Read Pangasinan SARAY TAGLEEY 4 Bible Online

SARAY TAGLEEY 4 - Pangasinan bible

SARAY TAGLEEY 4

¹"Binmurarog la so kirlap na balituk tayo; ataytayak ed saray dalan iray bato na Timplo;

²"Mablin singa balituk iray lalakin tobun-balo ed Sion nen saman, balet natan nibibilang iran singa saray ordinarion banga.

³"Papasusoen na anggan inan asod katakelan iray anak da, balet singa saray abistrus ed kalawakan a maruksa rad sibong da iray totook.

⁴"Inabuloyan dan inaatey ed eras tan inkapgaan iray anak dan kapangyanak; mikekerew na nakan iray anak da, balet anggapoy mangiter ed sikara.

⁵"Ompapatey ed eras diad saray dalan iray totoon gendat a maung so kakanen da; manaanap ed basuraan na napambilay da iray totoon binmaleg ed inawa.

⁶"Ambelat niy impakadusa na saray totook nen say impakadusa na saray totoo Sodoma, a biglay inkaplag da ed limay Dios.

⁷"Anggapoy dotak da ray prinsipi tayo nen saman tan malinis iran singa yilo, maung iran impanlaman tan mabiskeg ira, balibaliy abiglaman da.

⁸"Diad saray dalan ag la ra nabirbir natan, ta dinmeket a singa oring so kalupaan da; singa amagan kiew lay baog dan kinmomanet tan kapokepokel la ra.

⁹"Maung niy kipapasen da ray inaatey ed bakal nen saray inaatey ed eras; nankalkalnan naoyus so linawa ra, lapud anggapoy napambilay da.

¹⁰Makapataktakot so intaruk na desyang a sinmabi ed saray totook; inlalambung na saray maaron ina iray dilin anak da.

¹¹Impelag na Katawan so intiron biskeg na petang na olo to; pinoolan to ya anggad dalin so siudad na Sion.

¹²Anggapoy siopaman ed anggan iner a pasen, anggan saray manoley ed saray arum a bansa, so anisian walay kalaban a makaloob ed saray puirta na Jerusalem.

¹³Balet onyay agawa lapud nankasalanan iray propita to tan saray papari to, ta sikaray makasengeg na impatey na saray anggapoy kasalanan a totoo.

¹⁴Singa bulag a nanakar-akar ed dalan iray pangulo to, naames iray dala, kanyan anggapoy malabay a maniwit ed sikara.

¹⁵Arawi kayo! eyag da ray totoo. Marotak kayo! Ag yo kami didiwiten! Kanyan nanakar-akar irad saray bansa, ta anggapoy malabay a mamatuloy ed sikara.

¹⁶Anggapo lay pannunot na Katawan ed sikara; sikaton diliy angikaykayat ed sikara. Anggapo lay panagasasikaso tod saray papari tan saray pangulo tayo.

¹⁷Nananap kami lan nananap na tulong, balet anggapo met lamlamang. Nanalagar kami lan nanalagar na tulong na sakey a bansa, balet anggapo met lamlamang so nitulong to.

¹⁸Babantayan kami na kalaban; ag kami anggan makakar ed saray dalan. Sinmabi lay oras mi, sinmabi lay anggaan mi.

¹⁹Maples nen say agila ed liwang iray onoosil ed sikami. Inosilan da kamid kapalandeyan; tinambangan da kamid kalawakan.

²⁰Narel day sobul na bilay mi, say arin pinili na Katawan; sikatoy manoley a nanmatalekan min mangyagel ed sikami ed anggan siopan ondogpad sikami.

²¹Manliket tan manggayaga kayo, sikayon taga Edom tan Uz. Onsabi met ed sikayoy deral, mandongilngil kayo met a manakar-akar ya anggapoy kawes.

²²Nambayar lay Sion na kasalanan to; ag kami la nibantak ed arum a bansa. Balet sika Edom, dusaen ka na Katawan; ibawag toy kasalanan a gagawaen mo.