Read Pangasinan EZEKIEL 12 Bible Online

EZEKIEL 12 - Pangasinan bible

EZEKIEL 12

¹"Say Katawan akisalitad siak.

²"Inkuanto, Sika a toon ompatey, manaayam kan kaibam iray mananumpan totoo. Walay mata ra, balet anggapoy nanenengneng da; walay layag da, balet anggapoy narerengel da lapud mananumpa ra.

³"Natan, sika a toon ompatey, mambalkut kan singa gagawaen da ray adakep a nibantak tan laka la legan ya agew ni. Ipanengneng mod balang sakey ya ontataynan ka ya onlad arum a pasen. Angangko, naimano ka na saraman a mananumlang.

⁴"No agew ni, mambalkut ka, pian nanengneng da ka. Insan ka mampanengneng ed sikara no ontataynan kad labi a singa ka adakep ya ibantak ed arum a bansa.

⁵"Legan da kan babantayan, mamongaw kad padir na abung mo tan diman mo ipaway so balkut mo.

⁶"Pabantayan kan sakbaten moy balkut mo tan pepetan moy matam legan mon manakar ed ambilonget, pian ag mo nanengneng no iner so laen mo. Sakey a pasakbay ed saray Israelita so gawaen mo.

⁷"Ginawak imay imbagad siak na Katawan. Diad saman ya agew nambalkut ak a singa gawaen na sakey ya adakep ya ibantak ed arum a bansa, tan diad saman a labi nen ombibilonget la binongaw na limak so padir tan pinmaway ak. Legan ya iimatunan ak na balang sakey a too, sinakbat ko may balkut ko tan amikal ak la.

⁸"Diad kaimbuas akisalitad siak so Katawan.

⁹"Sika a toon ompatey, kuanto, natan ta tetepeten na saray mananumpan Israelita so gagawaen mo,

¹⁰ibagam ed sikara so ibabagak, siak a Katawan a Dios. Sayan salita et para prinsipin manoley ed Jerusalem tan para saray totoon manaayam diman.

¹¹Ibagam ed sikara a say ginawam et sakey a tanda a mangipanengneng no antoy nagawad sikaranadakep tan nibantak irad arum a bansa.

¹²Say prinsipin manooley ed sikara et sakbaten tod ambilonget so balkut to tan diad binongaw dad padir ompaway ya ombatik. Pepetan toy mata to et ag to nanengneng no iner so laen to.

¹³Balet sabokulan kon erelen. Insan ko iyakar ed siudad na Babilonia a diman ompatey ya ag to nanengneng imay siudad.

¹⁴Itaytayak kod anggan iner a pasen iray opisyal to tan saray sumisimbawa to tan saray umaantabay to, insan saray totoo anapen da ran pateyen.

¹⁵No itaytayak ko rad saray arum a bansa, nakabatan da a siak so Katawan.

¹⁶Iyabuloy kon pigarad sikara so ag ompatey ed bakal, eras, tan sakit, pian diad panayam dad saray arum a bansa et nabirbir da ya ontan lan makapaingungot so ginagawa ra tan akoen da a siak so Katawan.

¹⁷Say Katawan akisalitad siak.

¹⁸Inkuanto, Sika a toon ompatey, giwgiw ka no mangan ka, tan payegpeg kad takot no oninom ka.

¹⁹Ibagam ed intiron bansa a sikato yay salita na Katawan a Dios ed saray totoon atilak ed Jerusalem: Onggiwgiw ira no mangan ira tan ompayegpeg irad takot no oninom ira. Naandian na karga so dalin da, lapud maoges so kabibilay na balang sakey ed sikara.

²⁰Naderal iray siudad a napno la natan na saray totoo, tan nagawan kalawakan so bansa. Insan dad satan naamtaan a siak so Katawan.

²¹Akisalitad siak so Katawan.

²²Inkuanto, Sika a toon ompatey, akin et ooliten na saray totood Israel ya ibaga yan probirbio: Ondadalan so panaon, et ag nasusumpal iray pasakbay?

²³Natan ibagam ed saray totoo so ibagak nipaakar ed saman, siak a Katawan a Dios. Pansamputen ko la man a probirbio. Ag la man naolit ya ibaga na saray Israelita. Ingen ibagam ed sikara: Sinmabi lay panaon, tan nasusumpal la ray pasakbay!

²⁴Diad saray totood Israel anggapo lan balut so tilan pasingayew odino managpalikdon propisiya.

²⁵Siak a Katawan misalita ak ed sikara, tan no antoy sinalitak sikatoy nasumpal. Anggapo lay nagawan abala. Diad legay pambilay yo, sikayon totoon mananumpa, sumpalen koy impasakbay kon nagawa. Siak so nansalita, kuay Katawan a Dios.

²⁶Inkuan na Katawan ed siak,

²⁷Sika a toon ompatey, dengel moy ibagak. Abaloan na saray Israelita a mabaybayag nin nasumpal iray pasingayew tan saray pasakbay mo.

²⁸Kanyan ibagam ed sikara so sayan ibabagak, siak a Katawan a Dios: Anggapo la so nagawan abala. No anto so imbagak, sikato so nasumpal. Siak a Katawan a Dios so nansalita!