Read Pangasinan BARUC 1 Bible Online

BARUC 1 - Pangasinan bible

BARUC 1

¹"Sayan libro insulat nen Baruc a lakin anak nen Nerias, apo nen Maasias, tan kabyangay boleg di Zedekias, Hasadias, tan Hilkias. Nisulat ed Babilonia

²"nen kumapiton agew na bulan, diad kumaliman taon kayari na impanakep tan impamool na saray taga Babilonia ed Jerusalem.

³"Maksil ya imbasa nen Baruc imay libro ed kinen Jeconias a lakin anak nen Joakin tan amin a totoon manaayam ed Babilonia diad gilig na Ilog na Sud. Dinmagon ondengel so balang sakey a toosaray gagalangen a totoo, saray anak na pamilyay ari, saray mamatakken, diad tuay tua, amin a totoo ya anggan antoy kipapasen da.

⁵"Nen nibasa imay libro, nanakis so balang sakey, nanayuno, tan nampikasid Katawan.

⁶"Insan angiter so balang sakey na kuarta ed anggaay nayarian to,

⁷"tan nipatolur ed Jerusalem so atipon a kuarta diad kinen Joakin a Pangulon Pari ya anak nen Hilkias tan apo nen Sallum, diad saray arum a papari, tan diad amin a totoon kakaiba tod Jerusalem.

⁸"Diad kumasamplon agew na bulan na Sivan, inala nen Baruc iray masagradon kagawaan ya asamsam ed Timplo tan impawil to ra ed Juda. Saraya may pilak a kagawaan ya impagawa nen Zedekias a lakin anak nen Ari Josias na Juda,

⁹"kayari nen Ari Nabucodonosor na Babilonia ya imbantak ira di Joakin, saray manoley, saray marunong a kumikimey, saray gagalangen a totoo, tan saray karaklan, insan to ra inyakar ed Babilonia manlapud Jerusalem.

¹⁰Insulat na saray totoo: Awat yo pa yay kuartan iiter mid sikayo. Isaliw yo na saray ayayep a para saray bagat a popoolan tan saray bagat a para kasalanan; manaliw kayo met na insinso, tan mangiter kayo na saray bagat a trigo. Ibagat yo ra ed altar na Katawan a Dios tayo,

¹¹tan ipikasi yo pa si Ari Nabucodonosor na Babilonia tan si anak ton Belsasar, pian mambilay ira legan a wala ray katawenan.

¹²Diad ontan, pabiskegen itayo na Katawan tan magmaliw a manangiwanwan tayo. Iyagel itayo nen Nabucodonosor tan si anak ton Belsasar, tan magmaliw itayon matoor ed sikato legan tayon mambibilay, et pakaliketan da itayo.

¹³Kekerewen mid sikayo met ya ipikasi yo kami pad Katawan a Dios, lapud nankasalanan kamid sikato, tan mamapasnuk nid sikami.

¹⁴Basa yo pa yan libro a papaiyakar mid tad sikayo tan gawa yoy dilin panangipatwa na kasalanan diad Timplo, no ononan agew na Pista na saray Abung-abung tan no arum iran masanton agew na pantitipon yo.

¹⁵Onyay nepeg a pangipatwa yo: Matonung so Katawan a Dios mi, balet asakbungan kami ni na kababaingan. Amin misaray totood Juda, saray totood Jerusalem,

¹⁶saray arari mi, saray manoley mi, saray propita mi, tan saray lalaki mi et naplag kamid kababaingan,

¹⁷lapud nankasalanan kamid Katawan a Dios mi

¹⁸tan sinumlang mi. Ag kami dinmengel ed sikato tan ag kami nambilay onung ed saray ganggan to.

¹⁹Manlapud samay agew a say Katawan et impaway tod Egipto iray lalaki mi ya anggad sayan agew, nansiansia kamin matoor ed sikato, tan ag mi nanduaruwaay sinmumlang ed sikato.

²⁰Nen saman, nen impaway na Katawan ed Egipto iray lalaki mi, pian niiter tod sikami so mayaman tan mataban dalin, imbawag to ray samba a sumpad sikami diad panamegley na aripen ton si Moises. Natan maniirap kami lapud saraman a samba.

²¹Ag mi inonur so salita na Katawan a Dios mi ya imbaga tod sikami diad panamegley na saray propita. Ingen, ginawa mi so labay mi tan intuloy mi so maoges a panagbilay mi. Nanlingkur kamid arum a diriyos tan ginagawa mi ray bengatlan bobosulen na Katawan.