Read Pangasinan EZEKIEL 11 Bible Online

EZEKIEL 11 - Pangasinan bible

EZEKIEL 11

¹"Inyatagey ak na ispiritu na Dios, insan to ak inyakar ed nibokig a puirta na Timplo. Anengneng kod mad abay na puirta iray duamplo tan liman lalaki a pati si Jasanias a lakin anak nen Azur tan si Pelatia a lakin anak nen Benaya, a sikaran duay pangulo na bansa.

²"Inkuan na Dios ed siak, Sika a toon ompatey, maoges so iplaplano na saray lalaki tan makapoy a simbawa so iiter dad sayan siudad.

³"Ikukuanda, Ag mabayag mangipaalagey itayo lamet na kaabungan tayo. Say siudad et aliling toy banga, tan aliling tayoy karnin akakarga, balet iyagel to itayod apoy.

⁴"Natan, sika a toon ompatey, mampropisiya ka sumpad sikara.

⁵"Linmoob ed siak so ispiritu na Katawan, tan imbaga na Katawan ed siak ya ikuankod saray totoo so kuanto: Totood Israel, amtak iray sasalitaen yo tan saray iplaplano yo.

⁶"Amayamay iray pinapatey yon totoo diad siudad, kanyan napno na bangkay iray dalan.

⁷"Kanyan sikato yay kuankod sikayo, siak a Katawan a Dios. Tua a sayan siudad so banga, balet dinan iray karni? Saray bangkay na pinapatey yo! Ag kayo dia mansiansian manayamibantak ta kayod paway na siudad!

⁸"Antakot kayod saray ispada? Mangyakar ak dia ingen na saray totoon sankaawit day ispada ya ondogpad sikayo.

⁹"Ipaway ta kayod siudad tan ipalima ta kayod saray taga arum a bansa. Sinintinsiaan ta kayon ompatey,

¹⁰tan napatey kayod bakal ed dilin bansa yo. Diad satan naamtaan na balang sakey a siak so Katawan.

¹¹Ag kayo iyagel na sayan siudad; aliwan singa pangyagel na banga ed karnin akakargad dalem to so pangyagel to. Dusaen ta kayo, anggan iner so kawalaan yo ed loob na dalin na Israel.

¹²Nakabatan yo a siak so Katawan, ta diad pangoonur yod saray ganggan na saray kaabay yon bansa, susumlangen yo ray ganggan tan saray bilin ko.

¹³Legan kon mampropropisiya, inatey si Pelatia. Intikleb kod dalin tan ineyag ko, O Katawan a Dios, pateyen mon amin iray totoon atilak ed Israel?

¹⁴Akisalitad siak so Katawan.

¹⁵Inkuanto, Sika a toon ompatey, saray totood Jerusalem et mantotongtong ira na nipaakar ed sika tan saray kaparam a totoon nibantak ed arum a bansa. Ikukuanda, Arawdawiy kawalaan na saray nibantak, kanyan ag da la nagalang so Katawan. Impakayaryan la na Katawan ed sikatayo yan dalin.

¹⁶Natan, ibagam ed saray kaparam a totoon nibantak so ibabagak. Siak so angyakar tan angitaytayak ed sikaran manayam ed saray arum a bansa. Anggaman ontan, legan dad man a manayam, wala ak ed sikara diad saray dalin a nibantakan da.

¹⁷Kanyan ibagam ed sikara so ibabagak, siak a Katawan a Dios. Tiponen ko ra manlapud saray bansan angitayakan kod sikara, tan ipawil kod sikaray dalin na Israel.

¹⁸No ompawil ira, ibantak da ray amin a narurumog dan marotak tan makapaingungot a talintaoy diriyos.

¹⁹Itdan ko ra na balon puso tan balon ispiritu. Ekalen kod sikaray anawet a puso tan salatan ko na puson matoluk.

²⁰Diad satan matoor dan onuren iray amin a ganggan ko. Magmaliw iran totook, tan siak so magmaliw a Dios da.

²¹Balet dusaen ko ray totoon maliket a mangigalang ed saray marotak tan makapaingungot a talintao. Dusaen ko ra lapud saray ginagawa ra. Say Katawan a Dios so nansalita.

²²Tinmikyab ira may pinalsan mabilay tan akilad sikara ira may dalig. Walad tagey da so kagalangan na Dios na Israel.

²³Insan samay kagalangan na Dios tinaynan toy siudad tan amaarap ed pasen a nibokig na siudad.

²⁴Diad sayan pasingayew, inyatagey ak na ispiritu na Dios tan impawil to ak ya inyakar ed Babilonia a nibantakan mi. Insan naandi la may pasingayew.

²⁵Tinongtong kod satan ed saramay kaibak a nibantak iray amin ya impanengneng ed siak na Katawan.