Read Pangasinan BARUC 2 Bible Online

BARUC 2 - Pangasinan bible

BARUC 2

¹"Kanyan sinumpal na Katawan so impanaktakot tod sikami tan saray huis mi, saray arari mi, saray manoley mi, tan saray totood Israel tan Juda.

²"Anggapo lay arum a pasen ed mundo ya akagawaan na saray bengatlan agawad Jerusalem nen sinumpal na Katawan iray taktakot a nisulat ed Ganggan nen Moises.

³"Diad mapalalon irap, asabi-sabin kinan miy anggan say laman na saray anak min lalaki tan bibii.

⁴"Inkaykayat na Katawan iray totoo mi, impalima to kamid pakayari da ray amin a bansad kaliber-liber mi, tan nantaruk na panagpabanday tan panagpasnuk so impakanengneng dad sikami.

⁵"Nankasalanan kamid Katawan a Dios mi tan ag mi inonur. Kanyan adakep so bansa mi, anta analo kami komun.

⁶"Matonung lawas so Katawan a Dios mi, balet dedetdetan kami ni tan saray lalaki mi na panagkasalanan mi.

⁷"Anggaman a dinusa kami na Katawan onung na impanaktakot tod sikami,

⁸"ag kami ni sinmingger ed sikato tan nampikasi ya ikaindan iray maoges a kanunotan mi.

⁹"Ag mi inonur so Katawan tan ag kami nambilay onung ed saray matonung a ganggan to, kanyan inyakar tod sikami ya amin iray dusan imparaan tod sikami.

¹⁰Sika, O Katawan, so Dios na Israel ya angipaway ed saray totoo ed Egipto a katekep na baleg a pakayari tan saray tanda, milagro, tan pakelaw. Impanengneng moy makapanyarin biskeg mo tan akagamur kay mapagalang ya inkabantug, a nabibirbir ni ya anggad natan.

¹²O Katawan a Dios mi, nankasalanan kami; aliwa kamin matoor; sinumlang mi ray amin a ganggan mo.

¹³Balet ag mo kami pa la pamapasnukan. Dagdaiset lad sikamiy atilak, diad saray bansan angikaykayatan mod sikami.

¹⁴Dengel mo pay kerew mid sayan pikakasi, Katawan, tan iyagel mo kami pa, pian napagalangan ka. Iyabuloy mo pan pakaliketan kami na saray angibantak ed sikami ed arum iran bansa.

¹⁵Diad ontan, naamtaan na intiron mundo a sikay Katawan a Dios mi tan pinilim so bansan Israel a dilin totoom.

¹⁶O Katawan, osdung ka pan manlapud tawen, ta nengneng moy pangaskasiyan a kipapasen mi. Dengel mo pay pikakasi mi.

¹⁷Lokasan mo pa ray matam tan nengneng mo kami. Saray totoon walad pasen a panaayaman da ray inaatey, ya anggapo lay ingas a nakdaan ed laman da, et ag la ra makapangidayew ed sika odino makapangibawag na ontan lan inkatonung mo.

¹⁸Saray mabilay labat so makapangidayew ed sika, O Katawan, tan makabirbir na inkatonung mo, anggaman a mapalaloy paniirap da, abokut tan makapkapoy ira, narasan tan onkokorarap so pakanengneng da.

¹⁹O Katawan a Dios mi, onkekerew kamid sikay panangasi, balet aliwan lapud antokaman ed saray kamaungan a ginagawa na saray lalaki mi tan saray arari mi.

²⁰Pinadapom so pasnuk tan sanuk mod sikami, onung na impanatakot mod sikami nen imbalikas ed sikami na saray propita so salitam tan kuanda,

²¹Bokut kayo tan panlingkuran yoy ari na Babilonia, et makapansiansia kayod dalin ya inter kod saray lalaki yo.

²²Balet no ag yo onuren so ganggan kon panlingkuran yo,

²³pansamputen koy balang tanul na liket tan silibrasion ed saray baley na Juda tan Jerusalem. Ag met la narengel so anggan saray tanul na likeliket na saray bansal. Magmaliw a begtebegtew so intiron dalin tan anggapo lay totoon manayam diman!

²⁴Balet ag mi inonur so ganggan mon manlingkur kamid ari na Babilonia, kanyan ginawam so impanaktakot mo nen nansalita ka diad panamegley na saray aripen mon propita, nen imbagam a saray pokel na saray arari mi tan saray lalaki mi et naalad saray lobuk da tan nitaytayak ira.

²⁵Natan wadya ran kitongilang ed petang na agew tan betel na labi. Inaatey irad sulit na kairapan ya inter na eras, bakal, tan sakit.

²⁶Tan lapud kasalanan na saray totood Israel tan Juda, impagmaliw mon aderal-deral so Timplom, a kipapasen to ni ya anggad natan.

²⁷Balet, Katawan, maanos kad sikami tan impanengneng mod sikami so baleg a panangasim,

²⁸onung na insipan mo diad panamegley na aripen mon Moises diad samay agew ya ingganggan mon isulat toy Ganggan mo a sankanengneng na saray Israelita.

²⁹Inkuanmo, No ag yo ak onuren, magmaliw kayon dagdaiset ed saray bansan pangikayatan kod sikayo.

³⁰Amtak ya ag yo ak onuren, lapud anawet so olo yon totoo. Balet no nibantak kayod sananey a dalin, onkalakal kayo.

³¹Nabirbir yod satan a siak so Katawan a Dios yo, tan itdan ta kayoy pilalek a makaamta tan isip ya ikana yon ontalus.

³²Igalang tan nanunotan yo ak diad dalin a kibantakan yo.

³³Ekalen yoy inkaawet na olo yo tan say inkaoges yo, ta nanunotan yoy agawa ed saray lalaki yo nen nankasalanan irad Katawan.

³⁴Insan ta kayo ipawil ed dalin a sinambaan kon iter ed saray lalaki yo, diad kindi Abraham, Isaac, tan Jacob, tan nakayaryan yo lamet. Padakelen koy bilang yo tan ag kayo lan balut naparaiset.

³⁵Manggawa ak na andi-anggaan a paknaan ed sikayo; siak so magmaliw a Dios yo tan sikayo ray totook. Ag ta kayo lan balut ekalen, sikayon totood Israel, ed dalin ya inter kod sikayo.