Read Pangasinan ESTEREpistle of Jeremiah 1 Bible Online

ESTEREpistle of Jeremiah 1 - Pangasinan bible

ESTEREpistle of Jeremiah 1

¹"Sikato yay kopia na sulat ya impawit nen Jeremias ed saray totood Jerusalem kasakbayan na inkadakep ed sikara na ari na Babilonia tan inkiakar dad Babilonia. Diad sayan sulat, nilogan iray bengatlan ingganggan na Dios ed kinen Jeremias ya ibaga tod saray totood Jerusalem.

²"Nankasalanan kayod Dios. Sikato yay makasengeg a si Ari Nabucodonosor et ngalngali to kayo la alaen a priso tan iyakar ed Babilonia.

³"Mansiansia kayod man a priso legan na amayamay a taon, anggad kumapiton kailalakan; insan mareen so pamapawil na Dios ed sikayo manlapud Babilonia.

⁴"Diad Babilonia nanengneng yo ray diriyos ya agawad kiew, pilak, tan balituksaray diriyos a sasakbaten na totoo ed takeb da tan panaarien toy takot ed saray totoon pagano.

⁵"Nepeg a manalwar kayo ya ag yon balut aaligen ira may Hintil. Ag yo aabuloyan iray diriyos da a panarien dad sikayo so takot no nanengneng yo ran sasakbaten ed libut tan nigagalang.

⁶"Ingen, ikuanyod sikayon dili, Bukor mo labat, Katawan, so nepeg min igalang.

⁷"Niwalad man ed sikayo so anghil na Dios; asikasoen to kayo.

⁸"Naokupan na pilak tan balituk iray talintaoy diriyos da tan ginawa na saray marunong a kumikimey iray dila ra. Balet aliwa ran peteg a diriyos, tan ag ira makasalita.

⁹"Saray totoo et manggagawa ra na balituk iran korona tan itotoon dad kaolowan na saray diriyos da, a sarayan talintao et singa ra bibiin labalabay da ray alahas.

¹⁰No maminsan tatakewen na saray papari so pilak tan balituk ed saray diriyos da tan igagastos dan para sikaran dili;

¹¹iyaapag da ni ingen iray bibiin marotak a walad timplo. Aalaen na saray totoo ira yan kiew, pilak, tan balituk a diriyos da, insan da ra kakawesan, a singa ra totoo.

¹²Balet anggaman a nasolungan ira na saray purpuran kawes a singa ra arari, ag da nin siansia niagel so sikaran dili ed pakarotakan odino pakataboney da.

¹³No ompeket so dabuk a manlalapud timplo ed saray lupa ra, nepeg a walay toon mamponas a mangekal ed samay dabuk.

¹⁴Singa ra totoon huis a sankabembenan da ray sitro, balet anggapoy pakayari ran manusa ed siopaman a manggagaway makapoy ed sikara.

¹⁵No maminsan wala ray punyal tan wasay ed lima ra, balet ag da niagel so sikaran dili ed pakaderal no bakal odino diad pakapangibatik ed sikara na saray matakew.

¹⁶Sikara yan amin so mamapaneknek ya aliwa ran diriyosag yo ra igagalang.

¹⁷Singa anggapoy kanan nabtag a yaung ira yan diriyos a nipayorung ed saray timplo ra. Napnoy mata ra na dabuk a nipupukapok na saray sali na totoon onloloob.

¹⁸Papaletan na saray papari iray timplo, diad panamegley na pangiiyan da na saray puirta, balewet tan tarangka, pian ag makaloob iray matakew. Apokuk irad asaraan a pasen iray diriyos, a singa sakey a prison ngalngali la pateyen lapud krimin a ginawa to sumpad ari.

¹⁹Seselselan na saray papari iray lamparaan a para saray diriyos. Dakel niy seselselan da nen say nakakaukolan dan para sikaran dili, balet ag nanengneng na saray talintao so anggan sakey ed sikara.

²⁰Kakanen na saray bigis so dalem da, a singa saray kiew a panoksulan na timplo; nadederal met ira kawes da, balet ag da anggan amta.

²¹Nadedeketan na asewek ed timplo iray kalupaan da.

²²Ompepeket ed sikara iray kulalatnit, saray anuyaw, tan saray arum a manok, tan yoyorungan ira na anggan saray pusa.

²³Sikara yan amin so mamapaneknek ya aliwa ran diriyosag yo ra igagalang.

²⁴Naokupan ira na balituk a mamaparakep ed sikara, balet ag ira onsileng no anggapoy mamasileng ed sikara. Nen nibububo rad saray muldora, anggapoy alikna ra.

²⁵Anggapoy wala, ya anggan antoy bili ra, ta siansian ag ira makaingas.

²⁶Nengneng yo so ontan lan andi-kakanaan da! Ag ira makaakar diad panamegley na saray dilin sali ra, no ag ta nepeg iran sakbaten ya iliber.

²⁷Nababaingan iray anggan saray mangaasikasod sikara no say sakey ed saray diriyos da et atumbad dalin tan nakaukolan ya ipaalagey. No walay mangipaalagey na sakey ed sikara ed sakey a pasen, ag makagalaw, tan no dokingking so inkipaalalagey to, ag ton balut napetek so sikaton dili. Say pangyapay ed sikara na saray rigalo et kapara toy pangiter na saray rigalo ed bangkay.

²⁸Ilalako na saray papari iray nibabagat ed saray diriyos da tan ikakana ray kuarta a para sikaran dili. Aasinan na saray kaasawaan na saray papari iray bagat, pian mabayag iran nikana, anta nepeg komun ya inagnag da rad saray mairap-bilay odino saray pakaskasi.

²⁹Nanaabuloyan a makadiwit na saray bagat iray bibiin naliliberan odino kapananak. Sikara yan amin so mamapaneknek ya aliwa ran diriyosag yo ra igagalang.

³⁰Panoy pakatawag a diriyos ira, no saray bibii et nanaabuloyan iran mangisaklang na saray bagat ed sarayan bengatlan ginawad kiew, pilak tan balituk?

³¹Anggan saray papari et onyoyorung irad dalem na saray timplo na maneermen ira, ya apilat-pilat iray kawes da tan akiskisan tan ag asakbungan so kaoloan da.

³²Saray papari et manungol tan maneyag ira ed arap na saray diriyos da, a singa ra walad pista na pompon.

³³Eekalen da ray kawes na diriyos da tan iiter dad saray kaasawaan tan anak da.

³⁴Anggapoy wala no tulongan odino deralen na sakey a too ira yan diriyos, ta ag da nabales. Ag da nayarian a pagmaliwen odino ekalen ya ari so siopaman.

³⁵Ag da nayarian a pagmaliwen a mayaman so sakey a too odino itdan na kuarta. No walay manggawad sikara na sipan a sinambaan, balet ag to lamlamang sumpalen, ag dan balut nabales.

³⁶Ag dan balut niagel ed patey so sakey a too, tan ag dan balut tutulongan so toon makapoy sumpad toon mabiskeg.

³⁷Ag da nipawil so pakanengneng na toon bulag odino nilaban so siopaman a maniirap.

³⁸Ag da nayariay mangasi odino ontulong ed saray bibiin balo odino saray olila.

³⁹Singa anggapoy pakayarin baton nalad kapalandeyan ira yan bengatlan ginawad kiew tan naokupan na pilak tan balituk; tan nabaingan iray totoon mangigagalang ed sikara.

⁴⁰Panoy pangipasen na siopaman a diriyos ira odino tawagen ton diriyos ira? Saray taga Babilonia et ipepelag dad kababaingan iray dilin diriyos da.

⁴¹No walay toon ag makasalita, iyaakar dad timplo tan kekerewen dad Bel ya itdan toy pakayarin mansalita, a singa walay natalusan nen Bel.

⁴²Balet anggan nabirbir na sarayan totoo ya ag makatulong iray diriyos da, diad inkakulang-kulang da itutuloy dan igalang ira.

⁴³Aliwan satan labat, no ag ingen mangibabaliber iray bibii na saray koldon ed laman da tan manyorung irad gilig na dalan a mampopool na insinso tan iiter dan marotak a bibii so sikaran dili. No naala so sakey ed sikara a piakdulan na laki, ompawil a balawen to may biin kaabay to ya ag apili lapud aliwan magana.

⁴⁴Tilatilan amin iray bengatlan nipaakar ed sarayan talintaoy diriyos. Panoy pangipasen na siopaman a diriyos ira odino tawagen ton diriyos ira?

⁴⁵Saray marunong a managkitikit na kiew tan saray platiro so manggagawad sarayan diriyos, kanyan anggapoy arum a napagmaliwan da no ag say labay labat na sarayan totoo.

⁴⁶Ag anggan mambibilay na andokey iray manggagawad sikara, kanyan panoy pakagawa ra na saray diriyos?

⁴⁷Anggapoy ititilak na sarayan totoo no ag say palikdo tan kababaingan a tawiren na saray mantombuk a kailalakan.

⁴⁸No onsabi ray bakal tan saray golo, iplano na saray papari no iner so amutan da a kaiba da ray diriyos da.

⁴⁹Anggapoy nagawaan na sarayan talintaoy diriyos no wala ray bakal tan saray golo. Akin et ag nabirbir na totoo ya aliwan diriyos ira yan talintao?

⁵⁰Anggapoy arum ira yan talintaoy diriyos no ag ingen kiew ira ya naokupan na pilak tan balituk; onsabiy agew a napalinew ya aliwa ran peteg a diriyos.

⁵¹Nabirbir na amin da ray bansa tan arari ya anggapoy arum ira yan talintaoy diriyos no ag say kimey na limay too. Anggapod sikaray pakayari na sakey a dios,

⁵²tan nepeg a naamtaan na balang sakey ya aliwa ran peteg a diriyos.

⁵³Sarayan diriyos et ag dan balut napagmaliw ya ari so sakey a too odino nipelag so oran.

⁵⁴Ag iran balut makapannunot no antoy nepeg dan gawaen para sikaran dili odino makapangiter na katonungan ed sakey a toon akapanggawaay maoges; anggapon balut so nagawaan da. Andi-kakanaan iran singa saray wawak a tikyab a tikyab ed tagey.

⁵⁵No napoolan so sakey a timplo, ombatik iray papari diad pangyagel dad bilay da; balet saray diriyos a kiew tan inokupan na pilak tan balituk et natilak ira a napoolan a singa saray kiew a panuksolan.

⁵⁶Ag da nalabanan iray arari odino nabakal iray kalaban. Panoy pakapanisia na siopaman a diriyos ira?

⁵⁷Sarayan diriyos a kiew ya inokupan na balituk tan pilak et ag da niagel so sikaran dili ed saray matakew tan saray tulisan

⁵⁸ya aalaen da ray pilak tan balituk tan saray kawes da ray diriyos tan ibabatik da ran amin. Anggapoy nagawaan na saray diriyos ed pamatonda rad sikara.

⁵⁹Antokaman a bengatla, manlapud masebeg ya ari ya anggad makanan banga, et maung ni nen say sakey a tila-tilan dios. Maung ni so anggan sakey a kaput na puirta nen say sakey a tila-tilan dios; niagel na sakey a kaput na puirta iray bengatlan walad dalem na abung. Anggan say sakey a kiew a lusek na palasio et maung ni nen say sakey a tila-tilan dios.

⁶⁰Inter na Dios so agew, say bulan, tan saray bitewen a mangiter na silew, tan ontotoluk irad sikato.

⁶¹Ontan met na kirmat tan dagem. Nanengneng ed arawi so kirmat, tan onsisiplug ed anggan iner so dagem.

⁶²No iganggan na Dios so lorem ya ombuyak ed intiron mundo, ontotoluk.

⁶³No say Dios et mangipelag, manlapud tawen, na apoy a mamool ed saray kapalandeyan tan katakelan, gawaen na apoy so nibagad sikato. Ag nagawaan na diriyos ira yan bengatlaag ira anggan makagaway maung a panangalig ed saraya.

⁶⁴Akin et nepeg iran tawagen na diriyos, anta ag da itayon balut natulongan odino napasakitan?

⁶⁵Amta yo ya aliwa ran diriyosag yo ra igagalang.

⁶⁶Anggapoy pakayari na sarayan diriyos ed saray arari; ag da nibalikas iray samba ed sikara odino niiter iray bindision ed sikara.

⁶⁷Ag ira makapangiletaw na saray tanda ed tawen para saray bansa; ag ira makasinag a singa say agew odino say bulan.

⁶⁸Maung ni ray anggan ayayep ed katakelan nen sarayan talintaoy diriyos; makabatik iray ayayep a pangyagel day sikaran dili.

⁶⁹Kanyan sigput a malinlinew ya aliwa ran diriyosag yo ra igagalang.

⁷⁰Sarayan diriyos da, a ginawad kiew tan naokupan na pilak tan balituk, et singa ra tootoon panagabul na saray manok ed alog a nantanemay pipino; anggapon balut so nitulong da.

⁷¹Say nagawaan dan kamaungan et singa masabit a dika et tanamanan; anta abulen da komun iray manok, sikara laingey totoonan da. Singa bangkay a nibantak ed kabilongetan ira yan diriyos.

⁷²Ondadaan iray kawes a purpuran linen ya isosolung da, kanyan amta tayon aliwa ran diriyos. Diad kaonuran, kanen ira na saray bigis, insan anggapo lan balut so napangikanaan ed sikara.

⁷³Walay panmaungan na toon matonung ed saray arum a totoo; anggapoy kayaryan ton talintao, kanyan ag dan balut napalikdo.