Read Pangasinan BARUC 5 Bible Online

BARUC 5 - Pangasinan bible

BARUC 5

¹"Jerusalem ekal moy baliwan ya insolung mo diad paneermen tan pandadageyem mo, tan isolung moy andi-anggaan a karlangan na kagalangay Dios.

²"Ikolibemben moy inkatonung na Dios. Itoon mod olom so korona na kagalangay Andi-anggaan a Dios.

³"Ipanengneng na Dios so karlangan mo ed balang bansa diad tapew na dalin.

⁴"Andi-anggaan an ya ikuantod sika: Manlalapud inkatonung mo so kaarawim ed kaatapan, tan manlalapud panangarom ed siak so karlangan mo.

⁵"Bangon ka, Jerusalem, ta manalagey ka ed toktok na palandey; nengneng mo no iner so pantitiponan na Dios, say Masanto, ed saray anak mon nanlapud bokig tan sagur. Panggagayagaan day impakanunot na Dios ed sikara.

⁶"Jerusalem, saray anak mo et inyakar ed arawi na saray kalaban da; kasali-sali ran tinmaynan ed sika, balet ipapawil irad sika na Dios, a nilogan iran kataruk na karlangay ari.

⁷"Ingganggan na Dios a napaabebay balang atagey a palandey tan saray andi-anggaan a kapokdulan; ingganggan ton natabunan iray patar tan napalanas so dalin, pian makasempet, diad kagalangay Dios, iray totood Israel tan anggapoy maoges a nagawad sikara.

⁸"Lapud ganggan na Dios onlesa iray katakelan na ambalingit iran kakiewan, pian walay nasiruman na saray totood Israel.

⁹"Say Dios et iwanwan ton onsempet ed abung so Israel. Ompawil iran walay baleg a gayaga, niwanwan ira na panangasi to tan inkatonung to, tan napaliberan ira na liwaway mapagalang a kiwawala to.