Read Pangasinan LEVITICO 4 Bible Online

LEVITICO 4 - Pangasinan bible

LEVITICO 4

¹"Say Katawan ingganggan toy Moises

²"ya ibaga tod saray Israelita a siopaman ed sikara so ag to ginagalay nankasalanan ta asumlang toy anggan dinan ed saray ganggan na Katawan, et nepeg a sumpalen to ray onggendan a totontonen.

³"No say Pangulon Pari so nankasalanan tan impilanur to ray katoowan, nepeg a mangyapay na sakey a kilaw a bakan kalakyan ya anggapoy deral na laman to, insan ibagat ed Katawan a para kasalanan to.

⁴"Iyakar tod lolooban na Tulda imay baka, itapew tod olo na baka so lima to, insan to pateyen diman diad arap na Katawan.

⁵"Insan samay Pangulon Pari mangala na daiset a dala to may baka tan inyakar tod dalem na Tulda.

⁶"Idelnet toy tamoro to ed samay dala insan to iwalsik a maminpito diad arap na masanton kurtina.

⁷"Insan mangyan na daiset a dala ed saray pinagkasaklur ed saray suyok na altar na insinso diad dalem na Tulda. Say keran dala iyibung tod leksab na altar a panagpoolan na saray bagat; sayan altar et walad lolooban na Tulda.

⁸"Alaen toy amin a taba na samay baka, say tabad saray loob-loob,

⁹"saray batuk a pati taba ra, tan say sankaabigan a parti na altey.

¹⁰Alaen na samay pari so sayan taba tan poolan tod tapew na altar a panagpoolan na saray bagat a singa gagawaen to ed taba na ayep ya imbagat a para kareenan.

¹¹Balet alaen na samay pari so katat na ayep, say intiron laman to, say olo to, saray sali to, tan saray loob-loob to a pati saray pait to,

¹²insan to iyakar iran amin ed paway na kampo diad pasen a malinis onung ed ganggan a diay bantakay dapol. Diman to ra poolan ed sakey a bunton na kiew.

¹³No amin ya Israelita so nankasalanan ta asumlang dan ag ginagala so sakey ed saray ganggan na Katawan,

¹⁴tan no akabatan la imay kasalanan ya agawa, saray katoowan mangisaklang ira na kilaw na bakan kalakyan a sakey a bagat a para kasalanan. Iyakar da so baka diad Tuldan Ayamay Katawan;

¹⁵saray pangulo na saray baley itapew dad olo na samay baka so kalimaan da, tan diman da pateyen imay baka.

¹⁶Say Pangulon Pari mangala na daiset a dala tan iyakar tod dalem na Tulda;

¹⁷idelnet toy tamoro tod samay dala, insan to iwalsik a mamimpito ed arap na kurtina.

¹⁸Insan mangyan na daiset a dala diad saray pinagkasaklur ed saray suyok na altar na insinso diad dalem na Tulda. Samay keran dala iyibung tod leksab na altar a panagpoolan na saray bagat; sayan altar et walad lolooban na Tulda.

¹⁹Insan to alaen iray amin a taba to may baka tan poolan tod tapew na altar.

²⁰No antoy gawaen tod bakan kalakyan ya ibagat a para kasalanan ontan met so gawaen tod sayan bakan kalakyan; onya so pangisaklang toy bagat a para kasalanan da ray katoowan, et napirdona so kasalanan da.

²¹Insan to iyakar ed paway na kampo so baka tan poolan to a singa pamool tod bakan kalakyan a nibagat a para kasalanan to. Sikato ya so bagat a mangekal na kasalanan na katoowan.

²²No say manoley so nankasalanan ta asumlang ton ag ginagala so sakey ed saray ganggan na Katawan,

²³tan no nipakabat la ed sikato so kasalanan ya agawa to, mangyakar na kanding a kalakyan ya anggapoy deral na laman to insan to ibagat.

²⁴Itapew tod olo na samay ayep so lima to, insan to pateyen ed nibaybay na altar a diay panamateyan ed saray ayep ya isaklang a bagat a popoolan. Sikato yay bagat a pangekal na kasalanan.

²⁵Say pari idelnet toy tamoro to ed dala na ayep, iponaris to may dalad tamoro to ed saray pinagkasaklur ed saray suyok na altar a panagpoolan na saray bagat, tan iyibung tod leksab na altar so kerad samay dala.

²⁶Insan to poolan ed altar iray amin a taba to may ayep a singa pamool tod taba na saray ayep a pinatey ya ibagat a para kareenan. Diad onya say pari isaklang toy bagat a para kasalanan na samay manoley, et napirdona yan manoley.

²⁷No say sakey ed saray karaklan a too so nankasalanan ta asumlang ton ag ginagala so sakey ed saray ganggan na Katawan,

²⁸et no nipakabat la ed sikato so kasalanan ya agawa to, mangyakar na kanding a kabatyan ya anggapoy deral na laman to insan to ibagat.

²⁹Itapew tod olo na samay ayep so lima to, insan to pateyen ed nibaybay na altar a diay panamateyan ed saray ayep ya isaklang a bagat a popoolan.

³⁰Say pari idelnet toy tamoro to ed dala na ayep, iponaris to may dalad tamoro to ed saray pinagkasaklur ed saray suyok na altar a panagpoolan na saray bagat, tan iyibung tod leksab na altar so kerad samay dala.

³¹Ekalen to ray amin a taba to may ayep a singa pangekal ed taba na saray ayep a pinatey ya ibagat para kareenan, insan to ra poolan ed tapew na altar. Makapaliket ed Katawan so balingit na sayan bagat. Diad onya say pari isaklang toy bagat a para kasalanan na sakey a too, et napirdona yan too.

³²No say sakey a too et manyakar na sakey a kordiro ya ibagat ton para kasalanan, nepeg a sakey a kabatyan ya anggapoy deral na laman to.

³³Itapew tod olo na samay ayep so lima to insan to pateyen ed nibaybay na altar a diay panamateyan ed saray ayep ya isaklang a bagat a popoolan.

³⁴Say pari idelnet toy tamoro to ed dala na ayep, iponaris to may dalad tamoro to ed saray pinagkasaklur ed saray soyuk na altar a panagpoolan na saray bagat, tan iyibung tod leksab na altar so kerad samay dala.

³⁵Ekalen to ray amin a taba to may ayep a singa pangekal ed taba na saray ayep a pinatey ya ibagat para kareenan, insan to ra poolan ed tapew na altar a pati saray bagat a popoolan a nisaklang ed Katawan. Diad onya say pari isaklang toy bagat a para kasalanan na sakey a too, et napirdona yan too.