Read Pangasinan JEREMIAS 48 Bible Online

JEREMIAS 48 - Pangasinan bible

JEREMIAS 48

¹"Sikato yay inkuan na Katawan a Makapanyarin-amin nipaakar ed Moab: Kaskasian iray totoo ed Nebo aderal so baley da! Adakep so Kiryataim, ageba so mabiskeg a tirinsira to, tan abaingan ed kababaingan iray totoo to;

²"naandi lay kagalangan nen Moab. Adakep na saray kalaban so Hesbon tan mankokomplut iran maneral ed bansa na Moab. Ag makaesel so baley na Madmen; onsulong iray sondalo sumpad sayan baley.

³"Oneeyag iray totood Horonaim, Panagduksa! Panagderal!

⁴"Aderal so Moab; dengel yo ray ogogaw a manakakis.

⁵"Diad dalan a mamaatagey ed Luhit dengel yoy pandageyem da; diad dalan a mamaleksab ed Horonaim, dengel yoy pannangnangis dad kaermenan.

⁶"Ganatan yo, iyagel yoy bilay yo! kuanda. Batik kayon singa asnod kalawakan!

⁷"Moab, nanmatalek kad biskeg tan kayamanan mo, balet natan pati sika so naalan nadakep, naalan nibantak ed arum a bansa so dios mon Camos, naala met iray pati prinsipi to tan saray papari to.

⁸"Anggapoy anggan sakey a baley a makapaliis ed panagderal; naderal iray patar tan kaalogan. Siak, say Katawan, so nansalita.

⁹"Iparaanan yoy pantion so Moab; ag mabayag naderal la; Nataynan ya aderal-deral iray baley to, tan anggapo lay manayam diman. (

¹⁰Nisamba so toon ag mankolin mankimey para Katawan! Nisamba so toon ag to ikakanay ispada tod pampatey!)

¹¹Say Katawan inkuanto, Arawi lawas ed kaatapan so Moab, tan ag balut nibantak ed arum a bansa. Say Moab et singa alak ya ag nagagalaw ed akapanginan tan ag balut nibabales-bales ed nandodoman pasig. Ag balut aderal so taway to tan ag naomay samit na taway to.

¹²Kanyan sirin, onsabiy oras a mangibaki ak na saray totoon mangibung ed Moab a singa alak. Paekatan da ray pasig ton pananginay alak, insan da ra mekmeken.

¹³Diad satan saray taga Moab ibaing day dios dan Camos a singa samay inkabaingan da ray Israelita ed Betel, sakey a dios a nanmatalkan da.

¹⁴Lalakin taga Moab, akin et ipapasen yoy sikayon dili a palbayani, masebeg a sondalon asali la rad bakal?

¹⁵Aderal so Moab tan saray siudad to; apatey iray sankamaungan a mamalangwer ton lalaki. Siak so ari a Katawan a Makapanyarin-amin, tan siak so nansalita.

¹⁶Onsasabi lay kadusa na Moab; magano lan onsabi so kaderal to.

¹⁷Panermenan yo man a bansa, sikayon manaayam ed kaliber-liber to. Amin yon makaamta ed inkabantug to; Kuanyo, Apoter lay makapanyarin panooley na Moab; naandi lay kagalangan tan biskeg to.

¹⁸Sikayon manaayam ed Dibon, epas kayod tad pasen a kawalaay kagalangan yo tan yorung kayod dabuk; wadya lay managderal na Moab, tan dineral to ray tirinsira to.

¹⁹Sikayon manaayam ed Aroer, manalagey kayod gilig na dalan tan manalagar kayo; tepetan yo ray ontataynan no antoy agawa.

²⁰Naplag la so Moab, so iyebat da, nangisan yo; napelag lad kababaingan. Ibawag yod gilig na Ilog na Arnon ya aderal la so Moab!

²¹Sinmabi lay sintinsia ed saray siudad ed patar; diad Holon, Jahzah, Mefat,

²²Dibon, Nebo, Bet-diblataim,

²³Kiryataim, Bet-gamul, Bet-meon,

²⁴Kiryot, tan Bosra. Sinmabi lay sintinsia ed amin da ray siudad na Moab, arawi may asingger.

²⁵Nakal lay biskeg na Moab, aderal lay pakayari to. Siak, say Katawan, so nansalita.

²⁶Inkuan na Katawan, Buek yo so Moab, ta linmaban ed siak. Pandokulan toy dilin ota to, tan elek-elekan na saray totoo.

²⁷Moab, nanunotan mo no panoy impanluludlurey mod saray totood Israel? Impapasen mon kaolup ira na saray matakew, kanyan mameyeng-peyeng ka kapag nasalitam ira.

²⁸Sikayo ran taga Moab, taynanan yo ray baley yo! Laka yon manayam ed saray diking na kapalandeyan! Alig yo ray palekpek-punay a manobung ed saray gilig na kelas.

²⁹Mapalalon mapaatagey so Moab! Nadngelan kon mapaatagey, ag mangitaltalek, tan malastug iray totood Moab. Atagtagey so panangipasen dad sikaran dili.

³⁰Siak a Katawan amtak so inkamapaatagey da. Andi-kakanaan so panagpaatagey da tan ag mansiansia ray gagawaen dan bengatla.

³¹Kanyan nangisan kon amin iray taga Moab tan saray totood Kireres.

³²Mapalalo niy pannangis kod saray taga Sibma nen saray taga Jazer. Siudad na Sibma, singa ka ubas a saray sangam et labsanan day Inatey a Dayat tan sabien day Jazer. Balet natan aderal iray bungam ed panaoy tiagew tan saray masasamit ya ubas mo.

³³Naandi ray liket tan gayaga ed mabonan dalin na Moab. Ag ko la papaagosen so alak a manlapud panagpespesan na ubas; anggapo lay manggawa na alak tan anggapo la ray oneyag ed liket.

³⁴Maneeyag iray totoon taga Jesebon tan Eleale, tan narengel ya anggad Jahaz so eyag da; narerengel na saray taga Zoar, Horonaim, tan Eglat-selisiya. Nakatan so anggan say Kolus na Nimrim.

³⁵Patondaen ko ray taga Moab ed pangisasaklang dad saray bagat a popoolan diad saray pasen na panangigalangan da tan say pangibabagat dad saray diriyos da. Siak, say Katawan, so nansalita.

³⁶Singa ak toon manotogtog ed plauta na sakey a togtog a para tolur diad pannanangis kod Moab tan saray totood Kireres, ta naandi ya amin so kayaryan da.

³⁷Kinikiskisan dan amin so olo ra tan pinopotut day balbas da. Sinasalger day kalimaan da tan nankakawes na sako so balang sakey ed sikara.

³⁸Diad amin a toktok na abung ed Moab tan diad amin a plasa to, akis na kaermenan labat so narerengel lapud binetag kon singa pasig so Moab kanyan anggapo lay malabay.

³⁹Abetag-betag lay Moab! Eyag kayo! Naplag lad kababaingan so Moab. Aderal la, tan luludlureyan na amin a kaliber-liber ton bansa. Siak, say Katawan, so nansalita.

⁴⁰Say Katawan insipan to a sakey a bansa so onsibar a singa agila ed Moab ya akabuskag iray payak to,

⁴¹tan nadakep iray baley tan saray tirinsira. Diad satan ya agew ontakot a singa biin mampapasakit iray sondalo na Moab.

⁴²Naderal so Moab tan magmaliw ya aliwa lan bansa, lapud linmaban ed siak.

⁴³Onsabiy takot ed saray taga Moab tan manaalagar ed sikara iray abut, tan saray patit. Say Katawan so nansalita.

⁴⁴Siopamay ibatikan toy takot napelag ed saray abut, tan siopamay makaagwat ed saray abut naalad saray patit, ta ingganak lay panaon na pakaderal na Moab.

⁴⁵Saray totoon pangaskasiyan ya akabatik salien day paiyagel ed Hesbon, say siudad ya aminsan inoleyan nen Ari Sihon, balet napopoolan. Tinemek na apoy iray tirinsira tan saray kapalandeyan na saray totood Moab a maliket irad bakal.

⁴⁶Pangaskasiyan iray taga Moab! Inaatey iray totoon angigalang ed dios a Camos, tan nalan priso iray anak dan lalaki tan bibii.

⁴⁷Balet diad saray agew ya arapen say Katawan pagmaliwen ton maaligwas lamet so Moab. Sikato yay sintinsia ya inter na Katawan ed Moab.