Read Pangasinan BARUC 4 Bible Online

BARUC 4 - Pangasinan bible

BARUC 4

¹"Say Kakabatan et sikatoy libro na saray ganggan na Dios, say Ganggan a mansiansia ya anggad angga. Mambilay iray ompepeket ed sikato, balet ompatey iray mangikakaindan ed sikato.

²"Singger kayod Kakabatan, sikayon totood Israel, tan peket kayod sikato. Tombuk yoy dalan a mamaarap ed karlangay liwawa to.

³"Ag yo isusuko ed arum a totoo iray mapagalang a palabon niiter ed sikatayo.

⁴"Agaylay liket tayo, sikatayon totood Israel, ta amta tayo so pakaliliketan na Dios!

⁵"Mampabiskeg kayoy linawa, totook; sikayoy mampapasiansian mabilay so ngaran na Israel.

⁶"Nilako kayo ed saray bansa da ray Hintil, balet aliwan pian ompatey kayo. Lapud impanpasnuk yoy Dios, impalima to kayod pakayari na saray kalaban yo.

⁷"Nen angisaklang kayo na saray bagat yod saray dimonyo, anta diad Dios komun, impanpasnuk yo so nanggawad sikayo.

⁸"Alingwanan yo so Andi-anggaan a Dios a nanasikasod sikayo nen ogaw kayo ni, kanyan angyakar kayo na kaermenan ed Jerusalem, a singa sakey ya ina ed sikayo.

⁹"Anengneng na Jerusalem a dudusaen kayo na Dios lapud pamapasnuk to, tan inkuantod saray kaliber-liber a siudad, Nengneng yo so ontan lan kairapan ya inyakar na Dios ed siak.

¹⁰Anengneng kon adakep iray anak kon lalaki tan bibii, say impakadakep ya inyakar ed sikara na Andi-anggaan a Dios.

¹¹Pinabaleg kon kataruk na liket iray anak ko, balet inmakis ak tan nanermen ak nen nala ra ed siak.

¹²Anggapo komuy manliket ed paniirap ko, natan ta sakey ak a balo tan amayamay ed saray anak ko so nalad siak. Imbeneg da so Ganggan na Dios, tan lapud saray kasalanan da nagmaliw ak a begtebegtew a siudad.

¹³Ag da inngalngalep iray ganggan to tan ag da ra inkanad impanbilay da; ag da labay ya iwanwan to ra ed dalan na inkatonung.

¹⁴Amin yon kaliber-liber a siudad, gali dia tan motektek yo no panon ya imbantak na Andi-anggaan a Dios iray anak ko ed saray arum a bansa.

¹⁵Tinawag ton onsumpad sikara so sakey a bansan sananey so salita to tan anggapoy panangigalang tod saray mamatakken tan anggapoy panangasi tod saray ogogaw.

¹⁶Saray totood sayan bansa et inaala da ray inararok ya anak a lalaki tan bibii, et atilak ak a sakey a balo, sigput a bukbukor to.

¹⁷Anak ko ran nibantak ed arum a bansa, anggapoy nagawaan kon itulong ed sikayo.

¹⁸Say angyakar ed sikayo na sayan dusa so makapangyagel labat ed sikayo ed saray kalaban yo.

¹⁹Ituloy yoy dilin pankukurang yo, anak ko; mambilay kayo onung na labay yo! Bukbukor ko la.

²⁰Inekal koy kawes ya isosolung ko no panaoy kareenan, tan nankawes ak a singa toon maneermen. Ontawag ak ed Andi-anggaan a Dios ya onkerew na tulong legan a mambibilay ak.

²¹Pabiskeg yoy linawa yo, anak ko, tan kerew kayod Dios na tulong. Iyagel to ka yod panamairap, diad pakayari na saray kalaban yo.

²²Mailalo ak ya, ag la mabayag, ibolus kayo na Andi-anggaan a Dios. Paliketen ak na samay Masanto, say andi-anggaan a manangilaban yo, no kasian to kayo.

²³Inmakis tan naningel ak nen inawit da kayo, balet ipawil kayo na Dios tan pagmaliwen to ak a maliket ya andi-anggaan.

²⁴No panoy impanbantay na saray kaliber-liber a siudad nen niakar kayon adakep, ontan met so asingger lan pakanengneng dad Andi-anggaan a Dios ya onsasabin napnoy kagalangan a mangyagel ed sikayo.

²⁵Anak ko, anosan yon itepel so pananusa na Dios. Pinapairap kayo na saray kalaban yo, balet magano lan nanengneng yo ran napatey tan walad leksab na panangasi yo.

²⁶Anak ko, dineral ta kayo na panangaro, balet nepeg yon nanakaran iray matibagkol a dalan; nibatik kayon singa saray karniron narel nen linmoob iray kalaban.

²⁷Mampabiskeg kayoy linawa, anak ko, tan kerew kayod Dios na tulong. Dinusa to kayo, balet ag to kayo lingwanan.

²⁸No panoy talek yon angibeneg ed Dios nen saman, natan singger kayod sikato tan manlingkur kayod sikato a mamimpuloy talek yo.

²⁹Say angyakar ed sikayo na sarayan kairapan et iyagel to kayo tan itdan to kayo na andi-anggaan a gayaga.

³⁰Mampabiskeg kay linawa, Jerusalem. Say Dios, ya angiter ed sika na ngaran, so manligliwad sika natan.

³¹Onsabiy kairapan ed saray amasegsegang ed sika, insan ira nanliket nen naplag ka.

³²Onsabiy kairapan ed saray siudad ya angaripen ed saray anak mo. Kairapan so pansumpalan na Babilonia, samay siudad ya angakmun ed saray anak mon lalaki.

³³No panoy impanliket na saman a siudad nen naplag ka tan impanggayaga tod inkaderal mo, ontan met so panermen to no sikatoy nikaindan.

³⁴Pagmaliwen kon ermen iray mapaatagey a panagpasirayew to tan ibatik ko ray ipapasirayew ton dakerakel a totoo to.

³⁵Siak, say Andi-anggaan a Dios, so mangipelag ed sikato na apoy, tan ompool a piga-pigay agew. Panayaman a mabayag na saray dimonyo iray deral-deral to.

³⁶Nengneng kad bokig, Jerusalem, ta nengneng moy liket ya iyaakar ed sika na Dios.

³⁷Nengneng mo, onsesempet iray anak mo, saray anak a nalad sika. Atipon ira a nanlapud bokig tan sagur diad panamegley na ganggan na Dios, say Masanto. Natan onsesempet ira, tan panliliketan da so kagalangan na Dios.