Read Pangasinan EZEKIEL 10 Bible Online

EZEKIEL 10 - Pangasinan bible

EZEKIEL 10

¹"Ninmengneng ak ed tambubong a walad tagey na kaoloan na saramay kirubin tan diad tagey da walay singa tronon safiro.

²"Say Dios kuantod samay toon akakawes na linen, Lakad nanleetan na saray dalig a walad silong da ra may pinalsa tan panom na ngalab iray limam. Insan mo itayak ed intiron siudad iray ngalab. Binantayan kon linma.

³"Nen linmoob manalalagey ed niabalaten na Timplo ira may pinalsa, insan pinano na lorem imay patiod dalem.

⁴"Inmatagey a nanlapud saramay pinalsa so kagalangay Katawan, insan dinmere ed lolooban na Timplo. Insan pinano na lorem imay Timplo, tan napno na liwawa imay patio.

⁵"Say parakpak na saray payak da ra may pinalsa et nadngel ya anggad paway na patio. Singa bosis na Dios a Makapanyarin-amin so tanul da.

⁶"Nen ingganggan na Katawan imay toon akakawes na linen a mangalay apoy ed nanleetan da ra may dalig a wala rad silong na saramay pinalsa, linmoob imay too tan nanalagey ed abay na sakey ed saramay dalig.

⁷"Inyonat na sakey a pinalsa so lima to ed apoy a walad nanleetan da, angalay pigaran ngalab, insan to inyan ed saramay lima na samay toon akakawes na linen. Inala na samay too ira may ngalab, insan la tinmaynan.

⁸"Anengneng ko a balang sakey ed saramay pinalsa et walay singa limay too ed silong na balang payak to.

⁹"Anengneng ko met a wala ray apatiran nampaparan dalig, a balang sakey walad abay na sakey a pinalsa. Mankidyam a singa mabmablin bato ira may dalig, tan balang dalig walay akasolung a dalig ya akaarap ed sananey a dapag.

¹⁰No onkurang ira may pinalsa, makakar irad anggan iner a dapag ya ag la ra ompigar. Onkurang iran mambabansag ed labay dan laen, et ag la ra nepeg ya ompigar.

¹²Akobutan na mata iray laman, beneg, lima, payak da, tan ontan met ira may dalig.

¹³Nadngel koy bosis ya ontatawag, Mantetlek iran dalig.

¹⁴Apatira so lupa na balang sakey ed saramay pinalsa. Say onona lupay bakan kalakyan, say kumadwa lupay too, say kumatlo lupay lion, tan say kumapat lupay agila.

¹⁵(Sikara ya may pinalsan anengneng kod gilig na Ilog na Kebar.) Nen nampaatagey ira may pinalsa,

¹⁶tinmombuk ira may dalig. Kapag ibuskag day payak dan ontikyab, ontombuk ed sikara ira may dalig.

¹⁷No ontonda ra may pinalsa, ontonda met ira may dalig; no ontikyab ira may pinalsa, mila ra may dalig, lapud wala rad silong na pakaoley na saramay pinalsa.

¹⁸Insan samay kagalangan na Katawan tinmaynan ed samay lolooban na Timplo tan linmad pasen diad tagey na saramay pinalsa.

¹⁹Imbuskag day payak da tan manlapud dalin tinmikyab irad tagey legan ak a mamabantay, tan akilad sikara ira may dalig. Tinmonda rad nibokig a puirta na Timplo, tan walad tagey da imay kagalangan na Katawan.

²⁰Abirbir ko a sikara may pinalsan anengneng kod silong na Dios na Israel dimad gilig na Ilog na Kebar.

²¹Balang sakey ed sikara walay apatiran lupa to, apatiran payak, tan walay singa limay too ed silong na kapag payak to.

²²Saray lupa ra et anggapoy pidomaan dad saramay lupa ya anengneng kod gilig na Ilog na Kebar. Nampatulon linma so balang sakey ed saramay pinalsa.