Read Pangasinan LEVITICO 26 Bible Online

LEVITICO 26 - Pangasinan bible

LEVITICO 26

¹"Say Katawan kuanto, Ag kayo manggagawa na saray diriyos, ni mangipapaalagey na saray talintao, saray baton lusek, odino saray kinortin bato a galangen yo. Siak so Katawan a Dios yo.

²"Ngilinan yo ray agew na panagpainawa tan igalang yoy pasen a panangigalangan ed siak. Siak so Katawan.

³"No mambilay kayo onung ed saray ganggan ko tan onuren yo ray bilin ko,

⁴"mangipelag ak na oran no manepeg a panaon, pian makapangiter na bunga so dalin tan makapambunga ray kakiewan.

⁵"Diad karakel na bungay tanaman yo; manaani kayo ni anta panaon lay panagborbor na ubas, tan mamboborbor kayo niy ubas, anta panaon lay panagtanem na trigo. Nawalaan kayo na amin a labay yon kanen, tan mambilay kayon arawid kaatapan ed dalin a panayaman yo.

⁶"Itdan ta kayo na kareenan ed dalin yo, kanyan makaogip kayo ya anggapoy manigensigen ed sikayo. Paandipaten kod man iray masebeg ya ayayep ed takel, tan naandi lad may bakal.

⁷"Taloen yo ray kalaban yo;

⁸"say limarad sikayo taloen day sanlasus tan say sanlasus taloen day samplon libo.

⁹"Bindisionan ta kayo tan itdan ta kayo na amayamay ya anak; sumpalen koy kanepegan ko ed impisipanan kod sikayo.

¹⁰Diad karakel na anien yo sakey taon ya abastoen yo; ibantak yod satan so ombak a trigo yo, tan pambilay yo lay balo.

¹¹Manayam ak ed kawalaan yo diad masanton Tuldak tan ag ta kayon balut ipolisay.

¹²Olupen ta kayo; siak so magmaliw a Dios yo tan sikayo ray totook.

¹³Siak a Katawan a Dios et impaway to kayo manlapud Egipto pian ag ka yo la naaripen. Pinoter koy pakayarin angitelmer ed sikayo tan inabuloyan ta kayon manakar a maptek so kaoloan.

¹⁴Say Katawan kuanto, No ag yo ak dengelen tan ag yo onuren iray ganggan ko, nadusa kayo.

¹⁵No ag yo onuren iray ganggan tan saray bilin ko tan deralen yoy impisipanan kod sikayo,

¹⁶dusaen ta kayo. Ipadalan kod sikayoy deralsaray ag natambal a sakit tan say petang na laman a mamulag ed sikayo tan kalkalnan ton oyusey bilay yo. Mantanem kayo balet anggapoy nagonggona yo, ta saray kalaban yo so mangalad saray intanem yo.

¹⁷Sumlangen ta kayo pian natalo kayo; oleyan kayo na saray kalaban yo tan diad ontan lan kataktakot yo ombatik kayo anggan anggapoy mangoosil ed sikayo.

¹⁸No ag yo ak ni onuren kayari to ya, mamimpitoy belat na iyarum kon dusa yo lapud saray kasalanan yo.

¹⁹Patondaen koy ontan lan inkamapaatagey yo; anggapoy ompelag ya oran, et onmaga so dalin yo tan onawet a singa balatyang.

²⁰Anggapoy nagonggona yod pinasian pansagput yo, lapud ag mangiter na bunga so dalin yo tan ag mambunga so kakiewan yo.

²¹No siansia nin sumlangen yo ak tan ag yo ak ni onuren, mamimpito nin belat so iyarum ko lamet ed dusa yo lapud saray kasalanan yo.

²²Mangibaki ak ed sikayo na saray masebeg ya ayayep ed takel, tan pateyen da ray anak yo, deralen da ray baka yo, tan lapud dagdaiset ed sikayo so ikera ra magmaliw a begtebegtew iray dalan yo.

²³No kayari na sayan dusa et siansian ag yo ak ni dengelen, no ag ingen ituloy yo niy isusumlang ed siak,

²⁴sumpaen ta kayo tan mamimpito nin belat so iyarum ko lamet ed dusa yo lapud saray kasalanan yo.

²⁵Ipadalan kod sikayoy bakal a panusak ed sikayo lapud impaneral yo ed impisipanan kod sikayo, tan no mamtitipon kayon onamut ed dalem na saray siudad yo ipadalan kod sikayoy salot, et napasoot kayon onsuko ed saray kalaban yo.

²⁶Patondaen koy pangyakar na kakanen yo, kanyan say samploran bibii nakaukolan da labat so sakey ya ornowan a panggawaan dad amin a tinapay da. Ibunog day tinapay da ta no naakan yo lan amin, narasan kayo nin siansia.

²⁷No kayari na sayan dusa et siansian ag yo ak ni dengelen, no ag ingen ituloy yo niy isusumlang ed siak,

²⁸sumpaen ta kayod pasnuk ko tan mamimpito nin belat so iyarum ko lamet ed dusa yo lapud saray kasalanan yo.

²⁹Mapalaloy kaerasan yo kanyan kanen yo lay anggan saray dilin anak yo.

³⁰Deralen ko ray pasen a panangigalangan yo ed tapew na saray kapokdulan, igebak iray altar a panagpoolan yoy insinso, tan ibontuk kod saray atumtumban talintaoy diriyos iray bangkay yo. Diad gaway pasnuk ko,

³¹pagmaliwen kon aderalderal iray siudad yo, deralen ko ray pasen a panangigalangan yo, tan ag ko awaten iray bagat yo.

³²Sigput kon deralen so dalin yo kanyan nikelawan iray kalaban yon manayam diman.

³³Ipadalan kod sikayoy bakal tan itaytayak ta kayod saray arum a bansa. Nataynan so dalin yo, tan naderal-deral iray siudad yo.

³⁴Diad satan say dalin sigput a mampainawa ta ag yo impanpainawa; nataynan tan mampainawa legan a wala kayod dalin na saray kalaban yo.

³⁶Pagmaliwen ta kayon mapalalon matakot, sikayon nibantak ed arum a bansa, kanyan anggan diad kalasakas labat na bolung ombatik ki la. Ombatik kayon singa oosilan ed bakal tan natumba kayo, anggan anggapoy kalaban ed abay yo.

³⁷Mantatabunan kayod katumba yo ya anggan anggapoy onoosil ed sikayo, tan ag yo nalabanan iray kalaban yo.

³⁸Nibantak kayo ed arum a bansa tan diman kayo ompatey, diad pangakmon ed sikayo na dalin da ray kalaban yo.

³⁹Saray daiset a nakeraan ed sikayo diad dalin da ray kalaban yo et nakalkalnaan iran ompatey lapud dilin kasalanan yo tan lapud kasalanan na saray lalaki yo.

⁴⁰Balet saray kabyangay boleg yo ipatua da ray kasalanan da tan saray kasalanan da ray lalaki ra ya anumlang tan linmaban ed siak,

⁴¹tan anagyat ed siak ya onsumpad sikara tan mangibantak ed sikara diad dalin na saray kalaban da. Diad ontan, no saray kabyangay boleg yo et apaabeba la ra tan abayaran da la ray kasalanan da tan say insumlang da,

⁴²nunoten koy impisipanan kod kinen Jacob, tan diad kinen Isaac tan diad kinen Abraham, tan pasimbaloen koy sipan ko ya iter kod saray totook so dalin.

⁴³Balet nakaukolan nin say dalin et naandian na totoo pian makapampainawan sigput, tan saray totoo et bayaran da niy impangipolisay dad saray ganggan ko tan saray bilin ko.

⁴⁴Balet anggaman ontan, no wala ni rad dalin na saray kalaban da, ag ko ra sigput ya ikaindan, ni deralen. Ta no sigput ko ran ikaindan mangangga so impisipanan kod sikara, et siak so Katawan a Dios da.

⁴⁵Pasimbaloen koy impisipanan kod saray lalaki ra nen impanengneng kod amin a bansa so pakayarik diad impangipaway kod saray totook manlapud Egipto, pian siak a Katawan so magmaliw a Dios da.

⁴⁶Amin da ra ya et sikaray ganggan tan bilin ya inter na Katawan ed kinen Moises diad tagey na Palandey na Sinai; nepeg ira yan onuren na saray totood Israel.