Read Pangasinan BARUC 3 Bible Online

BARUC 3 - Pangasinan bible

BARUC 3

¹"O Katawan a Makapanyarin-amin, say Dios na Israel, ontatawag kamid sika manlapud kaaraleman na saray magunigon tan naksawan a kamarerwa mi.

²"Dengel mo kami pa, O Katawan, tan kasian mo kami, ta nankasalanan kamid sika.

³"Andi-anggaan a manoley kan ari, balet ompapatey kami ta andi-anggaan kamin nanaandipat.

⁴"O Katawan a Makapanyarin-amin, say Dios na Israel, dengel mo pay pikakasi mi. Singa kami la inatey. Saray lalaki mi et nankasalanan irad sika, say Katawan a Dios da. Ag da nilabay so ontulok ed sika, et paniirapan mi natan so impankasalanan da.

⁵"Lingwanan mo pa la ray maoges a bengatlan ginagawa na saray lalaki mi nen saman; diad onyan panaon, nunot mo pa labat so pakayarim tan say kagalangan mo,

⁶"ta sika so Katawan a Dios mi, tan idayew mi ka.

⁷"Ginawa mo kamin ontakot ed sika, pian mampikasi kamid sika. Diad dalin ya inkibantakan mi idayew mi ka, lapud inkaindan mi ray kasalanan na saray lalaki mi.

⁸"Inkaykayat mo kami ed saray bansa, tan impagmaliw mo ran mambalaw tan mangisamba ed sikami. Dudusaen mo kami lapud saray kasalanan da ray lalaki mi nen sinmumpa rad sika, say Katawan a Dios mi.

⁹"Dengel ka, Israel, ed saray ganggan a mangisisipan na bilay; talineng ka, et magmaliw kan makabat.

¹⁰Akin, Israel, et nalmoan mon wala kad dalin na saray kalaban? Akin et tinmakken kad sananey a bansa? Marotak ka onung ed ganggan, a singa saray bangkay;

¹¹nibilang ka lan sakey ed saray inaatey. Balet akin?

¹²Lapud tinaynan mo so panlalapway Kakabatan!

¹³No nankurang ka labat onung ed labay na Dios, andi-anggaan komun a mambibilay ka ed kareenan.

¹⁴Aral mo no iner so pakalmoay pakatalus, biskeg, tan pakaamta. Diad ontan nakabatan mo no iner so pakalmoay andokey tan nagnap a bilay, liwawa a mangiwanwan ed sika, tan kareenan.

¹⁵Anggapo niy akarumog no iner so panaayaman na Kakabatan odino akaloob diad abung a panagsinupan toy kayamanan;

¹⁶tan naandipat iray analin nananap: saray manoley na saray bansa, saray totoon nanliliketan day nanaanup na saray ayayep tan saray manok ed katakelan, saray nantitipon na amayamay a kayamanan a pilak tan balituk a panmamatalkan na amin a totoo tan gagawaen day antokaman a polaing ed pakala ra,

¹⁸tan saray nanggunigon tan namplano na pakalmo ray kuarta, balet anggapoy pakatontonan na kinimeyan da.

¹⁹Naandipat iran amin tan nakar da lay pasen a panaayaman da ray inaatey. Sinmabi ray arum ya angalay pasen da.

²⁰Insan sinmoblay iray kabyangay sakey a kailalakan tan nanayam irad dalin, balet ag da met akabatan so dalan a mamaarap ed pakatalus. Ag da nalmo so dalan a mamaarap ed Kakabatan odino asabiy kawalaan to.

²¹Ag met nalmo na saray anak da.

²²Ag nalmo na saray Cananeo so Kakabatan. Ag akabatan na saray Idomita,

²³anggaman ya aanapen day pakatalus. Ag nalmo na saray nigosiantin taga Merran tan Tema so dalan a mamaarap ed Kakabatan odino saray totoon mantotongtong na saray istorian walay kipaakaran tod saray ayayep, odino saray arum a manaanap na pakatalus.

²⁴O Israel, agaylay kabaleg na sansinakuban a panaayaman na Dios! Agaylay kaawang na amin da ray kayaryan to!

²⁵Anggapoy samput to; anggapoy polaing a pakasukat na kaawang odino kaatagey to.

²⁶Nen inmona ran panaon, nianak dia ray bantug ya alan, sakey a makapanyarin poli a marunong iran mibakal.

²⁷Balet ag ira pinili na Dios a totoo to odino intoro tod sikaray dalan a mamaarap ed pakaamta.

²⁸Naandi ra, lapud anggapod sikaray walay pakatalus tan kakabatan.

²⁹Anggapo niy toon akakar ed tawen a mangalad Kakabatan tan iyepas ton manlapud saray lorem.

³⁰Anggapoy toon binmaliw ed saray dayat a mananap na Kakabatan odino sinaliw to na saray mablin balituk.

³¹Anggapoy toon makaamta no panoy pakaonlad Kakabatan odino panoy pakalmo na dalan a mamaarap ed Kakabatan.

³²Say Dios labat so makaamta ed Kakabatan, tan kabat toy amin a bengatla. Diad panamegley na pakatalus to, nalmo toy Kakabatan. Inletneg toy mundo ed amin a panaon tan pinano to na amin a klasiy ayayep.

³³Nen tinmawag, manggiwgiw so liwawa tan tinmoluk. Nangganggan, et pinmanengneng so liwawa.

³⁴Tinawag to ray bitewen, et inmebat iran tampol; linmilira ra ed pasen da tan magayaga ran sinminag, pian napaliket day nanggawad sikara.

³⁵Sikato so Dios tayo, tan anggapoy miparad sikato.

³⁶Akabatan to so intiron dalan a mamaarap ed pakatalus tan inter toy Kakabatan ed aripen ton Israel ya inararo to.

³⁷Nanlapud saman a panaon, pinmanengneng ed dalin so Kakabatan tan akiayam ed sikatayo.