Read Pangasinan EZEKIEL 17 Bible Online

EZEKIEL 17 - Pangasinan bible

EZEKIEL 17

¹"Say Katawan akisalitad siak,

²"Sika a toon ompatey, kuanto, salitam ed saray Israelita so sayan alimbawa

³"diad pangipaamtam ed sikara na ibabagak ed sikara, siak a Katawan a Dios: Walay sakey a balbaleg ya agila ya akabuskag so balibali tan balbaleg iran payak to. Tinmikyab ed Kapalandeyan na Libano tan inala ton pinoter so toktok na kiew a sidro.

⁴"Inawit tod dalin da ray nigosianti tan inlira to ed siudad na saray managlako.

⁵"Insan angalay sakey a malangwer a sengeg na ubas ed dalin na Israel tan intanem to ed mataban alog a kawalaan na dakel a danum a mamatubod sikato.

⁶"Tinmubo may tanaman tan nagmaliw ya abeba tan malambut a sengeg na ubas. Tinmagey ya amaarap ed samay agila iray sanga to, tan nampaaralem iray lamut to. Akobutan na sanga-sanga tan bolubolung iray wakal to.

⁷"Walay sakey nin balbaleg ya agila tan balbaleg met iray payak ton mabago-bago. Natan impaarap na samay sengeg na ubas ed sikato iray lamut to tan saray bolung to, ta ag la pigan dakel niy niiter ed sikaton danum na samay agila nen say samay danum a walad akaitaneman to.

⁸"Balet samay sengeg na ubas nitanem la ed mataba tan mabasan alog pian onlambut tan mambunga, et diad ontan magmaliw a nidoma-doman sengeg na ubas.

⁹"Kanyan siak a Katawan a Dios tetepeten ko: Mambilay tan ombaleg kasi yan sengeg na ubas? Ag kasi lamuten na samay ononan agila tan pagpagen to ray bunga to, tan lopak-lopaken to ray sanga to tan paolyan to ran nalenes? Ag la nakaukolan so mapalalon biskeg o makapanyarin bansa a mamagut ed sikato.

¹⁰On, nitanem, balet mambilay tan ombaleg kasi? Ag kasi nalenes no basigan na mabiskeg a dagem a manlapud bokig? Ag kasi nalenes lad man ed akaitaneman to?

¹¹Say Katawan inkuantod siak,

¹²Tepet mod sarayan mananumpan totoo no kasin amta ra so kabaliksan na samay alimbawa. Ibagam ed sikara a say ari na Babilonia et linmad Jerusalem tan inawit tod Babilonia so ari tan saray opisyal to.

¹³Inala toy sakey a kabyangan na pamilya na ari, akipakna ed sikato, tan impansamba ton matoor ya ontoluk. Inawit to ray manonan totoo

¹⁴pian sikaray makasengeg na ag ilaban lamet na bansa tan, diad ontan, anggapoy panduaruwa ton nasumpal imay paknaan.

¹⁵Balet say ari na Juda linmaban tan angibakid Egipto na saray totoo to, ta miala ray kabayo tan saray amayamay a sondalo. Manalo kasi? Diad panggawa tod satan, makabatik kasi? Ag kasi nadusa no sumlangen to may paknaan?

¹⁶Say Katawan a Dios kuanto, Andi-duaruwa a siak so mabilay a Dios; ontan met ya andi-duaruwan ompatey ed Babilonia yan ari, lapud sinumlang toy samba to tan say impipakna to ed ari na Babilonia ya angipayorung ed sikatod trono.

¹⁷Anggan saray makapanyarin sondalo na ari na Egipto et ag da nayarian a tulongan ya onlaban no saray taga Babilonia et manggawa ray bunton na dalin tan saray tirinsira, pian napatey da ray amayamay a totoo.

¹⁸Sinumlang toy sinambaan to tan say impipaknaan to. Ginawa to ra yan amin, kanyan natan ag makabatik.

¹⁹Say Katawan a Dios kuanto, Andi-duaruwa a siak so mabilay a Dios; ontan met ya andi-duaruwan dusaen ko so arid Juda, lapud sinumlang to so paknaan a sinambaan tod ngaran ko ya onuren.

²⁰Isabokul koy iket na umaanup ta erelen ko. Iyakar ko ed Babilonia tan dusaen kod man, lapud aliwan matoor ed siak.

²¹Napatey ed bakal iray sankadonungan a sondalo to tan saray makapaliis ed patey et nikaykayat irad nandoroman pasen. Diad satan nakabatan yo a siak a Katawan so nansalita.

²²Sikato ya so ibabaga na Katawan a Dios: Alaen koy toktok na atagey a kiew a sidro tan mamoter ak na sibwal ton sanga; itanem ko ed atagey a palandey,

²³diad sankatageyan a palandey na Israel. Mansanga may tanaman tan mambunga, et magmaliw a nidoma-doman kiew a sidro. Manayam irad may amin a klasiy manok tan onsirum ira ed silong to.

²⁴Amin a kiew ed dalin naamtaan da a siak so Katawan. Babatangen ko ray atagey a kakiewan, tan pababalegen ko ray melag kiew. Lelenesen ko ray malambut a kiew tan palalambuten ko ray amagan kiew. Siak a Katawan so nansalita. Gawaen ko so sinalitak.