambilay yo ya anggad pakaani yo lad intanem yo.

²³Say dalin ag nepeg ya ilakon anggad angga lapud ag yo kayaryan; say Dios so akankayaryan, tan singa kayo sangkailin naabuloyan a mangikana ed dalin.

²⁴No alako so dalin, nepeg a birbiren so kanepegan na gendat ya akankayaryan a manondon.

²⁵No mairap so bilay na sakey ya Israelita tan apilitan ya angilako na dalin to, say sankaasinggeran a kanayon to so manondon.

²⁶Say toon anggapoy kanayon ton manondon nayarin onaliguas ed arapen a panaon tan nayarian to lan dondonen.

²⁷No onyay nagawa nepeg ton iter ed toon analiw na dalin to so bili a kapetekan na saray taon a nakdaan a kasakbayan ya onsabiy Taon na Panangipawil, ta diad satan a taon et nipawil lamlamang ed sikato may dalin to.

²⁸Balet no anggapoy kuarta ton panondon ed dalin to, say dalin mansiansian kayaryan na analiw ya anggad onsabiy Taon na Panangipawil. Diad satan a taon say dalin nipawil ed gendat a makankayaryan.

²⁹No say sakey a too et mangilako na abung a walad dalem na pinadir a siudad, walay kanepegan ton manondon ed legay sakey taon manlapud agew na impangilako to.

³⁰Balet no ag to narondon legan na sakey taon, naandid sikatoy kanepegan a manondon, tan say abung magmaliw lan kayaryan ya anggad angga na analiw tan saray kabyangay boleg to; ag ipawil so abung ya anggan Taon na Panangipawil.

³¹Balet saray abung ed saray barion ag pinaliberay padir et ipasen ira a singa alog; say gendat ya akankayaryan walay kanepegan ton manondon, tan saray abung nepeg ya ipawil ira no Taon na Panangipawil.

³²Balet saray Levita walay kanepegan dan manondon, anggan kapigan, ed kayaryan da a walad dalem na saray siudad a nipabetang ed sikara.

³³No say sakey ya abung ed sarayan siudad et inlako na sakey a Levita tan ag arondon, nepeg ya ipawil no Taon na Panangipawil, lapud saray abung a kayaryan na saray Levita ed saray siudad da et kayaryan da ran anggad angga ed dalin na Israel.

³⁴Balet say dalin a panagpastolan ed kaliber-liber da ray siudad na Levita et nepeg ya ag balut ilako; kayaryan dan anggad angga.

³⁵No nagmaliw a mairap so bilay na kapara yon Israelita a kaabay yo tan ag to nayarian a bilayen so sikaton dili, nepeg yon itdan na pantagano to a singa pangiter yod toon uupaan yon mankimey, pian nayarian toy mansiansian manayam ed abay yo.

³⁶Ag yo pangaabangen; ingen toluk yoy Dios tan abuloyan yon manayam ed abay yo so kapara yon Israelita.

³⁷Ag yo pangaabangen ed kuartan ipabayes yod sikato, tan ag yo panotoboan ed kakanen ya ilako yod sikato.

³⁸Sikato yay ganggan na Katawan a Dios yo ya angipaway ed sikayo manlapud Egipto ta iter tod sikayoy dalin na Canaan tan magmaliw a Dios yo.

³⁹No magmaliw a mairap so bilay na kapara yon Israelita a kaabay yo tan ilako tod sikayo so sikaton dili ya aripen, ag yo pankikimeyen a singa sakey ya aripen.

⁴⁰Manayam ed sikayo a sakey a kumikimey a miuupa tan panlingkuran to kayo ya anggad Taon na Panangipawil.

⁴¹Diad satan a taon sikato tan saray anak to et taynan da kayo tan ompawil lad pamilya to tan diad kayaryan na saray lalaki to.

⁴²Saray Israelita et aripen ira na Katawan, tan impaway to ra manlapud Egipto; ag ira nepeg ya ilakon aripen.

⁴³Ag yo ra papairapen, no ag ingen toluk yo so Dios yo.

⁴⁴No nakaukolay yoy aripen manaliw kayo lad saray kaliber-liber a bansa.

⁴⁵Nayarin saliwen yo met iray anak na saray sangkailin manaayam ed dalin yo. Saratan ya anak a nianak ira ed dalin yo et nayarin magmaliw iran kayaryan yo,

⁴⁶tan nayarin ipatawir yo ra ed saray lalakin anak yo, a panlingkuran da ra legan dan mambilay. Balet ag yo nepeg a pairapen so siopaman a kapara yon Israelita ya agi yo.

⁴⁷No bilang ta minmayaman so sakey a sangkailin manaayam ed dalin yo, balet nagmaliw a mairap so bilay na sakey a Israelita tan ilako toy sikaton dili ya aripen ed sayan sangkaili odino diad sakey a kabyangay pamilya to,

⁴⁸no alako la, wala niy kanepegan ton narondon. Say sakey ed saray agagi ton lalaki

⁴⁹odino say pangamaen to odino say kapinsan to odino say sakey ed saray asingger a kanayon to so nayarin manondon ed sikato; odino no bilang ta akalmoy malaem, nayarin saliwen ton dili so kawayangan to.

⁵⁰Nepeg a mikuintaan ed angaliw ed sikato, tan bilangen da so karakel na taon a manlapud samay impangilako tod sikaton dili ya anggad arapen a Taon na Panangipawil; say bili na pakabolus to nepeg ya ipara ra ed upa na toon miuupa.

⁵¹Nepeg ya ipawil toy parti na impanaliw ed sikato onung ed bilang na saray nakdaan a taon,

⁵²

⁵³a singa sikatoy tinaon ya inupaan. Nepeg ya ag pairapen na amo to.

⁵⁴No ag narondon ed sayan polaing, sikato tan saray anak to et nibolus ed arapen a Taon na Panangipawil.

⁵⁵Ag nayarin naaripen ya anggad angga so sakey ya Israelita lapud saray totood Israel et aripen ira na Katawan. Impaway to ra manlapud Egipto; sikato so Katawan a Dios da.