Read Pangasinan SARAY TAGLEEY 3 Bible Online

SARAY TAGLEEY 3 - Pangasinan bible

SARAY TAGLEEY 3

¹"Siak no sakey ed saray makaamta no antoy kabaliksan na pananusa na Dios.

²"Sinonson to ak lan sinonson ed kabilongetan ya anggapo lan balut so liwawa.

³"Tan andi-panangasin binabakbak to ak lan binabakbak.

⁴"Sinusugat to ak ya anggad pinmapaway so laman ko, tan pinopoter to ray pokel ko.

⁵"Impokuk to ak a pangaskasiyan ed kairapan diad dalem na prisowan.

⁶"Pinasoot to ak ya impanayam ed ambilonget a pasen tan singa ak abayag lan inatey.

⁷"Ginolunggolungan to ak na baleg; pinadir to so kaliber-liber ko, kanyan ag ak makabatik.

⁸"Kinmerew ak na tulong, balet ag ak dinengel na Dios;

⁹"Mandongilngil ak a manakar; anggan iner a pasen so arapen ko walay akasaran padir a bato.

¹⁰Singa uson mantatalaran ed siak; singa lion ya anegkem ed siak.

¹¹Inosilan to ak ed dalan, biningbingkas to ak, insan to ak tinaynan.

¹²Pininat toy pana to tan impagmaliw to ak a kekenaen na saray pana to.

¹³Pinmanek ed pusok so pana to.

¹⁴Nagmaliw ak ya elek-elekan lawas na katoowan; siak so gagalaw-galawen dan amin.

¹⁵Kapaitan na kairapan ya amin so inter tod siak a kakanen tan iinomen.

¹⁶Impangpang toy ngipen ko ed saray baton-dampay, tan inngorangor toy lupak ed dalin.

¹⁷Alingwanan koy kabaliksan na abig-laman tan kareenan tan liket.

¹⁸Nakalan ak lay pilalek a mambilay; naandi lay ilalok ed Katawan.

¹⁹Ampait ya apgo so pakanunot kod kairapan a liliknaen ko, tan say inkaandian koy abung.

²⁰Pinunot ko ya lawas, et nalmay so kamarerwak.

²¹Balet pinmawil so ilalok nen anunotan ko yan bengatla:

²²Ag mangangga so ag mangoman a panangaro tan panangasi na Katawan.

²³Balo ra lawas a singa kabwasan; agaylay inkatoor na Katawan.

²⁴Say Katawan labat so walad siak, kanyan diad sikato so kawalaay ilalok.

²⁵Maung so Katawan ed amin a totoon manmamatalek ed sikato;

²⁶Maung so mananos a manalagar ed panangilaban na Katawan.

²⁷Maung a naaralan na sakey a too so mananos manlapud inkaogaw to.

²⁸No manirap itayo, nepeg a mananos tan mandeen itayon bukbukor.

²⁹Ag tayo nepeg so manriklamo, ta ag la pigan wala niy ilalo tayo.

³⁰Nepeg ya akoen tayoy amin a panamabaing tan panagkabil dad sikatayo.

³¹Mapangasi so Katawan tan ag to itayo ikaindan ed ando lan ando.

³²Anggaman a panermenen to itayo, kasian to tayo onung na daakan ya ag mangoman a panangaro to.

³³Ag to panliketan so pamasakit odino pamaermen tod sikatayo.

³⁴Amta na Katawan no maniirap so ispiritu tayo ed dalem na prisowan;

³⁵Amta to no ag niniiter ed sikatayo iray inter tod sikatayon kanepegan;

³⁶Amta to no napipikewet ed korti so katonungan.

³⁷Say linawa labat na Katawan so nasusumpal.

³⁸Diad panangiganggan na Sankatageyan a Dios, nagawa so maung tan say makapoy.

³⁹Akin et naynay itayon manriklamo no nadudusa itayo lapud kasalanan tayo?

⁴⁰Sukimaten tayoy kabibilay tayo, insan ompawil itayod Katawan.

⁴¹Lokasan tayoy puso tayo ed Dios a walad tawen, tan mampikasi tayo,

⁴²Nankasalanan tan linmaban kami, et ag mo kami pinirdona, O Katawan.

⁴³Inosilan mo kami tan andi-panangasin pinapatey mo kami; asaniban na pasnuk mo so panangasim.

⁴⁴Sinmanib kad lorem na pasnuk, kanyan ag makasabi ray pikakasi mi.

⁴⁵Ginawa mo kamin bantakan na dotak na saray katoowan ed mundo.

⁴⁶Pabpabaingan tan ludlureyen kami na amin da ray kalaban mi.

⁴⁷Dinalan kami la na deral tan desyang; mambibilay kamin walad kaatapan tan takot.

⁴⁸Singa ilog ya onaagos so luak lapud inkaderal na saray totook.

⁴⁹Ag ontondan onagos so luak

⁵⁰Ya anggad osdungan a nengnengen itayo na Katawan a walad tawen.

⁵¹Nanaermenay pusok diad pakanengneng kod nansumpalan da ray bibii ed siudad.

⁵²Singa ak manok ya apatitan na saray kalaban kon mamobosul ed siak anggaman ya anggapoy makasengeg.

⁵³Impelag da ak a mabilay ed dalem na bobun, insan da sinakuban na bato so sangab.

⁵⁴Ngalngali ak la onlereg ed danum, et abaloan kon ompatey ak la.

⁵⁵Manlapud dalem na bobun tinmawag ak ed sika, O Katawan,

⁵⁶Dinengel mo ak nen kinerew kod sikan talinengen moy kerew ko.

⁵⁷Inebatan mo ak tan imbagam ed siak ya ag ak ontakot.

⁵⁸Inyagel mo ak, Katawan, tan inlaban moy bilay ko.

⁵⁹Amtam so makapoy ya agawad siak; siak pa so pilaan mo ed panintinsiam.

⁶⁰Amtam so pamobosul ed siak na saray kalaban ko, tan say pankokomplut da sumpad siak.

⁶¹Nadngel moy panamabaing dad siak, O Katawan; amtam iray pankokomplut da sumpad siak.

⁶²Sanagew a pantotongtongan da ak tan mamplaplano ra.

⁶³Manlapud kabwasan ya anggad labi, luludlureyen da ak.

⁶⁴Dusam pa ra, O Katawan, lapud saray ginawa ra;

⁶⁵Isambam pa ra tan itdan mo pa ra na anawet a puso!

⁶⁶Osilan mo ra tan paandipat mo ra ed tapew na dalin!