Read Pangasinan SUSANA 1 Bible Online

SUSANA 1 - Pangasinan bible

SUSANA 1

¹"Walay sakey a lakin manngaran na Joakim; manaayam ed Babilonia,

²"tan say asawa to et si Susana ya anak nen Helkias. Magangganan bii si Susana tan matwa so inkarilihioso to.

³"Masimoon a Judio iray ateng to, tan pinabaleg day anak da a mambilay onung ed Ganggan nen Moises.

⁴"Mayaman si asawa ton Joakim. Aliber na balibali ran tanamanan so abung to. Mantitipon a mabetbet ed abung to iray arum a Judio, lapud mapalaloy panamabli rad sikato.

⁵"Balang toon walay isegep ton kaso et onla met ed abung nen Joakim, ta dimay kawalaay korti na saray duaran huis. Agano ni so impakatorod sarayan duaran pangulo na saray Judio. Sikaray totokuyen na Katawan nen inkuanto, Walay nagagawan kaogsan ed Babilonia; ag niwawanwan na saray huis iray katoowan.

⁶

⁷"Inagew-agew kapag kagkaagwan, no tinmaynan lan mangogto iray totoo, kaogaliyan nen Susana so manakar-akar ed saray tanamanan.

⁸"Naayat ed sikato ira may duaran huis, kanyan manalagar ira, insan da bantayan.

⁹"Mapalaloy pampilalek dad sikato, kanyan naandiy liket dan mampikasi tan manumpal na saray kanepegan dan huis.

¹⁰Iibegan na balang sakey ed sikara si Susana, balet ag ira nambagaan na liknaan,

¹¹ta ambaing so balang sakey ed sikara a mangako na maoges a pilalek to.

¹²Lapud saya, inagew-agew ya ontan lay pantatalaran dan makalinggis ed sikato.

¹³Aminsan a kaagwan, inkuandad sakey tan sakey, Panangogto la; onsempet ta la.

¹⁴Kanyan tinmaynan la ran dua tan nandomaan iray nila, balet ag abayag pinmawil iran onlinggis ed kinen Susana, insan akapanabet iran ag da ginagala. Balang sakey ed sikara et nagsipaliwawa no akin et wadman, balet diad kaonuran impatwa ran dua so pilalek dad kinen Susana. Nampaknaan dan mantalaran iray oras a nabukoran da.

¹⁵Kanyan nantatalaran iran dua na pankanawnawa ra. Aminsan ya agew, linmad tanamanan si Susana a kaiba toy duaran aripen ton bibii, a singa gagawaen ton gendat. Anggapoy arum a wadman, likud ed saramay duaran huis ya inmamut a mambabantay ed kinen Susana. Ampetepetang so agew, kanyan anunotan toy manames. Inkuantod saramay aripen to, Iyawitan yo ak diay larak a para ames tan say pabalinget, tan isara yo ray puirta, pian ag ak nasigensigen.

¹⁶

¹⁷

¹⁸Insara na saramay duaran aripen iray puirtad arap tan pinmaway irad diking a puirta, ta alaen da ra may papaala nen Susana. Ag da naimano ira may duaran lalaki.

¹⁹Kasiput da ra may aripen, pinmaway ed inamutan da ira may duaran huis, binatik day Susana,

²⁰tan kuandad sikato, Akasara ray puirta tan anggapoy makanengneng ed sikatayo. Mampusapos so puso min miakdul ed sika, kanyan pagustoan mo kami.

²¹No ag mo labay, idalem mi kad korti tan sambaan mi ya anengneng min pinapaway mo ray aripen mo, pian makapibukoran kad sakey a lakin malangwer.

²²Inkuanen Susana, Anggapoy pakalosutan ko. No pagustoan ta kayo, nayarin napatey ak lapud impikaloguran ko. No ag ta kayo pagustoan, akalutan yo ak met ni lamlamang.

²³Balet labay ko niy nadusan anggapoy kasalanan, nen say mankasalanan ak ed Katawan.

²⁴Kanyan ginapwan toy inmeyag ed anggaay nayarian to, tan ginapwan met na saramay duaran huis ya iyeyag iray ipapakasalanan da,

²⁵legan a batik so sakey ed sikara tan nilokasan to ray puirta.

²⁶Kadngel na saramay aripen ed abung ed ontan lan eyag, batik irad puirtad diking tan linma rad saray tanamanan, ta nengnengen da no antoy agawad kinen Susana.

²⁷Insalaysay na saramay huis so ginawa ran istoria ra, et atalagnaw tan nababaingan ira may aripen. Anggapo nin balut so asalitan singa onyan nipaakar ed kinen Susana.

²⁸Diad ontombuk ya agew, nen atiptipon lad abung nen Joakim iray totoo, sinmabi ra may huis a maseksekder so linawa ran mangituloy na getma ran maoges a papatey si Susana.

²⁹Inkuandad arap na amin a totoo, Iyakar yo diay asawa nen Joakim a si Susana ya anak nen Hilkias. Nen sinmabiy Susana,

³⁰kaiba to ray ateng to, saray anak to, tan amin da ray kakanayon to.

³¹Balibaliy kagagalaw nen Susana tan petepeteg a maganggana,

³²kanyan impaekal na saramay duaran maoges a totoo so bilo to ya akasakbung ed lupa to, pian manliket iran onnengneng ed sikato.

³³Manakakis ya amin iray kabyangan na pamilya to tan amin a totood man.

³⁴Insan inmalagey ed arap na totoo ira may duaran huis, intapew dad olo nen Susana iray kalimaan da, tan ginapwan day nandalatdat na saray ipapakasalanan dad sikato.

³⁵Manakakis si Susana, balet tinmangay ed tawen, ta nanmatalek ed Katawan.

³⁶Saramay duaran lalaki et insalaysay day onya: Manaakar-akar kamid saray tanamanan nen linmoob yan bii a kaiba to ray duaran aripen tod bibii. Intalak to ray puirtad arap tan pinapaway to ra may aripen to.

³⁷Insan pinmaway ed inamutan to so sakey a lakin tobun-balo, dinago to tan dinmokul iran dua.

³⁸Wala kamid sakey a sokung na saray tanamanan, et nen anengneng mi so nagagawa, dinmago kami,

³⁹tan apesgaan mi rad gagawaen da. Inegnaan mi may laki, balet lapud mabiskeg nen say sikami, akabatik, nilokasan to ray puirta, tan naandipat la.

⁴⁰Balet asingkat mi ya bii. Tinepet mid sikato no siopa may laki, balet ag to ibaga. Sambaan mi a tua yay insalaysay mi.

⁴¹Lapud aliwa labat a pangulo ira may duaran lalaki no ag ingen huis ira, sinisia na saray totoo so insalaysay da, tan sinintinsiaan dan pateyen si Susana.

⁴²Insan tinmawag na maksil si Susana, Andi-anggaan a Dios, anggapo so antokaman a niamut ed sika; amtam ya amin iray bengatla kasakbayan iran nagawa.

⁴³Nia ak a magano lan ompatey, balet kabat mo ya anggapoy kasalanan ko, kabat mo a mantitila ra yan totoo. Akin et nepeg ya ompatey ak?

⁴⁴Dinengel na Katawan so pikakasi to

⁴⁵tan inwanwan ton nansalita so sakey a tobun-balo a manngaray Daniel, nen iyaakar da lan pateyen si Susana.

⁴⁶Ineyag to, Ag ko mibiang ed pamatey ed sikato!

⁴⁷Linmingaw ed sikato iray totoo tan tinepet da, Antoy ibabagam?

⁴⁸Nanalagey ed arap da si Daniel tan kuanto, Totood Israel, agaylay inkakulang-kulang yo! Dusaen yo na patey so sakey ya Israelitan bii lapud sayan klasiy paneknek? Ag yo anggan sinali a papawayen no antoy tuan agawa.

⁴⁹Oliten tayon imbistigaen so kaso. Tila so impantasi na sarayan lalaki.

⁵⁰Kanyan nangganat a pinmawil iray totoo ed pasen ya analaysayan, tan kuan na saray opisyal ed kinen Daniel, Initdan kay Dios na kakabatan na toon matakken, kanyan gala ta ipaliwawam ed sikami no antoy labay mon ibaga.

⁵¹Inkuanen Daniel ed sikara, Pansian yo ray duaran huis, tan pansoblayan ko ran tepetan.

⁵²Insan tinawag nen Daniel imay sakey huis tan kuanto, Sikan maoges a masiken, ebatan mo natan ya amin iray kasalanan a ginawam.

⁵³Pikewet iray iiter mon sintinsia. Dudusaen mo ray anggapoy kasalanan tan ibobolus mo ray nankasalanan, anggaman a kuan na Katawan, Ag yo papateyen so toon matonung tan anggapoy kasalanan!

⁵⁴Natan, no tuan anengneng mon nanakdul yan bii tan samay sakey a laki, ibagam no anton kiew so sinilongan da? Diad silong na melag a bitaoy, ebat na samay huis.

⁵⁵Inkuanen Daniel, Sirin! Bilay mo so ibayar mod satan a tila. Niganggan la so anghil na Dios a pankadwaen to kan balsigen.

⁵⁶Insan inyarawi da may huis tan inyarap dad kinen Daniel imay sakey, Singa ka sakey a Cananeo, aliwan sakey a Judio, inkuanen Daniel ed sikato. Say ganggana na sayan bii et pinikewet toy kanunotan mo tan say maoges a pilalek na laman mo et dinotakan toy pakatalus mo.

⁵⁷Apasal kan manggaway labay mo ed saray bibiin Israelita lapud antakot irad sika, balet niay sakey a Judion bii ya ag onsukod sika.

⁵⁸Natan, sirin, anton kiew so anengneng mon sinilongan da. Diad silong na baleg a kiew a rubi, ebat to may huis.

⁵⁹Inkuanen Daniel, Sirin! Bilay mo so ibayar mod satan a tila. Say anghil na Dios et manaalagar lan sankabembenan toy ispada to tan akaparaan a pankadwaen to kan balsigen. Diad ontan, naandi kayo lan duad sikami.

⁶⁰Insan naneyag ya amin iray totoo tan indayew day Dios a mangilalaban na saray manmamatalek ed sikato.

⁶¹Binalintuagan dan sinumpa ira may duaran huis, lapud apaneknekan nen Daniel a nantila ra kayari ran nansamba.

⁶²Sasalitaen na Ganggan nen Moises a say toon mangiter na tilan pantasi et awaten toy dusan awaten komun na toon naakusa. Lapud saya pinatey da ra may duaran huis, tan aliktar so bilay na sakey a biin anggapoy kasalanan.

⁶³Saramay ateng nen Susana, samay asawa to, tan amin a kakanayon to et indayew day Dios lapud apaneknekan ya ag to ginawa so impakasalanan dad sikato.

⁶⁴Nanlapud saman ya agew, atagey so pangipapasen dad kinen Daniel.