Read Pangasinan EZEKIEL 13 Bible Online

EZEKIEL 13 - Pangasinan bible

EZEKIEL 13

¹"Say Katawan akisalitad siak.

²"Inkuanto, Sika a toon ompatey, mampropisiya ka sumpad saray propita na Israel a gagawaen dan dili iray propisiya ra. Ibagam ed sikara ya ondengel irad saray salita na Katawan.

³"Sikato ya so ibabaga na Katawan a Dios: Pakaskasiy kipapasen da ra yan makulang-kulang a propita! Say dili ran kalakal so oonuren da tan manggagawa ra labat na dilin pasingayew da.

⁴"Totood Israel, saray propita yo et andi-kakanaan iran singa saray asod katakelan a manaayam irad saray deral-deral ed sakey a siudad.

⁵"Ag da guaguardiaan iray pasen ya ageba ray padir, odino papasimbaloen ya ipaalagey iray padir, kanyan ag niagel so Israel no onsabiy bakal no agew na Katawan.

⁶"Tila ray pasingayew tan saray pasakbay da. Ibabaga ra a saray salitak so ibabawag da, balet diad tuay tua ag ko ra imbaki. Balet iilaloan dan ontua ray salita ra.

⁷"Ibabagak ed sikara: Tila ra tay anengneng yon pasingayew, tan aliwan tua ray ipapasakbay yo. Ibabaga yo a sikaray salitak, balet say katwaan to ag ak akisalitad sikayo!

⁸"Kanyan say Katawan a Dios kuantod sikara, Tila ray salita yo, tan aliwan tua ray pasingayew yo. Sumpa ak ed sikayo.

⁹"Ngalngali ta kayo la dusaen, sikayo ran propita a tila ray pasingayew yo tan managpalikdo ray pasakbay yo. Ag kayo nakaiba na saray totook no mantitipon iran manggaway disision; ag nibilang iray ngaran yo ed listaan da ray mibabaley ed Israel; ag kayon balut makapawil ed dalin yo. Diad satan naamtaan yo a siak so Katawan a Dios.

¹⁰Papalikdoen na saray propita iray totook diad pangibabaga ran maung ya amin so pansumpalan. Balet petepeteg ya aliwan maung so pansumpalan! Aliwan malet a padir so impaalagey na saray totook, insan sinmabi ray propita tan tinapalan da na dena.

¹¹Ibagam ed saray propita a nageba so padir da. Mangipelag ak na maples ya oran. Ompelag met ed padir so oran a yilo, tan ombasig ed sikato so mabiskeg a dagem.

¹²Nageba may padir, tan tepeten ed sikayo na balang sakey a too no antoy kana na samay intapal a dena.

¹³Natan saya so kuan na Katawan a Dios: Diad pasnuk ko mangisiplug ak na mabiskeg a dagem, mangipelag ak na maples ya oran, tan say yilon oran a maneral ed samay padir.

¹⁴Ginetmak ya igebad dalin imay padir a tinapalan na dena, mekmekan ko, tan paolyan kon ompaway iray baton pundasion to. Natumbaan kayo ya amin no nageba tan ompatey kayo. Diad satan naamtaan na balang sakey a siak so Katawan.

¹⁵Samay padir tan saray nantatapal na dena et nalikna ray biskeg na pasnuk ko. Diad satan ibagak ed sika a naandi lay padir tan saramay nantapal na dena

¹⁶salanti saray propita ya angipasiguro ed Jerusalem a maung ya amin so pansumpalan, anta andi! Say Katawan a Dios so nansalita.

¹⁷Inkuan na Katawan, Sika a toon ompatey, nengneng mo natan iray bibii ed saray totoom a gagawaen dan dili iray propisiya ra. Mampropisiya ka sumpad sikara

¹⁸tan ibagam ed sikara so sasalitaen kod sikara, siak a Katawan a Dios: Pakaskasiy kipapasen yo, sikayo ran bibii! Idadaitan yo ray totoo na abel ya ibariber dad ngalngalowan da tan ikakana rad panagsalamangka. Manggagawa kayo met na pandung da ray totoo tan ikakana ran pansalamangka, pian naoleyan da so bilay na saray arum a totoo. Pilalek yon naoleyan yo so bilay tan say patey na arum a totoo, pian makagamur kayo na bengatlan pankaabigan yo.

¹⁹Papabaingan yo ak ed arap na saray totook, pian makala kayo labat na sankaakup a sibada tan pigaran tinapay. Papateyen yo ray totoon ag da kanepegay ompatey, tan pansiasiansiaen yon mabilay iray totoon ag da kanepegay mambilay. Kanyan titilaan yo ray totook, et manisia rad sikayo.

²⁰Natan sikato ya so ibabagay Katawan a Dios: Kabosul ko ra tay abel ya ibeberber yo ed ngalngalowan ya ikakana yon panooley yo ed bilay tan patey. Bingkasen ko ran ekalen ed saray taklay yo tan ibolus ko ray totoon ooleyan yo.

²¹Bingkasen kon ekalen iray pandung yo tan paekalen kod pakayari yo ray totook. Naamtaan yod satan a siak so Katawan.

²²Diad panamegley na saray panagtila yo pabebetelen yoy linawa da ray maung a totoon ag ko labay a pasakitan. Sesebelan yo ray totoo ed pangibeneg dad saray kaogsan da tan pangilaban dad bilay da.

²³Kanyan natan nansamput la ray tilan pasingayew yo tan saray managpalikdon propisiya yo. Eekalen kod pakayari yo iray totook, pian naamtaan yo a siak so Katawan.